იოანე
15 «მა ნამდვილ ბინეხ ვორექ, მუაჩქიმ მებინეხე რე. 2 თინა მითხინუანს ნოჸელეფს, ნამდგას მუთუნ ვამკუღ დო მიკუღუნ თის სხუნუნს, ნამდა უმოს გემკიღას. 3 თქვა უკვე სუფთეფ რეთჷ თი სიტყვაშ ჭყოლოფათ, ნამუთ მა გიწით. 4 ქუდოსქიდით ჩქიმწკუმა ართობას დო მა ხოლო ქუდოფსქიდუქ თქვანწკუმა ართობას. ნოჸელაქ ბინეხის ვემკოსქიდ-და, მუთუნ ვემკაღინე, თქვა ხოლო ჩქიმწკუმა ართობას ვა დოსქიდუთ-და, მუთუნ ვემგკაღინენა. 5 მა ბინეხ ვორექ დო თქვა ნოჸელეფ რეთჷ. მით ჩქიმწკუმა ართობას სქიდუ დო მიდგაწკუმა მა ფსქიდუქ ართობას, ბრელ ნაყოფ მიკუღ. ჩქიმ უმშო მუთუნ ვა გაკეთებენა. 6 მით ვა სქიდუ ჩქიმწკუმა ართობას, თის მოჭკირილ ნოჸელეფცალო ოჸოთანა, ნამუთ ხუმუ. კოჩ შაყარანს თეცალ ნოჸელეფს, დაჩხირს მიშაჸათანს დო ჭუნსჷ. 7 ჩქიმწკუმა ართობას ქოსქიდუთ დო ჩქიმ ნარაგად თქვანწკუმა ქოსქიდუნ-და, ქითხით, მუთ გოკონან, დო ირფელს მიღენთ. 8 მუჟამსით ბრელ ნაყოფ მიკოიღუნა დო ამტკიცენთ, ნამდა ჩქიმ მოწაფეეფ რეთჷ, თენა განადიდენს ჩქიმ მუმას. 9 მუჭოთ მუმაქ მიჸოროფუ, მა ხოლო თეშ გიჸოროფეთ. ქუდოსქიდით ჩქიმ ჸოროფას. 10 ჩქიმ კანონეფს ქიმეჸუნთ-და, ჩქიმ ჸოროფას სქიდუთ, მუჭოთ მა მეპჸუნქ მუმაშ კანონეფს დო ფსქიდუქ თიშ ჸოროფას.
11 თე ირფელ თიშენ გიწით, ნამდა გიღუდან თი ხიოლ, ნამუთ მა მიღჷ დო თე ხიოლით რდათჷ ეფშა. 12 ჩქიმ კანონ თინა რე, ნამდა თეშ გიჸორდან ართიან, მუჭოთ მა გიჸოროფეთ. 13 ვა არსებენს თიშე უმოს დიდ ჸოროფა, მუჟამსით კოჩ მუშ სიცოცხლეს თმენსჷ მეგობრეფშო. 14 გიწითინ თის ქართუთ-და, ჩქიმ მეგობრეფ რეთჷ. 15 მეტო ვა დოიძახუთ მონეფს, მუშენდა მონას ვა უჩქჷ, მუს ორთჷ მუშ ბატონ; მეგობრეფს გიძახუთ, მუშენდა ირფელ ქუგგოგებაფეთ, მუთ ჩქიმ მუმაშე მიბრჩქილე. 16 თქვა ვეგშაიგორუთინ, მა გიშარგორით დო გიგორინეთ, ნამდა ვემიოტუათ ნაყოფიშ მიკოღალა დო თქვან მიკნაღელქ ქუდოსქიდას, მუშენდა მუმას ჩქიმ სახელით მუდგა ვა თხუათინ, ქიმერჩან.
17 თეს თიშენ გიზოჯუნთ, ნამდა გიჸორდან ართიან. 18 თე ქიანას ქოჯოგუთ-და, გიჩქუნა, ნამდა თქვანშახ მა გომჯოგუ. 19 თე ქიანაშ ნაწილ ქორდათინ, თის უჸორდუკონ იჸიდ თინა, მუთ მუშ რე, მარა თე ქიანაშ ნაწილ ვა რეთჷ, მა გიშარგორით თე ქიანაშე, ათეშენ ჯოგუთ თის. 20 რშუდან ჩქიმ ნარაგად, მონა ვა რე ბატონშე უმოს. მა ქოფთხოზუდეს-და, თქვა ხოლო გამგათხოზუნა, ჩქიმ სიტყვას ქიმეჸუნდეს-და, თქვანს ხოლო ქიმიაჸუნუნა. 21 თე ირფელს ჩქიმ სახელიშ გურშენ გაიკეთენა, მუშენდა ვეჩინენა თის, მიდგაქ მუმაშქვჷ. 22 ვა მომრთუმუდუკონ დო თინეფწკუმა ვამჩიებინუდუკონ, ბრალ ვეგიადვალუდეს, მარა ასე ვა გამართლებენა მუნეფიშ ცოდეფ. 23 მიდგას მა ბჯოგუქ, მუაჩქიმ ხოლო ჯოგჷ. 24 მითინს ვა უკეთებუნ თი საქმეეფ თინეფიშ თოლიშ წოხოლე ვამქიმინუდუკონ, ბრალ ვეგიადვალუდეს, მარა ასე თინეფქ ქოთ ქობძირეს დო ქოთ გომჯოგუეს, მუჭოთ მა, თეშ მუაჩქიმ ხოლო. 25 მარა თექ თიშენ მოხვად, ნამდა შისრულუკო კანონს ინოჭარილქ: „ბრალ ვამღუდუნ თეშ გომჯოგუეს“. 26 მუჟამსით ქუმურს მოხვარე*, წმინდა შურ*, ნამუთ სიმართლეს აცხადენს, დო ნამუთ მუმაშე რე, დაიმოწმენა ჩქიმიშ გურშენ. 27 თქვა ხოლო ოკო დამოწმათ ჩქიმიშ გურშენ, მუშენდა დუდშე მოჸუნაფილ ჩქიმწკუმა ართო რეთჷ».