რომაელეფშა მეჭარილ წერილ

2 თაშ ნამდა, მიდგა ვა რდენ, მუთუნ გამართლება ვაიღ, მუჟამსით შხვეფს თი საქმეეფიშ გურშენ ასამართლენქ, ნამდგას სი ხოლო ორთუქ; თინეფიშ გასამართლებათ სქან დუდის გედვანქ ბრალს. 2 მიჩქუნა, ნამდა ღორონთ თეცალ საქმეეფიშ მაკეთებელეფს სიმართლეთ ასამართლენს.

3 ხომ ვა ფიქრენქ, ნამდა ღორონთიშ სასამართლოშა განტინე, მუჟამსით შხვეფს თი საქმეეფშე ასამართლენქ, ნამდგას სი ხოლო ორთუქ?! 4 ეგება, მუთუნო ვემგორჩქ ღორონთიშ ჯგირ გურ, თიშ ჭყოლოფა დო მოთვინება?! ვაიჩქუნო, ნამდა ღორონთ მუშ ჯგირ გურით ოცად, დაშებულიშ ნარღებაშა* ქიმეიჸუნას?! 5 მარა, აჯამობას გეგმირჩქინანქ დო დაშებულს ვენარღენქ-და, ღორონთიშ სამართლიან განაჩენიშ დღას თიშ რისხუას ქიგიტახანქ დუდშა. 6 თინა არძას მუშ-მუშ საქმეეფით გინუგანს: 7 ულიებ სიცოცხლეს მეჩანს თინეფს, მით უშულადუო ორთჷ ჯგირს დო თეშნერო ოცად, მიღას დიდება, პატი დო ულიებ სიცოცხლე, 8 მარა ღორონთიშ რისხუას დო გონჭყორუას მიღენს თინა, მიდგას უჸორს ნირზ, ვეგლურს სიმართლეთ დო არასწორო იქციებ. 9 გაჭირება დო უბედრობა გიოტირხუ არძას, მით უბადობას ორთჷ — დიო იუდეველს დო უკულ ბერძენს, 10 მარა დიდება, პატი დო მშვიდობა აში არძას, მით ჯგირს ორთჷ — დიო იუდეველს დო უკულ ბერძენს. 11  ღორონთ მითინს ვეგშართუნს ართმაჟიაშე.

12  არძა, მიდგას ღორონთიშ კანონ ვა უჩქჷ დო ცოდენს, დოღურუ, თიშ უმკუჯინუო, ნამდა კანონ ვა უჩქჷ, დო არძა, მიდგას კანონ უჩქჷ დო ცოდენს, თე კანონით გესამართლებ. 13  ღორონთიშ თოლს მართალეფ კანონს ირჩქილენან თინეფ ვარინ, კანონს მეჸუნან თინეფ რენა. 14 შხვა რჯულიშ ხალხის კანონ ვა უღჷ, მარა, მუჟამსით მუნეფიშით ორთუნა თის, მუდგას კანონ იჩიებ, ოძირანა, ნამდა გურს უღუნა კანონ. 15  თინეფიშ საქმეეფ ოძირანს, ნამდა კანონ გურეფს ენუჭარუნა. თეს მუნეფიშ სინდის ხოლო უმტკიცენს, ნამუთ მინშა ბრალს გედვანს თინეფს დო მინშა ამართლენს. 16  თაშ მოხვადუ გასამართლება თიმ დღას, მუჟამსით ქრისტე იესოშ საშვალებათ ღორონთ გასამართლენს ადამიანეფს თი საქმეეფშენ, მუდგას ფულირო ორთუნა, მუჭოთ თენა თი სახიოლო ამბეშე იძირე, ნამდგას მა ვაცხადენქ.

17 სქან დუდის იუდეველს უძახუქ, კანონშა რექჷ დაიმენდებულ, გოხიოლ, ნამდა ღორონთიშ ხალხ შქას რექჷ, 18  გიჩქჷ, მუს ითხინს თინა დო ხვადუქ, მუ რე ძვირფას, მუშენდა ნაგურეფ გაფჷ კანონ, 19 რჯერსჷ, ნამდა ჸვერეეფშო აწმაჸუნალ რექჷ დო უკმელას რენან თინეფშო — სინთე, 20 მიგორჩქ, ნამდა უჭკუეეფიშ გიმაწურაფალ დო ბაღანეფიშ მასწავლებერ რექჷ დო კანონს მოჩამილ სიმართლე დო გურაფეფ ბოლოშა გიჩქჷ. 21 თაშ ქორენ-და, შხვეფს ოგურუანქინ, სქან დუდის მუშენ ვაგურუანქ?! ქადაგენქ, ვეხირავა დო ხირულენქო?! 22 იჩიებუქ, ვემრუშავა დო მრუშენქო?! კერპეფ ვა გაძირუაფ დო ავრე ტაძარეფშე ხირულენქო?! 23 კანონ გიღუნ თით იცქვანქ, ვარინ ავრე კანონს გინურთანქ დო ღორონთის ონჯღორეს ოძირანქო?! 24 მუჭოთ ჭარილ რე: „თქვანიშ გურშენ შხვა რჯულიშ ხალხ შქას ღორონთიშ სახელ ილანძღუ“.

25 წინადაცვეთას თიმწკუმა უღჷ ფას, მუჟამსით კანონს მეჸუნქ, მარა, კანონს ქიგნურთანქ-და, სქან წინადაცვეთას ფას უდინუ. 26 მუჟამსით წინადაცვეთილ ვა რენ ფერ კოჩ მეჸუნს თის, მუდგას კანონ სამართლიანო ითხინს, ღორონთიშ თოლს წინადაცვეთილო ვეჸუაფუნო მერჩქინელ?! 27 შხვა რჯულიშ კოჩ, ნამუთ წინადაცვეთილ ვა რე, კანონიშ მეჸუნათ გუგასამართლენს, მუშენდა სი კანონს გინურთანქ, ვარინ ქოთ ჭარილ კანონ გიღჷ დო ქოთ წინადაცვეთილ რექჷ. 28 იუდეველ თინა ვა რე, მით მეჯინელო იძირე თეცალ, ვართ წინადაცვეთა რე თინა, მუთ გალეშე სხეულს იძირე, 29 იუდეველ თინა რე, მით დინახალეშე რე თეჯგურა, მიდგას გურ აფჷ წინადაცვეთილ წმინდა შურით* დო ვართ ხოლო ჭარილ კანონით. თეცალ კოჩის დიდება ხალხშე ვარინ, ღორონთშე უღჷ.