იესო ანთასეფს ოდიარუანს

მონჭაფილ რდჷ ახ. წ. 32 წანაშ პასექ. მოციქულეფქ ოქადაგებშე დირთეს. თინეფ შულადირეფ რდესჷ, ათეშენ იესოქ უწუ, ნავით ბეთსაიდაშა მიდაბრთათ დო ქიმიფსვანჯათია. მარა წყარპიჯიშ მენჭაფილს, იესოქ ქოძირ, ნამდა ანთასობით ადამიან ქეკოჸუნაფუნა. მართალ რე, იესოს მუშ მოციქულეფწკუმა ართო ხვალე ოკოდ რინა, მარა მოულირ ხალხის გემუანო ქეშეხვად. თიქ დასქილიდუ დალახებურეფ დო მთელ დღას ღორონთიშ სამეფოშ გურშენ ოგურუანდჷ. გეკიონჯუნ, მოციქულეფქ ქიმერთეს თიშა დო უწუეს: ხალხის შქირენ აჸი. გოუტე, ნამდა მუდგაინ ქიჸიდან დო ოჭკუმან.

იესოქ უწუ: „სოთინ ულა ვა რე საჭირო. თქვა ქიმეჩით ოჭკუმალ“. მოციქულეფქ კითხეს: თის მირაგადუთო, ნამდა იბდათ დო ხალხის ქობალ უჸიდათ? ართ-ართ მოციქულქ, ფილიპექ, თქუ: ბრელ ფარა მიღუდანინ ხოლო, თეზმა კოჩშო დასაბაღ ქობალ იშენ ვა მაშინა.

იესოქ თინეფს კითხჷ: მუ მიღუნა ოჭკუმალო? ანდრიაქ უპასუხ: ხუთ ქობალ დო ჟირ ჭიჭე ჩხომ, მარა თენა მუთუნს ვა ბაღჷ. იესოქ მოციქულეფს უწუ, ნამდა ქიმუღესკო თე ქობალ დო ჩხომ. უკულ ხალხის უწუ, მინდორიას 50 დო 100 კოჩიან ჯგუფეფო ქუდოზოჯესკო. იესოქ გეჭოფ ხუთ ქობალ დო ჟირ ჩხომ, ცაშა გეიჯინ დო ქილოც. უკულ თინეფ მოციქულეფს ქიმეჩ დო მოციქულეფქ ხალხის დურიგეს. 5 000 ქომოლკოჩიქ, თეს გეძინელ, ოსურკათაქ დო ბაღანეფქ, არძაქ ჯგირო ჭკუმჷ. უკულ მოციქულეფქ დოსქილადირ ოჭკუმალ გეშაყარუეს, ნამდა მუთუნქ ვეგლელუკო. დოსქილადირ ოჭკუმალით 12 კალათ გეიოფშეს. მართალო სარკო მუდგარენ ვაკეთუო იესოქ?

ხალხშა თე სასწაულქ თეშ იმოქმედ, ნამდა იესოშ გამეფება მინდომეს. მარა იესოს უჩქუდ, ნამდა იეჰოვას დიო ვა ულამუდ თიშ გამეფება. ათეშენ ხალხ გოუტუ დო მოციქულეფს უწუ, გალილეაშ მელე გეგნორთესკო. თინეფქ ხოლო ნავშა გენორთეს დო მიდართეს. იესოქ ხვალე გეკორთჷ გვალაშა. ქოიჩქუნო, მუშენ? თის ოკოდ, ნამდა ქილოცუკო. მუდგა საქმე ვა ნოღვედკონ, იესო ირო მიჩომილუანდჷ ლოცვაშო.