მაჟია თესალონიკელეფ

2 ჯიმალეფ, უფალ იესო ქრისტეშ მოულაშ* დო თიწკუმა ჩქინ აკოშაყარუაშ დროშ გურშენ მოკო, რთხუათ, 2 ნამდა ვებორჯათ დო ემოციეფს ვეიაჸუნათ, მუჟამსით გიწინა, იეჰოვაშ* დღაქ ქუმორთუა, გოკონ-და იჩიებუდან, ნამდა თე ამბე ღორონთშე ვარდა ჩქინ მინაჭარა წერილეფშე უჩქუნა.

3 მითინქ ვემგოჩილითუან, მუშენდა თი დღა ვა დოდირთუ, სოიშახ განდგომილება ვემკორჩქინდუ დო ვა მოურს უკანონობაშ კოჩ, მოსპუალაშ სქუა. 4 თინა მოწინააღმდეგე რე დო მუშ დუდის თი ირფელშე მაღალას გიორინუანს, მუდგას ადამიანეფ თაყვანს ცენა ვარდა ღორონთო მირჩქინანა; თინა ღორონთიშ ტაძარს ხე დო ირკოჩიშ წოხოლე დუდ ღორონთო მოუღ. 5 ვა რშუნანო, თქვანწკუმა რინაშ დროს თეს გირაგადუდითინ?!

6 ასე გიჩქუნა, მი ჭოფუნს თის, ნამდა დროშე ადრე ვეგმიარგამას დუდ. 7 თიშ უკანონობა ტყობაშე უკვე მოქმედენს დო თიმწკუმა გეგმიარგამებ, მუჟამსით მით თის ჭოფუნს, მეტო ვეჸუაფ. 8 თიმწკუმა გამკორჩქინდუ უკანონობაშ კოჩ. თის უფალ იესო მუშ პიჯშე ეკულირ ძალიერ სიტყვეფით მოსპუნს თიმ დროს, მუჟამსით ირკოჩშო არგამა იჸუაფ მუშ მოულა. 9 უკანონობაშ კოჩ სატანაშ ძალათ მოურს დო სასწაულეფით, ტყურა ნიშანეფით, სარკო საქმეეფით 10 დო ირნერ მაზაკვალურ შარათ მიოჩილითუანს არძას, მიდგას მოსპუალა მოძჷ, მუშენდა ვემიღეს დო ვეჸოროფუეს სიმართლე, მუთ გინასქილიდუანდ თინეფს, 11 ათეშენ ღორონთ მიაშქვანს, ნამდა დეღორან დო ტყურა დეჯერან, 12 მუშენდა ბრალ ქიგედვას არძას, მიდგაქ სიმართლე ვედეჯერ დო მიდგას უბადობა ოჰამუდ.

13 ჯიმალეფ, იეჰოვაშო* საჸოროფოეფ, ჩქი ვალდებულეფ ვორეთ, ღორონთის ირიათო მადლობა უწუათ თქვანიშ გურშენ, მუშენდა თიქ თქვან რწმენაშ გურშენ დაჭყაფშე გიშარგორეს რსხებაშო — გუგასუფთეს მუშ წმინდა შურით*. 14 თეშო ღორონთიქ თი სახიოლო ამბეშ საშვალებათ გიშარგორეს, ნამდგას ჩქი ვაცხადენთ, ნამდა თეშ ჸოფედითკო განდიდებულ, მუჭოთ ჩქინ უფალ, იესო ქრისტე. 15 თაშ ნამდა, ჯიმალეფ, მანგარო ქიგედირთით დო ირიათო მიაჸუნით თი ირფელს, მუთ ჩქინდე დიგურეთ სიტყვათ დოვარ წერილეფით. 16 ჩქინ უფალ იესო ქრისტექ დო ღორონთიქ, ჩქინ მუმაქ, ნამდგაქ ქომიჸოროფუეს დო მუშ დიდ ჭყოლოფათ სადღამუშოთ ემქექუეს გურშა დო დიდებულ იმენდ მუჩეს, 17 გურშა ეიქექუან დო გუგამანგარან, ნამდა ირიათო ჯგირ აკეთათ დო ჯგირ იჩუათ.