გიშაჸიდირალი — „სრულყოფილ ძღვინ“, მუმაშე რე

1. მუ კურთხევეფიშ მეღება რე შეიოლებერ გიშაჸიდირალიშ საშვალებათ?

იესო ქრისტეშ გიშაჸიდირალით ბრელ კურთხევაშ მიღებაქ იჸუ შეიოლებერქ. გიშაჸიდირალიშ საშვალებათ, სიმართლეშ მოჸოროფე ადამიშ გამნარყი, საბოლათ ღორონთიშ ოჯახიშ წევრო გინირთუ. გიშაჸიდირალიშ ჭყოლოფუათ შემლებნა ირიათო დო ბედნერო იფცხოვრათ. ქრისტეშ გიშაჸიდირალით ბედნერ ცხოვრებაშე მეტიქ იჸუ შეიოლებერქ. იესოქ იეჰოვაშ სამართლიანობას ხუჯ ქუდუკინკონ თიშენ, მუშ ნებათ სიცოცხლე დათმუ დო თენა მნიშვნელოვან საკითხეფწკუმა რე დაკავშირებული (ებრ. 1:8, 9).

2. ა) მუ მნიშვნელოვან საკითხეფ იძირე იესოშ ლოცვაშე? (ქოძირით სურათ თე გვერდის) ბ) მუს გუვარჩიენთ თე სტატიას?

² ღურაშახ სოდგარენ ჟირ წანათ ადრე იესოქ მუშ მოწაფეეფს დაგურუ, მუჭო ილოცესკო: „ჩქინ ზეციერ მუმა, გენიწმინდას სქან სახელქ. ქუმორთას სქან სამეფოქ დო რდას სქან ნება მუჭოთ ზეცასინ, თეშ დედამიწას ხოლო“ (მათ. 6:9, 10). გიშაჸიდირალ უმოსო დუვაფასათინ თიშენ, მორთ, გუვარჩუათ, მუჭო ოხუ თინა ღორონთიშ სახელიშ განწმენდას, თიშ სამეფოშ მართველობას დო ღორონთიშ განზრახვაშ შესრულებას.

„გენიწმინდას სქან სახელქ“

3. მუს ოძირანს იეჰოვაშ სახელ დო მუჭო მიორინუ სატანაქ თის შეურაცხყოფა?

³ იესოქ მუშ ლოცვას პირველო ღორონთიშ სახელიშ განწმენდა მიშინუ. თე სახელ დუდშე ბოლოშა ოძირანს იეჰოვაშ აღმატებულობას, სიდიადეს დო სიწმინდეს. შხვა ლოცვას იესოქ მუშ მუმა „წმინდა მუმათ“ მიშინუ (იოან. 17:11). იეჰოვა წმინდა რენ თიშენ, თიშ დოდგინელ კანონეფი დო პრინციპეფ ხოლო წმინდა რე. თეშ უმკუჯინუო, სატანაქ ედემიშ ბაღის ონირზებელო გინაშკუ საკითხ, ქუღუდ დო ვარ ღორონთის მუშ გუნაჭყეფშა კანონეფიშ დოდგინაშ უფლება. ტყურაშ ეკობრალებათ, სატანაქ ღორონთიშ წმინდა სახელს შეურაცხყოფა ქიმიორინუ (დაბ. 3:1—5).

4. მუ აკეთ იესოქ ღორონთიშ სახელიშ განწმენდაშ გურშენ?

⁴ იესოს შურ დო გურით უჸორდ იეჰოვაშ სახელი (იოან. 17:25, 26). თიქ იეჰოვაშ სახელიშ განწმენდაშო ბრელ მუთუნ აკეთ (წეკითხით ფსალმუნიშ 40:8—10). სრულყოფილ ცხოვრებათ იესოქ ქაძირ, ნამდა გონივრულ დო სამართლიან რე, იეჰოვაქ დუდგინას კანონეფ მუშ გუნაჭყეფუს. თიშ უმკუჯინუო, ნამდა იესოქ სატანაშე ტანჯებას დო ბოლოს ღურას შეხვადუნ, თიქ იშენით ღორონთიშ ართგურქ ქუდოსკიდ. მუშ ართგურობათ იესოქ ქაძირუ, ნამდა სრულყოფილ კოჩის შეულებ ღორონთიშ კანონეფიშ სრულყოფილო დაცვება.

5. მუჭო შემლებნა მონაწილებაშ მეღება ღორონთიშ სახელიშ განწმენდას?

