ეფესოელეფ
1 რჭარუნთ პავლე, ღორონთიშ ნებათ იესო ქრისტეშ მოციქულო გერნაფილ, ეფესოს მახორუ წმინდეფს* დო ართგურეფს, მით ქრისტე იესოწკუმა რეთჷ ართობას:
2 ჭყოლოფა დო მშვიდობა ვა მორრკებუდან ღორონთშე, ჩქინ მუმაშე, დო უფალ იესო ქრისტეშე!
3 დიდება ჩქინ უფალიშ, იესო ქრისტეშ, ღორონთის დო მუმას, ნამდგაქ მუშ წმინდა შურით* ირნერო დოფხვამუეს ზეცას ქრისტეწკუმა ართობას. 4 თექ ქიძირ, მუჟამსით ღორონთიქ დიო ხოლო ქიანაშ გოჭყაფაშახ გიშაბგორეს, ნამდა ქრისტეწკუმა ართობას პჸოფედითკო, მუშენდა ჸოროფათ წმინდეფ დო ბრალ ვეგებძუნან ფერეფ ქუვორდითკო ღორონთიშ წოხოლე. 5 თიქ წინასწარ გინოჭყვიდ, იესო ქრისტეშ საშვალებათ სქუალეფო გეპჭოფესკო, მუჭოთ მუშ გურს ოჰამუდ დო მუშ ნებას მეურდჷ. 6 ღორონთიქ თაშ თიშენ მიქცუ, ნამდა ხალხიქ განადიდუკო თინა თი დიდებულ ჭყოლოფაშენ, ნამდგათ მუშ საჸოროფო სქუაშ საშვალებათ მიჭყოლოფუეს. 7 თიშ სქუაშ ზისხირით ვორეთ გიშაჸიდირელ დო გათავისფალებურ. თაშ რე, ღორონთიშ მერეთ ჭყოლოფათ მეპატუეს ცოდეფქ!
8 თიქ ემოფშეს ჭყოლოფათ ირნერ სიბრძნე დო ინონჭაფაშ უნარწკუმა ართო, 9 მუჟამსით გამცხადეს მუშ ნებაშ წმინდა საიდუმლო, ნამდგას იწონუანს დო ნამუთ დუდშე აფუდ მოფიქრებულ, 10 ნამდა მერჩქინელ დროშ ბოლოს საქმეეფს ქუხელმძღვანელუკო, შხვანერო ქოფთქუათინ, ქრისტეწკუმა აკოშაყარუკო ირფელ ზეცას დო დედამიწას. თაშ რე, ირფელ აკიშაყარუ ქრისტეწკუმა, 11 მიდგაწკუმა ართობა მიღუნა დო მიდგაწკუმა ართო მემკვიდრეეფო ვორეთ გერნაფილ. ღორონთიქ წინასწარ გიშაბგორეს, მუჭოთ დუდშე აფუდ გინოჭყვიდილ, მუშენდა თინა ირფელს მუშ ნებას მეურენ თეშ ორთჷ. 12 პირველო ჩქი, იუდეველეფს, მუმაჩეს ქრისტეშ იმენდიქ, ნამდა ცქვაფა დო დიდება უძღვინათ ღორონთის. 13 მარა, თიშ უკულ, მუთ გეგით სიმართლე — სახიოლო ამბე თქვან რსხებაშ გურშენ — თქვა ხოლო ქუმგაჩეს ქრისტეშ იმენდიქ, ქირწმუნით თინა დო ბეჭედგეშქუმალირეფო გინირთით წმინდა შურით, ნამუთ ღორონთიქ დეგეპირეს; 14 თე წმინდა შურ რე ნიშან, ნამდა მიბღენთ მემკვიდრეობას, მუდგაშ შედეგო ღორონთიშ ხალხ* გეთავისფალებ გიშაჸიდირალიშ საშვალებათ თიშ ოცქვაფალო დო ოდიდებელო.
15 ათეშენ, თიშ უკულ მუთ გებგჷ, მუჭო რწანა უფალ იესო დო მუჭო ოძირანთ, ნამდა გიჸორა წმინდეფ*, 16 ირო მადლობას ურაგადუქ ღორონთის თქვან გურშენ დო ირიათო მოიშინუანთ ჩქიმ ლოცვეფს, 17 მუშენდა ჩქინ უფალ იესო ქრისტეშ ღორონთიქ, დიდებულ მუმაქ, ქიმერჩან ძალა, ნამდა რდათჷ ბრძენეფ დო ქინანჭათ თი ირფელს, მუდგას ღორონთ აცხადენს დო მიღათ ზუსტ რჩქინა თიშ გურშენ. 18 ღორონთიქ გურეფ გოინწყეს, ნამდა თის ხოლო ქინანჭათ, მუ იმენდ მერჩეს თიქ, მუჟამსით გიშარგორეს, მუშმადიდა მემკვიდრეობა აფჷ კინოჩუალირ წმინდეფშო* 19 დო მუჭო მოქმედენს თიშ დიდებულ ძალა ჩქინდა, მორწმუნეეფშა. თე ძალაშ დიდებულებაქ თიმ დროს ქიძირ, 20 მუჟამსით ღორონთიქ ქრისტე გათელ, ზეცას მუშ მარძგვანშე ქალეხუნუ 21 დო არძა მთავრობაშე, ხელისუფლებაშე, ძალაუფლებაშე, მმართველობაშე დო არძა სახელშე მაღალას ქიგიორინუ ხვალე ასე* ვარინ, მომავალშო ხოლო. 22 ღორონთიქ ირფელ თის დუმორჩილ დო კრებას თინა ქიგიორინუ ირფელიშ დუდო. 23 კრება თიშ სხეულ რე დო ეფშა რე თიშ თვისებეფით, მით ირფელს ირნერო ეიოფშანს.