ტიტე
1 რჭარუნქ პავლე, ღორონთიშ მონა დო იესო ქრისტეშ მოციქულ. ჩქიმ, მუჭოთ მოციქულიშ რწმენა მეურე ღორონთიშ გიშაგორილეფიშ რწმენას დო სიმართლეშ ზუსტ რჩქინას. თე სიმართლეშა მიშურს ღორონთიშ ართგურობა 2 დო გერსხილ რე ულიებ სიცოცხლეშ იმენდშა, ნამუთ ბრელ ხანიშ წოხოლე დემეპირეს ღორონთიქ, მით მუთუნით ვა თქუანს ტყურას. 3 ღორონთიქ, ჩქინ მარსხებელქ, მუშ სიტყვა მერჩქინელ დროს გაცხად სახიოლო ამბეშ ქადაგებათ, ნამდგაქ თიშ ნაზოჯინათ ჩქიმდა იჸუ მენდებულქ. 4 პჭარუნქ ტიტეს, ჩქიმ საჸოროფო სქუას, მიდგას თინა წანსჷ, მუთ ჩქი პწანა:
ვა მორრკებუდას ჭყოლოფა დო მშვიდობა ღორონთშე, ჩქინ მუმაშე, დო ჩქინ მარსხებელ ქრისტე იესოშე!
5 კრეტას თიშენ დოიტე, ნამდა გილალუაფირ საქმე გეგშანწყუე დო არძა ქალაქის დანიშნე უხუცესეფ თეშ, მუჭოთ გიგოწურე: 6 უხუცესის ბრალ ოკო ვეგეძუდას, ჸუნდას ხვალე ართ ოსურ დო მორწმუნე სქუალეფ, მიდგას ბრალ ვეგეძუნა დუდეშქუმალირობას ვარდა უდუჯერებუობას. 7 ზედამხედველს, მუჭოთ ღორონთიშ გერინაფილ მსახურს, ბრალ მუთუნს ოკო ვეგეძუდას, ოკო ვა რდასჷ აჩემებულ, გურფიცხე, შუმილია, ოკო ვა ჩხუპენდას* დო ჰარამობათ დო უპატიოსნობათ ვაცადუდას შიბას. 8 ოკო რდასჷ სტუმარიშ მოჸოროფე, ჯგირიშ მოჸოროფე, გურგოჩამილ, მართალ, ართგურ, დუდშეკებულ; 9 შხვაშა გურაფაშ დროს ზუსტას ოკო გეჸუნდას სიმართლეშ სიტყვას, ნამდა შეიალებუას გურშა ელუკინას შხვას სწორ გურაფათ დო თე გურაფაშ გინორთელს იჩიებუნან თინეფს, ქაძირუას, სო რენა ჩილათირ.
10 ბრელ რე ბუნტიშ დუდ, პოტიკეფიშ მორაგადე, მეტყურე; თინეფ შქას უმენტაშ იჩიებ, ნამდა წინადაცვეთა აუცილებერ რე. 11 თეცალეფს ნინა ოკო ქინაჸათნაფუე, მუშენდა მუნეფიშ სამოგებოთ თის ოგურუანა მუდგას ოკო ვაგურუანდან; თეშნერო თინეფ რწმენას აკმურღვანა ოჯახეფს. 12 თინეფშე ართიქ, კინ მუნეფიშ წინასწარმეტყველქ თქუ: „კრეტელეფ რენა მეტყურეეფ, უდუნდებელ მხეცეფ, ზირტიკეფ დო ურძღაფელეფ“.
13 თენა მართალ რე. ათეშენ მკაცრას ქიგიოწურე თინეფ, ნამდა უღუდან ძალიერ რწმენა 14 დო ჸუჯშა ველეშქვან იუდეველეფიშ არიკეფ დო თინეფიშ დოდგინელ კანონეფ, მით სიმართლეშ შარაშე გინურთანა. 15 სუფთა კოჩშო ირფელ სუფთა რე, მარა წაულირეფშო დო ურწმუნოეფშო მუთუნ ვა რე სუფთა, მუშენდა თინეფს აზროვნება დო სინდის გილალუაფირ აფუნა. 16 სახალხოთ ქაცხადენა, ნამდა ღორონთის იჩინენა, მარა მუნეფიშ საქმეეფით ოჭიშის ურთინუანა, მუშენდა საზიზღარეფ დო უდუჯერებელეფ რენა დო მუთუნნერ ჯგირ საქმეშო ვეგმოდირთუნა.