⁵ ჩქინ საქციელით შემლებუნა ვოძირათ, ნამდა მიჸორა იეჰოვაშ სახელი. იეჰოვა ჩქინდე სიწმინდეს ითხინს (წეკითხით 1 პეტრეშ 1:15, 16). თენა თის ნიშნენს, ნამდა ჩქი ხვალე იეჰოვას ოკო ფცათ თაყვან დო მთელ გურით დევემორჩილათ. თხოზინიშ დროს ხოლო, ჩქი იშენ ვოცადუთ იფცხოვრათ ღორონთიშ სამართლიან პრინციპეფით დო კანონეფით. სიმართლეშ საქმეეფიშ კეთებათ სინთეცალო ბრწკინუნთ დო თეთ იეჰოვაშ სახელს განვადიდენთ (მათ. 5:14—16). მუჭოთ წმინდა ხალხი, ჩქინ ცხოვრებაშ წესით ვოძირანთ, ნამდა ღორონთიშ კანონეფ ჯგირ რე დო სატანაშ ბრალდებეფ — ტყურა. ჩქი არძა ფჩირთუთ, მარა მთელ გურით იმნანიენთ დო ვა ვაგრძელენთ თიშ კეთებას, მუთ შეურაცხყვენს იეჰოვას (ფსალმ. 79:9).

6. მუშენ შილებე იეჰოვაქ მართალეფო მაღიარან, არასრულყოფილეფ ვორეთინ თიშ უმკუჯინუო?

⁶ ქრისტეშ მსხვერპლიშ საფუძველშა იეჰოვა პატიენს ცოდეფს თინეფს, მიდგა რწმენას გიმირჩქინანს. ღორონთი მუშ თაყვანიშმცემელეფო ღებულენს თინეფს, მიდგა თის დუც უძღვინენს. იეჰოვა მართალეფო აღიარენს ცხებულ ქრისტიანეფს დო „შხვა შხურს“; ცხებულეფს მუშ სქუალეფო ღებულენს, დო „შხვა შხურს“ — მეგობრეფო (იოან. 10:16; რომ. 5:1, 2; იაკ. 2:21—25). გიშაჸიდირალ ამდღა ხოლო მარზენა თიშ საშვალებას, ნამდა მართალეფო იფთვალუდათ ღორონთიშ წოხოლე დო მონაწილება მიბღათ თიშ სახელიშ განწმენდას.

„ქუმორთას სქან სამეფოქ“

7. მუ კურთხევეფს მუღანს კაცობრიობას ღორონთიშ სამეფო გიშაჸიდირალიშ საშვალებათ?

⁷ თეშ უკულ იესოქ ლოცვას ღორონთის თხუ: „ქუმორთას სქან სამეფოქ“. მუჭო ოკავშირ გიშაჸიდირალ ღორონთიშ სამეფოს? გიშაჸიდირალით შეიოლებერქ იჸუ 144 000 ცხებულ ქრისტიანიშ გიშაგორუაქ, მით იესოწკუმა ართო მეფეეფ დო მღვდელეფ იჸუაფუნა ზეცას (გამოცხ. 5:9, 10; 14:1). იესო დო თიშ თანამართველეფ, ნამუთ ღორონთიშ სამეფოს წარმოადგინენან, ანთას წანაშ დინახალე მორჩილ კაცობრიობას გიშაჸიდირალიშ კურთხევეფს ვემიარკენა. დედამიწა სამოთხეთ გინირთუ. ართგურ კათა გესრულყოფილებუნა დო ღორონთიშ ოჯახიშ ზეციერ დო მიწიერ ნაწილ საბოლათ გეერთიანებუ (გამოცხ. 5:13; 20:6). იესო დუც „გეკუჭყანჭყუნს გვერს“ დო ბოლოს მუღენს სატანაშ ურჩობაშ არძანერ შედეგის (დაბ. 3:15).

8. ა) მუჭო ოძირუ იესოქ მუშ მოწაფეეფს, მუშმადიდა მნიშვნელობა უღუდ სამეფოს? ბ) მუჭო ვოძირანთ ამდღა თის, ნამდა სამეფოს ხუჯის უკინენთ?

