მათე
12 თი პერიოდის, საბატონს, იესო დო თიშ მოწაფეეფ ჸვანას მიკიშეს. მოწაფეეფს მაშქირენეს დო ქიდიჭყეს ქობალიშ კაკალიშ გინოწილუა დო ჭკუმუა. 2 თენა ქოძირესინ, ფარისეველეფქ უწუეს: „ვარწყექო, სქან მოწაფეეფ თის ორთუნა, მუთ კანონით საბატონს ვეშილებე!“ 3 მარა თიქ უწუ: «ვაიკითხირუნანო, მუ აკეთ დავითიქ, მუჟამსით თის დო თიშ მაჸალეეფს მაშქირენეს?! 4 მუჭო მინორთჷ ღორონთიშ კარავშა, სოდეთ თიქ დო მუშ ხალხიქ შესაწირ ქობალ* ჭკუმეს, ნამდგაშ ჭკუმუა კანონით მღვდელეფიშ მეტ მითინს ვეშულებუდ?! 5 ვარდა ვაიკითხირუნანო კანონს, ნამდა საბატონ დღას ტაძარს მღვდელეფ ვემეჸუნა საბატონიშ კანონს დო თეშ გურშენ ბრალ ვეგიადვალუნა?! 6 მარა მა გირაგადუთ: თაქ რე თინა, მით ტაძარშე უმოს რე. 7 ქიმეხვალამედითკონ, მუს ნიშნენს „ჭყოლოფა მოკო დო ვართ მსხვერპლ“, ბრალს ვეგედვანდით თინეფს, მიდგას მუთუნ ვა დუშებუნა, 8 მუშენდა კოჩიშ სქუა საბატონიშ უფალ რე!»
9 თევრეშე მოლართუნ, იესოქ სინაგოგაშა გემნორთჷ. 10 თექ რდჷ ართ ხეგოხუმაფილ კოჩ. ბრალიშ გიოდვალარო თინეფქ იესოს კითხეს: „კანონით ქიშილებენო საბატონს ლეხიშ სქილიდაფა?“ 11 იესოქ უპასუხ: „თქვანდე ნამთინეს ართ შხურ ქოჸუნდას დო თიქ საბატონს ნთხორილს ქინოლასინ, ვემეთხუნთო ხეს დო ვეშეჸუნანთო თევრეშე?! 12 მუსხით უმოს ძვირფას რე კოჩ შხურშე! თაშ ნამდა, კანონით შილებე საბატონს ჯგირიშ კეთება“. 13 უკულ უწუ თი კოჩის: „გოთინ ხე“. თიქ ხოლო გოთინ ხე დო დუსქიდ თიქ. 14 ფარისეველეფქ გეგმორთეს დო იესოშ ჸვილუა მირაგადუეს. 15 იესოქ თენა ქიგეგუნ, ქიდიტუ თექიანობა. ბრელქ ქეკაჸუნ თის დო არძა დასქილიდუ, 16 მარა უზოჯ, მითინწკუმა ვა უთქუალუდესკო მუშ გურშენ, 17 ნამდა შისრულუკო ესაია წინასწარმეტყველიშ ნარაგადიქ:
18 „თენა რე ჩქიმ საჸოროფო მსახურ, ნამუთ მა გიშებგორ დო ნამუთ მიპწონე! ჩქიმ შურს ქიმეფჩანქ თის დო თინა ქუგაგებაფუანს ხალხეფს, მუ რე სამართალ; 19 ვენირზენს დო ვართ ხონარს ეუკინანს, მთავარ ქუჩეფს ხოლო მითინ ვეგეგენს თიშ ხონარს. 20 გინოდირაკილ ღერიას ვეგნოტახუნს დო ჭვიტანსინ ფერ ფიტილს ვა შქირიტუნს, სოიშახ სამართალს ვემიღანს. 21 თიშ სახელიშ იმენდ აღვენუნა ხალხეფს“.
22 უკულ თის ქიმუჸუნეს ართ კოჩ, ნამდგას დემონ მიშუხედ, თოლს ვარწყედ დო მუნჯ რდჷ. იესოქ დასქილიდუ თინა; თიქ ხოლო რაგად ქიდიჭყჷ დო თოლსინთექ ქუმაკათ. 23 ხალხ მანგარ გაკვირებულ რდჷ დო კითხულენდეს, თენა ხომ ვა რენია დავითიშ სქუა. 24 ფარისეველეფქ თენა ქიგეგესინ, თქუეს: „თის ვეგშარაჸედ დემონეფ, თინეფიშ მმართველიშ, ბელზებელიშ*, ძალაშ უმშო“. 25 იესოს უჩქუდ, გურს მუ უღუდეს, ათეშენ თინეფს უწუ: „გორთილ სამეფო მისპუ დო გორთილ ქალაქ ვარდა ოჯახ აკოცენს. 26 სატანა სატანას ქიგშარაჸუნს-და, მუშ დუდიშ წინააღმდეგ ჸოფე გორთილ დო მუჭო გარზუ თიშ სამეფო?! 27 მა დემონეფს ბელზებელიშ ძალათ ქიგშაბრაჸუნქ-და, თქვან სქუალეფ* მიშ ძალათ გიშმარაჸუნა?! ათეშენ თინეფ გუგასამართლენა. 28 მარა, დემონეფს ღორონთიშ ძალათ ქიგშაბრაჸუნქ-და, იმწკუმა შურო ვა გაიგებუნან თეშ ქუმურთუმ ღორონთიშ სამეფოს. 29 მითინქ ძალიერ კოჩის გემნაკათასინ, მუ მიდაღინე თიშა, სოიშახ ვა ბორკუნს თის?! ხვალე თეშ უკულ შეიალებე თიშ ჸუდეშ გორჩუალა. 30 მით ჩქიმ მხარეს ვა რე, ჩქიმ წინააღმდეგ რე, დო მით ჩქიმწკუმა ართო ვა შაყარანს, ორღვანს.
