ტიტე
3 ირიათო ქუგაშინ თინეფს, ქურჩქილან დო დემორჩილან მთავრობეფს დო ხელისუფლებეფს, მზათ რდანჷ ირნერ ჯგირ საქმეშო, 2 მითინ ვა ლანძღან, ვეჩხუპან დო მუნეფიშ ვეჩემან, თეშ გინაწონს, არძას გემუანო მეუდირთან. 3 ართ დროს ჩქი ხოლო უდუჯერებელეფ, შარას ეჩილათირეფ, ბრელნერ სურვილიშ დო სიამოვნებაშ მონეფ, უბადოეფ, მენჯარიშეფ დო საზიზღარეფ ვორდით დო ართიან ბჯოგუდეს.
4 მარა, მუჟამსით ჩქინ მარსხებელქ, ღორონთიქ, სიკეთე გეგმირჩქინ დო ადამიანეფიშ ჸოროფა ქაძირუ 5 (ჩქინ ჯგირ საქმეეფიშ გურშენ ვარინ, თიშ გურშენ, ნამდა მოჭყოლოფე რე), თიქ გუმასუფთუეს, თეშნერო სიცოცხლე ქომუჩეს დო მუშ წმინდა შურით* ახალ პიროვნებათ გინმოშქვეს. 6 თიქ ჩქინ მარსხებელიშ, იესო ქრისტეშ, საშვალებათ ხვეიანო ქომუჩეს მუშ წმინდა შურ, 7 ნამდა თიშ უკულ, მუთ თიშ გიმორჩქინელ ჸოროფათ მართალეფო იპჸუაფუდით მერჩქინელ, პჸოფედითკო ულიებ სიცოცხლეშ მემკვიდრეეფ, მუდგაშ იმენდ მიღუნა.
8 თე სიტყვეფ სანდო რე დო მოკო, ქიმეხვარე თინეფს, ირიათო თეშე ფიქრენდან; თეშნერო თინეფ, მიდგაქ ღორონთ ირწმუნეს, ირიათო ჯგირ საქმეეფიშ კეთებაშენ იფიქრენა. თე ირფელ ჯგირ რე დო ჯგირობუა მოუღ კოჩშა.
9 დუდ აურიდ ბორულ დო უაზრო ნირზის, ვეკლაჩხირკა საგვარეულო სიეფ, კანონიშ გურშენ მითინს ვეწეკინდა დო ვეჩხუპა, მუშენდა თენა მუთუნიშ მოღე ვა რე დო ჯგირ მუთუნ ვა მოჸუნს. 10 თინა, მით გინორთელს* ოგურუანს, დიო ართშა გაფრთხილ, უკულ მაჟიაშა, დო ვაირჩქილ-და, მუთუნნერ საქმე ვედეკინა თიწკუმა. 11 სი ხოლო გიჩქჷ, ნამდა თეცალ კოჩ შარას რე ეჩილათირ, ცოდენს დო მუშ დუდის კინ მუ გიშმუღანს განაჩენს.
12 არტემასის ვარდა ტიქიკეს ქიმეიშქვანქინ, ირფელ გაკეთ, ნამდა ჩქიმდა ქუმორთე ნიკოპოლისშა, მუშენდა თაქ გინოპჭყვიდ გითოზოთონჯაფა. 13 აპოლოს დო ზენას, მიდგას ჯგირო უჩქუნა კანონ, ოულარო გახაზირ, ნამდა შარას მუთუნქ ვემიოკორდან. 14 ჩქინ და დო ჯიმალეფქ ხოლო ქიმიარჩქვანან ჯგირიშ კეთებას, მუშენდა საჭიროქ ქიჸუ-და, შეიალებუან შხვეფიშ მოხვარაქ დო ბრელ ჯგირ საქმეშ კეთებაქ.
15 მოკითხვას გიჩინანს არძა, მით ჩქიმწკუმა რე. მოკითხვა გინომიჩ მორწმუნეეფშა, ჩქი უჸორთინ თინეფშა.
ნამთინს ვა მორრკებუდან ღორონთიშ ჭყოლოფა!