⁸ დედამიწას რდუნ თეშ იესოქ მუშ მოწაფეეფს ქაძირუ, მუშმადიდა მნიშვნელობა უღუდ სამეფოს ღორონთიშ განზრახვას. ნათუაშ უკულ ხეთეშე იესოქ ირდიხას ქიქადაქ „სახიოლო ამბე ღორონთიშ სამეფოშ გურშენ“ (ლუკ. 4:43). ზეცაშა ულაშახ იესოქ მუშ მოწაფეეფს დავალ, დუმოწმებდესკონ მუშ გურშენ „დედამიწაშ არძა კუნთხუს“ (საქ. 1:6—8). ღორონთიშ სამეფოშენ ქადაქებათ, ხალხი მთელ დედამიწას ქიგეგენდ გიშაჸიდირალიშ გურშენ დო თინეფს ქაშიდეს საშვალება, გინირთესკო ღორონთიშ სამეფოშ ქვეშევრდომეფო. ამდღა ჩქი ხუჯის უკინენთ ღორონთიშ სამეფოს თით, ნამდა ვოხვარუთ ქრისტეშ ჯიმალეფს, შეასრულან სამეფოშ გურშენ სახიოლო ამბეშ ქადაქებაშ საქმე მთელ მსოფლიოს (მათ. 24:14; 25:40).

„რდას სქან ნება“

9. მუშენ შემლებუნა დარწმუნებულ ვორდათ, ნამდა იეჰოვა შეასრულენს მუშ განზრახვას, ნამუთ კაცობრიობას ოხუ?

⁹ მუს გულისხმენდ იესო, მუჟამსით თქუ: „რდას სქან ნება?“. იეჰოვა რე გუმაჭყაფალი. მუჟამსით მუთუნიშ კეთებაშ პირობას დვანსინ, შემლებუნა თინა უკვე შესრულებულო მიფრჩქინათ (ეს. 55:11). იეჰოვა უფლებას ვემეჩანს სატანაშ ურჩობას, ქეცილას მუშ განზრახვას, ნამუთ კაცობრიობას ოხუ. დუდშე ღორონთიშ განზრახვა რდუ, დედამიწა ადამ დო ევაშ სრულყოფილ შთამომავლობათ ეფშაფედკო (დაბ. 1:28). ადამ დო ევას სქუალეფ ვაჸუნდესინ თეშ დოღურედესკონ, ღორონთიშ თე განზრახვა ვეშისრულებუდ. თაშ ნამდა, შეცოდებაშ უკულ იეჰოვაქ ქიმეჩ თინეფს უფლება, ქოშიბდესკო სქუალეფ. გიშაჸიდირალიშ საფუძველშა, ღორონთი საშვალებას არზენს არძას, მით რწმენას გიმირჩქინანსინ, გესრულყოფილან დო მარადიულო იცხოვრან. იეჰოვას უჸორს ხალხი დო თიშ ნება რე მორჩილ კაცობრიობაქ, მუშ განზრახვას ოსადაგუნ თეშ იცხოვრას.

10. მუ ჯგირობუა მოუღ გიშაჸიდირალს ღურელეფშო?

¹⁰ მუშ რაგად შემლებუნა მილიარდობით ხალხშენ, მიდგაქ თეშ დოღურეს, ნამდა ვაშიბნა საშვალება ქუგუგებდესკო იეჰოვაშ გურშენ დო უმსახურებდესკო თიშა? გიშაყიდირალიშ ჭყოლოფუათ შეიოლებერ რე ღურელეფიშ გაცოცხლება. ჩქინ მოჸოროფე ზეციერ მუმა დურთინუანს თინეფს სიცოცხლეს დო ქიმეჩანს საშვალებას, ქიგეგან მუშ განზრახვაშ გურშენ დო იცხოვრან მარადიულო დედამიწას (საქ. 24:15). იეჰოვას ოკო ხალხიქ დღას ვა ღურას. ღორონთი რე სიცოცხლეშ წყარო, ათეშგურშენ თინა გინირთუ არძა გაცოცხლებულიშ მუმათ (ფსალმ. 36:9). ზუსტას ათეშგურშენ თქუ იესოქ: „ჩქინ ზეციერ მუმა“ (მათ. 6:9). იეჰოვა იესოს ხოლო არზენს საშვალებას მიღას მნიშვნელოვან მონაწილება ღურელეფიშ გაცოცხლებას (იოან. 6:40, 44). სამოთხეს იესო შეასრულენს მუშ მოვალეობას, მუჭოთ „აღდგომა დო სიცოცხლე“ (იოან. 11:25).

11. მუ აფუ განზრახულ ღორონთის „ანაყუ ხალხშო“?

