მუჭო შეილებნა გიღდან ბედნერ ოჯახ? — ნაწილ 1

ახალდაქორწინებულეფს იმენდ უღნა, ირიათო თიცალ ბედნერეფ იჸუაფნა, მუნერით ქორწილიშ დღას რდეს. თენა დასურო შეიოლებერ რე, მუთ ჯგირო უჩქნა თი ქრისტიანეფს, მით ბრელ ხან რე დაქორწინებულეფ რენა დო ირნერო ოცადნა ბიბლიურ რჩევეფიშ გიმორნაფას.

1. მუ რჩევას არზენს ბიბლია ქომონჯეფს?

იეჰოვაქ ქომონჯ ოჯახიშ დუდო გიორინუ (წეკითხით ეფესოელეფიშ 5:23). ღორონთ თიშე ელჷ თიცალ გადაწყვეტილებეფიშ მეღებას, ნამუთ ოჯახის აწადირთუ. ბიბლია ელუჩანს ქომონჯეფს: „გიჸორდან თქვან ოსურეფ“ (ეფესოელები 5:25). მუს ნიშნენს თენა? მოჸოროფე ქომონჯ ჯგირო ოქცუ ოსურს ქოთ თიმწკუმა, მუჟამსით ხვალე რენა დო ქოთ შხვეფწკუმა ართო. თინა თხილანს ზიანშე დო ირფელს ორთჷ, ნამდა იზრუნას თიშ ფიზიკურ დო ემოციურ მოთხოვნილებეფშე (1 ტიმოთე 5:8). მუთ არძაშ უმოს მნიშვნელოვან რე, ქომონჯ მეუღლეშ სულიერ საჭიროებეფშე ზრუნენს (მათე 4:4). მაგალთო, თის შეულებ ილოცას დო ბიბლია წეკითხას ოსურწკუმა ართო. ქომონჯ ოსურშა ჸოროფათ ქოზრუნენს-და, იეჰოვაწკუმა მეგობრობას ვადინუანს (წეკითხით 1 პეტრეშ 3:7).

2. მუ რჩევას არზენს ბიბლია ოსურეფს?

ღორონთიშ სიტყვა იჩიებ: „ოსურ დიდ პატის ოკო ცენდას ქომონჯის“ (ეფესოელები 5:33). მუჭო შეულებ თის თეშ კეთება? ოსურს შეულებ იფიქრას ქომონჯიშ ჯგირ თვისებეფშე დო თი ხანდაშე, ნამდგას თინა ოჯახშა ზრუნვაშ დროს გიმირჩქინანს. თეს გეძინელ, თის პატიცემაშ გიმორჩქინა თით ხოლო შეულებ, ნამდა ხუჯ ქუდუკინას ქომონჯიშ გადაწყვეტილებეფს, გემუანო დურაგადუას დო თიშ გურშენ შხვეფწკუმა ჯგირ იჩუას თიმწკუმა ხოლო, მუჟამსით ქომონჯ ვა რე იეჰოვაშ მსახურ.

3. მუჭო შეულებნა წყვილეფს გამანგარან მუნეფიშ ქორწინება?

ბიბლია დაქორწინებულეფიშ გურშენ იჩიებ, „ჟირ ართ ხორც იჸუაფნანია“ (მათე 19:5). თენა ნიშნენს, ნამდა თინეფქ ქეწინააღმდეგან ირფელს მუთ თინეფიშ ხოლოშიან ურთიერთობას ეცილებ. თეს თი შემთხვევას გაკეთენა, მუჟამსით დროს გეგმურთუნა ართიანს დო გულწრფელო დო ჸოროფათ ქიჩიებნა მუნეფიშ ფიქრეფ დო გრძნობეფშე. თინეფშო, იეჰოვაშ გარდა, მითინ დო მუთუნ ვა რე ართიანიშ უმოს მნიშვნელოვან. დაქორწინებულ წყვილ განსაკუთრებულ სიფრთხილეს გიმირჩქინანს, ნამდა ზედმეტო ვედეახლოვან მითინს.

ქიგეგით უმოს

4. ქომონჯეფ, გიჸორდან მეუღლე დო ქიზრუნით თიშე

ვიდეო: „ქომონჯეფ, თქვან დუდცალო გიჸორდან ოსურ!“ (9:53)

• მუჭო შეულებ ქომონჯის ოსურიშ მიმართ მზრუნველობა დო ჸოროფაშ გიმორჩქინა?

წეკითხით კოლოსელეფიშ 3:12 დო უკულ გარჩით თუდო მოჩამილ კითხვა:

• მუჭო შეულებნა ქომონჯეფს გიმირჩქინან თე თვისებეფ ქორწინებას?

