იოანე
17 იესოქ თეშ რაგად გათუნ, ცაშა გეიჯინ დო თქუ: „მუმა, ქუდოდირთჷ დროქ; განადიდ სქან სქუა, ნამდა სქუაქ სი განგადიდას! 2 განადიდ თინა, მუჭოთ თიმწკუმა აკეთ, მუჟამსით ძალაუფლება მეჩჷ არძა ხალხშა, მუშენდა ულიებ სიცოცხლე ქიმეჩას არძას, მით თის გინოჩ. 3 ულიებ სიცოცხლეშ მიოღებელო ოკო გიჩინებაფუანდან სი, ხვალე ართ ნამდვილ ღორონთის, დო თის, მით სი მაშქვჷ, იესო ქრისტეს. 4 მა განგადიდ დედამიწას, ბოლოშა ქიმიპჸუნ თი საქმე, ნამდგაშ კეთება სი დუმავალ. 5 ასე, მუმა, კინ ქომუჩ თი დიდება, ნამუთ ქიანაშ გოჭყაფაშახ სქანწკუმა რინაშ დროს მიღუდ.
6 მა სქან სახელ გაუცხად ხალხის, მით სი მუჩჷ თე ქიანაშე. სქანეფ რდესჷ თინეფ დო სი მა ქომუჩ; თინეფქ მიაჸუნეს სქან სიტყვას. 7 ასე ქინანჭეს, ნამდა ირფელ, მუთ მუჩჷ, სქანდე რე, 8 მუშენდა თინა, მუთ სქანდე მიბრჩქილე, გეგნოფჩჷ თინეფს; თინეფქ ხოლო მიღეს თე სიტყვეფ დო ქიდეჯერეს, ნამდა სქანდე მობრთჷ დო ქირწმუნეს, ნამდა სი მუმაშქვჷ. 9 თინეფშო რთხინქჷ, თე ქიანაშო ვა რთხინქჷ, თინეფშო, მით სი მუჩჷ, მუშენდა სქანეფ რენა; 10 ირფელ, მუთ ჩქიმ რე, სქან რე დო ირფელ, მუთ სქან რე, ჩქიმ რე; მა განმადიდეს თინეფქ, მით სი მუჩჷ.
11 მა სქანდა მოურქ. მა მეტო ვა ვორექ თე ქიანას, მარა თინეფ რენა. წმინდა მუმა, დოთხილე თინეფ სქან სახელიშ გურშენ, ნამუთ მა მუჩჷ, ნამდა ართ რდანჷ, მუჭოთ ჩქი ვორეთ ართ*. 12 მუჟამსით თინეფწკუმა ვორდჷ, ფთხილანდჷ თინეფს სქან სახელიშ გურშენ, ნამუთ სი მუჩჷ. დოფთხილე თინეფ დო თინეფშე ნამთინ ვა მოსპე. წმინდა წერილეფს ენოჭარილქ შისრულასინ თიშენ, ხვალე ართ მისპუ; თიშ მეტ* მითინ ვეგენადგურებ. 13 ასე სქანდა მოურქ, მარა ონდო თე ქიანას ვორექ, იფჩიებუქ თე ირფელს, მუშენდა თინეფ ხოლო თი ხიოლით რდანჷ ეფშა, ნამუთ მა მიღჷ. 14 სქან სიტყვა გაუცხად თინეფს, მარა თე ქიანაქ გიჯოგუ თინეფ, მუშენდა ვა რენა თე ქიანაშ ნაწილ, მუჭოთ მა ვა ვორექ თე ქიანაშ ნაწილ.
15 თის ვა რთხინქჷ, ნამდა თე ქიანაშე მიდეჸუნე თინეფ, თის რთხინქჷ, ნამდა უბადოშე დოთხილუე. 16 თინეფ ვა რენა თე ქიანაშ ნაწილ, მუჭოთ მა ვა ვორექ ქიანაშ ნაწილ. 17 რთხინქჷ, სიმართლეშ საშვალებათ წმინდათ გინაშქვ თინეფ; სქან სიტყვა რე სიმართლე! 18 მუჭოთ სი მუმაშქვჷ თე ქიანაშა, თეშ მა ხოლო მიდვაშქვჷ თინეფ თე ქიანაშა. 19 წმინდათ ფსქიდუქ თინეფიშ გურშენ, მუშენდა თინეფქ ხოლო წმინდათ გინირთან სიმართლეშ საშვალებათ.
20 ხვალე თენეფშე ვა რთხინქინ, თინეფშე ხოლო რთხინქჷ, მით მირწმუნენს თენეფიშ ნარაგადით, 21 ნამდა არძა ართ რდანჷ, მუჭოთ სი, მუმა, ჩქიმწკუმა რექჷ ართობას დო მა სქანწკუმა ვორექ ართობას, მუშენდა თინეფ ხოლო ართობას რდანჷ ჩქინწკუმა დო თე ქიანაქ ქირწმუნას, ნამდა სი მუმაშქვჷ. 22 თინეფს ხოლო ქიმეფჩჷ თი დიდება, მუშენდა ართ რდანჷ, მუჭოთ ჩქი ვორეთ ართ. 23 მა თინეფწკუმა ვორექ ართობას დო სი — ჩქიმწკუმა, მუშენდა თინეფქ ქიმიოჭირინუან სრულყოფილ ართობას დო თე ქიანას უჩქუდას, ნამდა სი მუმაშქვჷ დო თეშ ქიჸოროფე თინეფ, მუჭოთ მა მიჸოროფე. 24 მუმა, მოკო, ნამდა თინეფ ხოლო, მით სი მუჩჷ, ჩქიმწკუმა რდანჷ, ნამდა ქოძირან ჩქიმ დიდება, ნამუთ სი მუჩჷ, მუშენდა ქიანაშ გოჭყაფაშახ მიჸოროფე. 25 სამართლიან მუმა, თე ქიანა ვაიჩინენს, მარა მა გიჩინენქ დო თენეფქ ხოლო ქიმეხვადეს, ნამდა სი მუმაშქვჷ. 26 მა სქან სახელ გაუცხად თინეფს დო ხოლო გაუცხადენქ, მუშენდა მუნეფქ ხოლო თი ჸოროფა გეგმირჩქინან, ნამდგათ მიჸოროფე, დო მა თინეფწკუმა ვორდე ართობას“.