¹¹ იეჰოვაშ კურთხევა ხვალე ჭიჭე რაოდენობაშ ხალხიშ ჯგუფის ვახუ, მუშენდა იესოქ თქუ: „მიდგა ღორონთიშ ნებას ასრულენსინ, თინა რე ჩქიმ ჯიმათ, დათ დო დიდათ“ (მარ. 3:35). ღორონთიშ ნება რე, ნამდა „ანაყუ ხალხიქ“ არძა ეროვნებაშე, ტომშე დო ნინაშე გინირთას თიშ თაყვანიშმცემელო. ქრისტეშ გიშაჸიდირალიშ რწმენას გიმირჩქინანა დო ღორონთიშ ნებას ასრულენან თინეფს, შეულებუნა რდან თინეფ შქას, მით იჩიებუნა: „რსხებას ჩქინ ღორონთის, ტახტის გეხენ თის, დო კირიბის უმარდუთ“ (გამოცხ. 7:9, 10).

12. მუჭო იძირე იესოშ ლოცვაშ ნიმუშშე იეჰოვაშ განზრახვა კაცობრიობაშ გურშენ?

¹² იეჰოვაშ განზრახვა, ნამუთ მორჩილ კაცობრიობას ოხუ, იძირე იესოშ ლოცვაშ ნიმუშშე. მუჭოთ თე ლოცვას რე მოჩამილინ თეშ ოკო გუვაკეთათ ირფელ, მუთ შემლებუნა, ნამდა ხე ქეშუნწყუათ იეჰოვაშ სახელიშ განწმენდას დო მუჭოთ წმინდან თეშ მიფრჩქინათ (ეს. 8:13). იესოშ სახელ ნიშნენს „იეჰოვა რე რსხება“ დო გიშაჸიდირით ხალხიშ რსხება განადიდენს იეჰოვაშ სახელს. ღორონთიშ სამეფოშ საშვალებათ გიშაჸიდირალ ანაყუ კურთხევას მუღანს მორჩილ კაცობრიობას. სინამდვილეს, იესოშ ლოცვაშ ნიმუშ მარწმუნენა, ნამდა იეჰოვას მუთუნ ვეცილებ, შეასრულას მუშ ნება (ფსალმ. 135:6; ეს. 46:9, 10).

გეგმოფხანტათ სიმარდულ გიშაჸიდირალიშ გურშენ

13. მუს ოძირანს ნათუა?

¹³ ართ-ართ მნიშვნელოვან ნაბიჯ, ნამდგათ შემლებნა გიმოფხანტათ გიშაჸიდირალიშ სიმარდულ, თინა რე, ნამდა გიშაჸიდირალიშ რწმენაშ საფუძველშა იეჰოვას დუც მეუძღვინათ დო დიმნათათ. ნათუა ოძირანს, ნამდა „ჩქი იეჰოვას ვოკუთნუთ“ (რომ. 14:8). თეთ ჩქი ღორონთის „სუფთა სინდისის“ ფთხინთ (1 პეტ. 3:21). ქრისტეშ დობუნილ ზისხირიშ საფუძველშა, ნამდგას ჩქინ განწმენდა შეულებუნ, იეჰოვა პასუხენს თე ოთხუალს. ჩქი ბოლოშა დარწმუნებულ ვორეთ, ნამდა თინა არძა მუშ დუნაპირებუს შემსრულენა (რომ. 8:32).

14. მუშენ ითხინს ღორონთ, მიჸორდან მოყვასი?

¹⁴ ხოლო მუჭო შემლებნა ვოძირათ, ნამდა გიშაჸიდირალიშ მარდულეფ ვორეთ? იეჰოვაშ არძა საქმეშე ჸოროფა იძირე, ათეშგურშენ თიშ ნება რე, მუშ თაყვანიშმცემელეფქ ხოლო თე თვისება — ჸოროფა გიმოხანტან (1 იოან. 4:8—11). ჩქი მოკონა ვორდათ „ჩქინ ზეციერ მუმაშ სქუალეფ“ დო თეს ვოძირანთ, მუჟამსით გიმიფრჩქინანთ მოყვასიშ ჸოროფას (მათ. 5:43—48). ჟირ უდიდაშ მცნებაშე პირველ რე იეჰოვაშ ჸოროფა დო მაჟია — მიჸორდან მოყვასი (მათ. 22:37—40). ართ-ართ მნიშვნელოვან საქმე, ნამდგათ შემლებუნა ვოძირათ მოყვასიშ ჸოროფა, რე ღორონთიშ სამეფოშ გურშენ სახიოლო ამბეშ ქადაქება. ჩქი იეჰოვაშ მაგალითის მეპჸუნთ, მუჟამსით ხალხიშ ჸოროფას გიმოფხანტუნთ. ღორონთიშ ჸოროფა „სრულყოფილ რე ჩქინწკუმა“, მუჟამსით ვომორჩილუთ თიშ მითითებას, მიჸორდან შხვეფი, განსაკუთრებულო ჩქინ ჯიმალეფი (1 იოან. 4:12, 20).