5. ოსურეფ, გიჸორდან მეუღლე დო პატი ცით თის

ბიბლია ურაგად ოსურეფს, პატი ცან მუნეფიშ მეუღლეს, თიშ უმკუჯინუო რე დო ვარ თინა იეჰოვაშ მსახურ. წეკითხით 1 პეტრეშ 3:1, 2 დო უკულ გარჩით თუდო მოჩამილ კითხვა:

• იეჰოვაშ მოწმე ვა რენ ფერ ქომონჯ ქორჸუნან-და, მუშო ოკო რაგად, გოკოდან იჸი, თიქ იეჰოვას ემსახურას. მუ იჸუაფ უჯგუშ — ირიათო უქადაგათ თის დოვარ გეგმირჩქინათ ჯგირ თვისებეფ დო პატიცემათ მექცუათ დო მუშენ ფიქრენთ თაშ?

ჩილ დო ქომონჯის ართო ჯგირ გადაწყვეტილებეფიშ მეღება შეულებნა. მარა მინშა ოსურ შილებე ვათანხმუდას ქომონჯის. თის შეულებ მშვიდას დო პატიცემათ გეგმოხანტას მუშ აზრ, მარა ოკო არჩქილედას, ნამდა იეჰოვას ქომონჯშა აფჷ მეჩამილ პასუხიშმგებლობა, გეგნოჭყვიდას, მუ რე ოჯახშო არძაშ უჯგუშ. თიქ ირნერო ოკო ეცადას, ხუჯ ქუდუკინას ქომონჯიშ გადაწყვეტილებას. თაშ მოქციებათ ოსურ ხეს უნწყუნს, ბედნერ გარემო რდას ჸუდეს. წეკითხით 1 პეტრეშ 3:3—5 დო უკულ გარჩით თუდო მოჩამილ კითხვა:

• მუს გინაფლენს იეჰოვა, მუჟამსით ოსურ პატიცემას გიმირჩქინანს ქომონჯიშ მიმართ?

6. გიორჯგინით პრობლემეფს, ნამდგას ქორწინებას ხვადუთ

ვიდეო: „მუჭო შეულებნა წყვილეფს გამანგარან მუნეფიშ ქორწინება“ (5:44)

• სოვრეშე იძირედ, ნამდა წყვილს ჯვეშობურ ურთიერთობა ვა უღუდ ართიანწკუმა?

• მუ აკეთეს თინეფქ, ნამდა გამანგარესკო მუნეფიშ ქორწინება?

წეკითხით 1 კორინთელეფიშ 10:24 დო კოლოსელეფიშ 3:13. თითოულ მუხლიშ კითხირიშ უკულ გარჩით თუდო მოჩამილ კითხვა:

• მუჭო შეულებ თე რჩევაშ მეჸუნას ქორწინებაშ გამანგარება?

ბიბლია იჩიებ, ნამდა ჩქი ართიანს პატი ოკო ფცათ. თენა ნიშნენს პიროვნებაშა ჯგირო დო თავაზიანო მოქციებას. წეკითხით რომაელეფიშ 12:10 დო უკულ გარჩით თუდო მოჩამილ კითხვა:

• ჩილ დო ქომონჯიქ ართიანს ოკო უჯინასო, ნამ გიმირჩქინანს პირველო პატიცემას დო მუშენ ფიქრენთ თაშ?

დასკვნა

ჩილ დო ქომონჯის შეულებნა ბედნერ რდან, მუჟამსით ართიანიშ ჸოროფა დო პატიცემა აღვენუნა დო გეგმირინუანა ბიბლიურ პრინციპეფს.

გამეორებელ კითხვეფ

• მუჭო შეულებ ქომონჯის ხე შეუნწყუას ოჯახიშ ბედნერობას?

• მუჭო შეულებ ოსურს ხე შეუნწყუას ოჯახიშ ბედნერობას?

• დაქორწინებულ ქორეთ-და, ნამ ბიბლიურ პრინციპის შეულებ თქვან ქორწინებაშ გამანგარება?

დამატებით მასალა

ქოძირით ნამთინე პრაქტიკულ რჩევა, ნამუთ მიგეხვარებნა, გიღდან ბედნერ ოჯახ.

„თქვან ოჯახიშ ბედნერობა თქვან ხეს რე!“ (ბროშურა)

ქუჯინით მუსიკალურ ვიდეოს, სოდეთ მოჩამილ რე თი კურთხევეფ, ნამუთ ქორწინებას ღორონთიშ რჩევეფიშ გიმორნაფას მოჸუნს.

„ნამდვილ ჸოროფა“ (4:26)

ქიგეგით, მუს ნიშნენს, მიაჸუნათ ქომონჯიშ მეთაურობას.

„მუშენ ოკო მიაჸუნას ოსურკოჩიქ მეთაურობაშ პრინციპის?“ („გინაჯინალ კოშკი“ 15 მესი, 2010 წ.)

ართ ჩილ დო ქომონჯის სერიოზულ პრობლემეფ უღუდ დო თინეფ ჩათხიაშე ხოლო ფიქრენდეს. ქოძირით, მუჭო მაგვარეს თე პრობლემეფ.

„ღორონთიქ ჩქინ ქორწინება გამანგარ“ (5:14)