31 ათეშენ გირაგადუთ: ირნერ ცოდა დო ირნერ გლახაშ რაგად ეპატიებ კოჩის, მარა ღორონთიშ წმინდა შურიშ* გურშენ გლახაშ რაგად ვეპატიებ. 32 მაგალთო, მით კოჩიშ სქუაშ გურშენ თქუანს გლახას, ეპატიებ, მარა მით წმინდა შურიშ გურშენ თქუანს გლახას, ვეპატიებ ვართ ასე* დო ვართ უკულ.
33 ჯას ჯგირო ქულუანქ-და, ჯგირ ნაყოფის გემკიღანს, გლახათ ქულუანქ-და, — გლახას; ჯა მუშ მუკნაღელით იჩინებე. 34 შხამიან გვერიშ გამნარყეფ, მუჭო თქუანთ ჯგირს, მუჟამსით უბადოეფ რეთჷ?! პიჯ თის იჩიებ, მუდგათ გურ რე ეფშა. 35 ჯგირ კოჩ ჯგირს იჩიებ, მუშენდა თიშ გურ ჯგირით რე ეფშა, მარა გლახა კოჩ გლახას იჩიებ, მუშენდა თიშ გურ გლახათ რე ეფშა. 36 გირაგადუთ: კოჩის არძა ურგებელ სიტყვაშე მეთხიებ პასუხ სასამართლოშ დღას, 37 მუშენდა სქან სიტყვეფიშ გურშენ ვარდა მართალო იჸუაფუქ მერჩქინელ ვარდა ბრალ ქიგგადვალუ“.
38 თიმწკუმა ნამთინე მწიგნობარქ დო ფარისეველქ უწუ: „მოძღვარ, მოკონა, ნიშან ქუმოძირუათ“. 39 თიქ უპასუხ: „უბადო დო ღორონთიშ მოღალატე* თაობას ოკო ნიშანიშ ძირაფა, მარა იონა წინასწარმეტყველიშ ნიშანიშ მეტის მუთუნს ვა ძირუნს. 40 მუჭოთ იონა რდჷ დიდ ჩხომიშ ქვარას სუმ დღა დო სერს, თეშ იჸუაფ კოჩიშ სქუა დედამიწაშ გურს სუმ დღა დო სერს. 41 გასამართლებაშ დღას ნინეველეფ ხოლო თე თაობაწკუმა ართო გეთელებუნა დო ბრალს ქიგედვანა თის, მუშენდა თინეფქ ინარღეს დაშებულ* დო მიკირთეს, მუჟამსით იონაქ უქადაგ, მარა თაქ რენ თინა, იონაშე დიდ რე. 42 გასამართლებაშ დღას სამხრეთიშ დედოფალ ხოლო თე თაობაწკუმა ართო გეთელებ დო ბრალს ქიგედვანს თის, მუშენდა თიქ შორშე მორთჷ სოლომონიშ სიბრძნეშ მარჩქილაფშა, მარა თაქ რენ თინა, სოლომონშე დიდ რე.
43 მუჟამსით ადამიანშე დემონ* გიშურს, უწყარე ადგილეფს მიკურს მასვანჯებელ ადგილიშ ოგორალო, მარა სოთინ ვარწყე თის 44 დო იჩიებ: „დიბრთუქ ჩქიმ ჸუდეშა, სოვრეშეთ გიმობრთჷ“. მეურს დო ორწყე, ნამდა ჸუდე ცარიელ, გიმოსუფთებულ დო გასქვამებულ რე. 45 უკულ მეურს დო მუშე უმოს უბადო შქვით შურ მოჸუნს, მინულა დინახალე დო თექ სქიდუნა. საბოლათ თე კოჩ თიშე უფრაშ დღას ინოლუ, ვინემ დუდშე რდჷ. თაშ აღოლე თე უბადო თაობას ხოლო!“
46 თინა დიო ხოლო ხალხის ურაგადუდ, მუჟამსით თიშ დიდა დო ჯიმალეფქ ქიმერთეს დო გალე ქიგედირთეს, მუშენდა თიწკუმა ჩიება ოკოდეს. 47 მიდგარენქ უწუ თის: „გალე სქან დიდა დო ჯიმალეფ გერენა დო სქანწკუმა ჩიება ოკონა“. 48 თიქ უპასუხ: „მი რე ჩქიმ დიდა დო მი რენა ჩქიმ ჯიმალეფ?“ 49 თიქ მოწაფეეფჸურე ქაჭოფუ ხე დო თქუ: „თენეფ რენა ჩქიმ დიდა დო ჩქიმ ჯიმალეფ! 50 მუშენდა, მით ჩქიმ ზეციერ მუმაშ ნებას ასრულენს, თინა რე ჩქიმ ჯიმა, და დო დიდა!“