გიშაჸიდირალს „გიშაცოცხლებაშ დრო“ მოუღ

15. ა) მუ კურთხევეფს ბღებულენთ იეჰოვაშე? ბ) მუ კურთხევეფ მელუნა მომავალს?

¹⁵ ბოლოშა პატიებაშო შარა მანწყუმუნა, მუჟამსით გიშაჸიდირალიშ რწმენას გიმოფხანტუნთ. ღორონთიშ სიტყვა მარწმუნენა, ნამდა ჩქინ ცოდეფი „დილასუ“ (წეკითხით საქმეეფიშ 3:19—21). მუჭო ჟიშე მიფშინეთინ, გიშაჸიდირალიშ საფუძველშა იეჰოვა ცხებულეფს სქუალეფო ღებულენს (რომ. 8:15—17). „შხვა შხურიშ“ წარმომადგენელეფშო, თენა თიცალ რე, ღორონთი საბუთის არზენდას თინეფს, ნამდა მიღენს სქუალეფო, მარა თე საბუთის ხეს თიმ დროს მაჭარანს, მუჟამსით სრულყოფილო გინირთუნა დო საბოლა გამოცდას მიკილენა. თეშ უკულ ჩქი თიშო მიწიერ სქუალეფ იპჸით (რომ. 8:20, 21; გამოცხ. 20:7—9). იეჰოვა მუშ ძვირფას სქუალეფშა ჸოროფას მარადიულო გიმოხანტუნს დო გიშაჸიდირალ ხოლო ირიათო მომღანა კურთხევეფს (ებრ. 9:12). თე ძღვინ დღას ვადინუანს მუშ ფასის. ვართ მითინს დო ვართ მუთუნს შეულებ ჩქინდა თიშ მიდაღალა.

16. მუჭო გუმათავისუფლენა გიშაჸიდირალი?

¹⁶ ეშმაკის მუთუნნერო ვაცილებე თინეფშა, მიდგა შურ დო გურით ინანიენს, ნამდა საბოლათ იეჰოვაშ ოჯახიშ წევრეფო გინირთან. იესოქ დედამიწაშა ქუმორთ დო „ართშა“ შეწირ დუდი. თეთ გიშაჸიდირალქ მთლიანო იჸუ გინოგაფილქ (ებრ. 9:24—26). თენა ართ დო სამუდამოთ გინოფორუნს თი ცოდეფს, ნამუთ ადამშე მიბღით. ქრისტეშ გიშაჸიდირალიშ ჭყოლოფუათ, ჩქი სატანაშ ქიანაშ მონობაშე თავისუფალ ვორეთ დო ვართ ღურაშ შიშით ფცხოვრენთ (ებრ. 2:14, 15).

17. მუს ნიშნენს იეჰოვაშ ჸოროფა თქვანო?

¹⁷ ღორონთიშ არძა დაპირება სანდო რე. მუჭო ბუნებაშ კანონეფ ვეთირუნ თეშ, იეჰოვაშ ნება ხოლო დღას ვეთირუ (მალ. 3:6). იეჰოვა სიცოცხლეშე უმოსის — მუშ ჸოროფას მარზენა. „ჩქი ქიგებგით დო ქიბრწმუნით ჸოროფა, ნამუთ ჩქინ მუმას უღუ ჩქინ მიმართ. ღორონთ ჸოროფა რე“ (1 იოან. 4:16). მთელ დედამიწა სარკო სამოთხეთ გინირთუ დო არძა გიმოხანტუნდას იჸი ჸოროფას ღორონთცალო. მორთ, ჩქი ხოლო თი ზეციერ გუნაჭყეფუეფიშ მაგალითის მივაჸუნათ, მით იჩიებ: „კურთხევა, დიდება, სიბრძნე, მადლობა, პატი, ძალიერება დო ძალა ჩქინ ღორონთის მარადიულო. ამინ! “ (გამოცხ. 7:12).