ჩქინო ჯგირ რე ართიანწკუმა დაახლოება

1, 2. მუ რე იეჰოვაშო მანგარ მნიშვნელოვან დო მუშ კეთებას ელჷ ჩქინდე?

ᲘᲔᲰᲝᲕᲐᲨᲝ მანგარ მნიშვნელოვან რე, მუჭო ვოქცუთ ადამიანეფს. იესოქ დუმოგურუეს, ნამდა „მოჯგირე“ ჩქინ დუდცალო ოკო მიჸორდან (მათ. 22:37–39). თეშა მიშურს, ჯგირო ვოქცუდათ თინეფს ხოლო, მით დიო ვამსახურ იეჰოვას. მუჟამსით თაშ იფქციებუთ, მეპჸუნთ ჩქინ ღორონთიშ, იეჰოვაშ მაგალითის, ნამდგას „ჩხანა ქოთ უბადოეფშო ეშაჸუნს დო ქოთ ჯგირეფშო, დო ჭვემას ქოთ გლახაშ მაკეთებელეფს არზენს დო ქოთ ჯგირიშ მაკეთებელეფს“ (მათ. 5:45).

² მართალ რე, იეჰოვას არძა ადამიან უჸორს, მარა ჸოროფას განსაკუთრებულო თინეფიშ მიმართ გიმირჩქინანს, მით თიშ ნორმეფით ცხოვრენს (იოან. 14:21). ღორონთის ოკო, ნამდა ჩქი ხოლო თეცალეფ ვორდათ დო ელამჩანა, „მთელ გურით“ მიჸორდან და დო ჯიმალეფ (1 პეტ. 4:8; რომ. 12:10). თენა თიცალ ჸოროფა რე, ნამუთ ოჯახიშ წევრიშ დო ხოლოშიან მეგობარიშ მიმართ მიღუნა.

3. მუ რე საჭირო ჸოროფაშ გამანგარებელო?

³ ჸოროფა ყვავილს მოგენს – მირდას დო გოფალასინ ქუგოკონ-და, ირიათო ოკო მიკულუე. იეჰოვას ოკო, ნამდა ირო იმამნგარენდათ შხვეფიშ ჸოროფას. მაგალთო, მოციქულ პავლექ ქრისტიანეფს ელუჩ: „ვადინუათ ჯიმალურ ჸოროფა“ (ებრ. 13:1). თე სტატიას გუვარჩიენთ, მუშენ ოკო დევეახლოვათ ჩქინ თანაქრისტიანეფს უმოსო დო მუჭო შემლებუნა თეშ კეთება.

ᲛᲣᲨᲔᲜ ᲝᲙᲝ ᲓᲔᲕᲔᲐᲮᲚᲝᲕᲐᲗ ᲣᲛᲝᲡᲝ ᲐᲠᲗᲘᲐᲜᲡ?

4. მუ ოკო ვაკეთათ, ნამდა ართობას, ნამუთ კრებას მიღუნა, ჩქინ თოლს ფასიქ ვა უდინას? (ფსალმ. 133:1; ქოძირით სურათეფ).

⁴ წეკითხით ფსალმუნეფიშ 133:1. მუშო ოკო რაგად, ჩქი ხოლო ფსალმუნმაბირეცალო ფიფქრენთ, ნამდგაქ თქუ, ნამდა „ჯგირ“ დო „ჰამო“ რე თინეფწკუმა მეგობრობა, მიდგას იეჰოვა უჸორს. მარა მინშა თეშ ხვადუ, ნამდა მუდგარენ სქვამს, მუთ მანგარო მოპწონა, ირდღას ქუვორწყეთ-და, თოლ მიარჩქვანუ დო ჩვეულებრივ მუდგარენო გინირთუ. თეშნერო, რახანს და დო ჯიმალეფს, ხშირას, მარაშე მუსხირენშა ვორწყეთ დო თინეფშე ჸოროფას ბგინაფლენთ, შილებე თე ირფელს თეშ ქიმვარჩქვანათ, ნამდა ჩქინ თოლს ფასიქ მეუდინას დო ჩვეულებრივ მუდგარენო გინირთას თი ართობაქ, ნამუთ საჯიმალოს მიღუნა. მუ ოკო ვაკეთათ, ნამდა თაშ ვა მოხვადას? თანაქრისტიანეფიშ ჸოროფაქ უმოსო გემემანგარანინ, ოკო დეფიფქრათ, მუ ძვირფას რე თითოულ ქოთ კრებაშო დო ქოთ ჩქინო.

5. მუჭო მოქმედენს შხვეფშა თი ჸოროფაშ ძირაფა, ნამუთ ართიან შქას მიღუნა?

⁵ ბრელშა, მით პირველო ოსწრჷ ჩქინ შეხვალამეფს, მანგარო მოქმედენს თი ჸოროფაშ ძირაფა, ნამუთ ართიან შქას მიღუნა. ნამთინეშო ხვალე თენა რე დასაბაღ თიშა დარწმუნებელო, ნამდა ქიმიოგორუ ჭეშმარიტებას. იესოქ თქუ: „ართიან შქას ჸოროფა ქუგაღვენუნან-და, თეთ ქიგეგენა, ნამდა ჩქიმ მოწაფეეფ რეთჷ“ (იოან. 13:35). გუვარჩუათ ართ ახალგაზრდაშ, ჩიტრაშ, შემთხვევა, მიდგაქ იეჰოვაშ მოწმეეფწკუმა ბიბლიაშ გურაფა ქიდიჭყჷ. რეგიონულ კონგრესიშ პირველ დღაშ დასწრებაშ უკულ, თიქ მუშ ბიბლიაშ მასწავლებერს უწუ: „დიაჩქიმს დო მუაჩქიმს დღას ვა უხუტოლუნა ჩქიმდა, მარა თაქ, დღაშ დინახალე, 52-შა მახუტოლეს. იეჰოვაქ თე ხალხიშ საშვალებათ მუშ ჸოროფა ქუმოძირუ. მა ხოლო მოკო, თე დიდ ოჯახიშ ნაწილ ვორდე“. ჩიტრაქ სულიერო წიმი მიდართჷ დო 2024 წანას დინათ. თაშ ნამდა, ხშირას, კრებაშა ახალმოულირეფს იეჰოვაშ მსახურებას ჩქინ ჯგირ საქმეეფ დო თი ჸოროფაშ ძირაფა გინაჭყვიდირაფუანს, ნამუთ ართიან შქას მიღუნა (მათ. 5:16).

