იოანეშ პირველ წერილ
4 საჸოროფოეფ, ვედეჯერათ არძა წინასწარმეტყველება. თეშ მანგიორო, გეგნამოწმით, მართალო ღორონთშე ქორენ დო ვარ თინა, მუშენდა ბრელ ტყურაწინასწარმეტყველქ გემკორჩქინდჷ.
2 წინასწარმეტყველება ღორონთშე რენ დო ვარ, თეთ მეხვადუთ: წინასწარმეტყველება, ნამუთ აღიარენს, ნამდა იესო ქრისტექ დედამიწაშა ადამიანიშ სხეულით მორთჷ, ღორონთშე რე, 3 მარა წინასწარმეტყველება, ნამუთ იესოს ვაღიარენს, ღორონთშე ვა რე. თე წინასწარმეტყველება რე ანტიქრისტეშე, მიდგაქ, მუჭოთ გიჩქუდეს, ოკო მუკორჩქინდუკო, დო ქოთ რე უკვე მოულირ.
4 სქუალეფ, თქვა ღორონთშე რეთჷ დო უკვე გიორჯგინით ტყურაწინასწარმეტყველეფს, მუშენდა თინა, მით თქვანწკუმა ართობას რე, თიშე უმოს დიდ რე, მით თე ქიანაწკუმა რე ართობას. 5 თინეფ თე ქიანაშე რენა დო თის იჩიებუნა, მუდგას თე ქიანა იჩიებ, ათეშენ ურჩქილე თე ქიანა თინეფს. 6 ჩქი ღორონთშე ვორეთ. მით ღორონთის იჩინებაფუანს, მირჩქილენა, მარა მით ღორონთშე ვა რე, ვამრჩქილენა. თაშ ფხვადუთ, წინასწარმეტყველება ტყურა რენ დოვარ მართალ.
7 საჸოროფოეფ, მიჸორდან ართიან, მუშენდა ჸოროფა ღორონთშე მოურს. მიდგას უჸორს, ღორონთშე რე დო იჩინენს თის. 8 მიდგას ვა უჸორს, ვეჩინენს ღორონთის, მუშენდა ღორონთ ჸოროფა რე. 9 ღორონთიქ ჸოროფა თით მოძირუეს, ნამდა მუშ ხვალეგუნაჭყეფ სქუა მაშქვჷ თე ქიანაშა, მუშენდა თიშ საშვალებათ მემღებუდესკო სიცოცხლე. 10 ჸოროფა თინა ვა რე, ნამდა ჩქი იპჸოროფეთ ღორონთ, ჸოროფა თინა რე, ნამდა თიქ მიჸოროფუეს დო ჩქინ ცოდეფიშ გურშენ მუშ სქუა ქუმაშქვჷ შერიგაშ მსხვერპლო.
11 საჸოროფოეფ, ღორონთიქ თაშ ქომიჸოროფუეს-და, ჩქი ხოლო ვალდებულ ვორეთ, მიჸორდან ართიან. 12 ღორონთ დღას მითინს ვა უძირ. ართიან ქომიჸორან-და, ღორონთ ჩქინწკუმა სქიდუ დო თიშ ჸოროფა სრულას იძირე ჩქინ შქას. 13 ჩქი თიწკუმა ვორეთ ართობას დო თინა – ჩქინწკუმა, მუთ თევრეშე მიჩქუნა, ნამდა მუშ წმინდა შურ* მუჩეს. 14 თეს გეძინელ, ჩქინ თოლით ბძირით დო ვამოწმენთ, ნამდა ზეციერ მუმაქ მუშ სქუა თე ქიანაშ მარსხებელო მაშქვჷ. 15 მით აღიარენს, ნამდა იესო ღორონთიშ სქუა რე, ღორონთწკუმა ართობას სქიდუ დო ღორონთ თიწკუმა სქიდუ ართობას. 16 ჩქი ქიბგინით, ნამდა ღორონთის უჸორთ დო პწანა თენა.
ღორონთ ჸოროფა რე, ათეშენ თინა, მით ირიათო გიმირჩქინანს ჸოროფას, ღორონთწკუმა სქიდუ ართობას, დო ღორონთ – თიწკუმა. 17 ათეშენ სრულას გიმიბრჩქინანთ ჸოროფას, ნამდა თამამას შემალებუან რაგადიქ გასამართლებაშ დღას, მუშენდა თე ქიანას ჩქი ხოლო ქრისტეცალო ფცხოვრენთ. 18 ჸოროფას შიშ ვაკათ; სრულყოფილ ჸოროფა გიშმარაჸუნს შიშის, მუშენდა შიშ ბობრკუნა. მიდგას ოშქურ, თიშ გურს ჸოროფა სრულას ვა რე. 19 ჩქი მიჸორა, მუშენდა პირველო თიქ მიჸოროფუეს.
20 მითინ ქიჩიებ, ღორონთ მიჸორსია, მარა მუშ ჯიმა ვა უჸორს-და, მეტყურე რე, მუშენდა მიდგას ვა უჸორს მუშ ჯიმა, ნამდგას ორწყე, მუჭო უჸორდას იჸი ღორონთ, ნამდგას ვარწყე?! 21 თიქ თეცალ მცნება მუჩეს: მიდგას ღორონთ უჸორს, თის მუშ ჯიმა ხოლო ოკო უჸორდას.