მათე
4 უკულ ღორონთიქ მუშ შურით იესოს გინაჭყვიდირაფუ, უდაბნოშა მიდართუკო, სოდეთ ეშმაკიქ ეცად, მიოჩილითუკო თინა. 2 40 დღა დო სერიშ მარხვაშ უკულ მაშქირენ. 3 ეშმაკიქ ქიმერთჷ თიშ ოჩილითაფშა დო უწუ: „ღორონთიშ სქუა ქორექ-და, ქოუწი თე ქუალეფს, ქობალეფო გინირთან“. 4 მარა თიქ უპასუხ: «ჭარილ რე: „კოჩიქ ხვალე ქობალით ვარინ, იეჰოვაშ ნარაგად ირ სიტყვათ ოკო იცოცხლას“».
5 უკულ ეშმაკიქ თინა წმინდა ქალაქშა მიდეჸუნ, ტაძარიშ არძაშ უმოს მაღალ ადგილს ქიგმარინუ 6 დო უწუ: «ღორონთიშ სქუა ქორექ-და, ქოსხაპ თავრეშე, მუშენდა ჭარილ რე: „მუშ ანგელოზეფს უზოჯუნს დო თინეფ ხედოხეთ გილაიჸუნანა, ნამდა ქუაშა კუჩხიქ ვემკოიოლას“». 7 იესოქ უპასუხ: «თინა ხოლო ჭარილ რე: „ვეგმოცადა იეჰოვა, სქან ღორონთ“».
8 უკულ ეშმაკიქ თინა სარკოთ მაღალ გვალაშა გეშეჸუნ დო ქაძირუ მსოფლიოშ არძა სამეფო დო თინეფიშ დიდება. 9 უკულ უწუ: „ჩქიმ წოხოლე ბირგულს ქუდაშქვანქ დო თაყვანს ქოფცენქ-და*, თე ირფელს სი ქიმერჩანქ“. 10 იესოქ უპასუხ: «ჩემეთხი, სატანა! მუშენდა ჭარილ რე: „იეჰოვას, სქან ღორონთის, ცი თაყვან დო ხვალე თის ემსახურ*“». 11 თიმწკუმა ეშმაკიქ ჩეთხუ თის. იესოშა ანგელოზეფქ ქიმერთეს დო მემსახურეს.
12 მუჟამსით იესოქ ქიგეგ, ნამდა იოანე ჭოფილ რდჷ, გალილეაშა მიდართჷ. 13 თეშ უკულ ნაზარეთ ქიდიტუ დო ოცხოვრებშა გეგნორთჷ კაპერნაუმშა, ზღვაპიჯშა, ზებულონ დო ნაფთალიშ მხარეშა, 14 ნამდა შისრულუკო ღორონთიშ სიტყვეფქ, ნამუთ ესაია წინასწარმეტყველს ორაგადაფუ: 15 „შხვა ხალხიშ გალილეა, ზებულონ დო ნაფთალი, ზღვაშ შარას რექინ, იორდანეშ მელე! 16 უკმელას ხედუნ ფერ ხალხიქ დიდ სინთე ქოძირ, ღურაშ ორო მინარდუნ თინეფს სინთექ ქუმნადირთჷ“. 17 თიმ დროშე მოჸუნაფილ იესო ქადაგენდჷ: „ინარღით დაშებულ*, მუშენდა მონჭაფილ რე ზეციერ სამეფო“.
18 გალილეაშ ზღვაპიჯის ელაჸუნდუნ, ჟირ მეჩხომე ჯიმა ქოძირ. თინეფ ზღვას ბადეს ინაჸათანდეს. ართის სიმონ ჯოხოდ, ნამდგას პეტრეს უძახუდეს, დო მაჟიას — ანდრია. 19 უწუ თინეფს: „ქეკმაჸუნით დო ქუდგოგურუანთ ადამიანეფიშ გორუას, ჩხომს გორუნან თეშ!“ 20 თინეფქ ხეთეშე ქიდიტუეს ბადეეფ დო ქეკაჸუნეს. 21 თევრეშე მიშუნ, ხოლო ჟირ ჯიმა ქოძირ — ზებედეშ სქუალეფ იაკობ დო იოანე. თინეფ მუნეფიშ მუმა ზებედეწკუმა ართო ნავს ინოხედეს დო ბადეეფს ელაჭანდეს. იესოქ თინეფს ხოლო ქუდუძახ. 22 თინეფქ ხეთეშე ქიდიტუეს ქოთ ნავ დო ქოთ მუმა დო ქეკაჸუნეს.
23 გილეშ იესო მთელ გალილეას, ოგურუანდჷ ხალხის სინაგოგეფს, ქადაგენდჷ სახიოლო ამბეს სამეფოშ გურშენ დო ოსქილიდუანდჷ თინეფს არძანერ ლახალაშე. 24 თიშ ამბექ მთელ სირიას მადვჷ. მეჸუნდეს თიშა შხვადოშხვა ლახალათ დო ოტანჯებელით გაწამებულეფ, დემონ მიშუხედესინ ფერეფ, ზნე მაკათუდესინ ფერეფ, დოქანცაფა ვეშულებუდესინ ფერეფ დო თინა ოსქილიდუანდჷ თინეფს. 25 ათეშენ ბრელ ხალხ ეკოჸუნდჷ გალილეაშე, დეკაპოლისშე, იერუსალიმშე, იუდეაშე დო იორდანეშ მელეშე.