6. მუჭო ფთხილანა თანაქრისტიანეფწკუმა ხოლოშიან ურთიერთობა?

⁶ და დო ჯიმალეფწკუმა ხოლოშიან ურთიერთობა ფთხილანა. მოციქულ პავლექ თანაქრისტიანეფს თეცალ სიტყვეფ უწუ: „ირდღას გურშა ელუკინით ართიანს, . . მუშენდა ცოდაშ ძალაქ, ნამუთ ოჩილითუანს კოჩის, აჯამეფო ვეგნგოშქვან“ (ებრ. 3:13). გურქ თეშ გომტირხეს, ნამდა ჭიე-ჭიეთ ჭეშმარიტებაშ შარაშ გინორთა ქიდიპჭყით-და, იეჰოვაქ შილებე ჩქინდა გურიშ ელაკინალო დო მახვარებელო დაკვირებულ თანაქრისტიან გეგმირინუას (ფსალმ. 73:2, 17, 23). თეცალ მოხვარას სინამდვილეს ჯგირობუა მოუღ ჩქინდა.

7. მუჭო უნწყუნს ჸოროფა ხეს ართობას? (კოლ. 3:13, 14).

⁷ ჩქი თიცალ ოჯახიშ ნაწილ ვორეთ, სოდეთ თითოულ ირნერო ოცად, ნამდა ჸოროფა ქაძირუას ართმაჟიას, მუდგაშ გურშენ ქიანაშ კურთხევას ბღებულენთ (1 იოან. 4:11). მაგალთო, ჸოროფა მოხვარუნა, მუთვინათ ართიანს, მუდგაშ ჭყოლოფათ, ჩქინ საჯიმალოს ართობა მიღუნა (წეკითხით კოლოსელეფიშ 3:13, 14; ეფეს. 4:2–6). თე ართობაშ შედეგო, ჩქინ შეხვალამეფს თიცალ სასიამოვნო გარემო მიღუნა, ნამუთ მთელ მსოფლიოს სოთინ ვა რე.

ᲒᲔᲒᲛᲘᲠᲩᲥᲘᲜᲘᲗ ᲞᲐᲢᲘᲪᲔᲛᲐ ᲐᲠᲗᲘᲐᲜᲘᲨ ᲛᲘᲛᲐᲠᲗ

8. მუჭო მოხვარუნა იეჰოვა, ართობა მიღუდან და დო ჯიმალეფწკუმა?

⁸ იეჰოვაშ ჭყოლოფა რე, ნამდა ჩქინ არასრულყოფილებაშ უმკუჯინუო, მსოფლიო საჯიმალოს სარკო ართობა მიღუნა (1 კორ. 12:25). მუჭოთ ბიბლიას ჭარჷ, „ღორონთიქ დუმოგურუეს ართიანიშ ჸოროფა“ (1 თეს. 4:9). შხვანერო ქოფქთუათინ, ბიბლიაშ საშვალებათ იეჰოვა კონკრეტულო მირაგადუნა, მუ ოკო ვაკეთათ, ნამდა დევეახლოვათ ართიანს. ღორონთიშ სიტყვაშ გურგედვალირო გიმორკვიებათ დო ნაგურეფუშ ცხოვრებას გიმორნაფათ, საშვალება მერზიებუნა, იეჰოვაქ ქუდმოგურუან (ებრ. 4:12; იაკ. 1:25). ზუსტას თეშ კეთებას ვოცადუთ ღორონთიშ თითოულ მსახურ.

9. მუს ბგურაფლენთ რომაელეფიშ 12:9–13-შე პატიცემაშ გიმორჩქინაწკუმა დაკავშირებით?

⁹ მუჭო მოგურუანა ღორონთიშ სიტყვა, მუ ოკო ვაკეთათ ართიანწკუმა დაახლოებერო? გუვარჩუათ, მუ თქუ პავლე მოციქულქ თე საკითხწკუმა დაკავშირებით რომაელეფიშ 12:9–13-ს (წეკითხით). განსაკუთრებულ ყურადღება ქიმიაქცით მოციქულიშ თე სიტყვეფს: „პატიცემა ართიანს ქუჭიშეთ“. მუს ნიშნენს თენა? პირველ ნაბიჯ ჩქი ოკო გინობდგათ, ნამდა შხვეფს ჸოროფა ქუვოძირუათ თიცალ ჯგირ საქმეეფით, მუნერით რე პატიება, სტუმარიშ ჸოროფაშ გიმორჩქინა დო გურხვეობა (ეფეს. 4:32). ხეჭკურეთ ოკო ვა ვორდათ დო ვებჯინათ, მუჟამ გინოდგუნს ჩქინ და ვარდა ჯიმა ნაბიჯის, ნამდა დემეახლოვან. მუჭოთ პავლექ თქუ, ჩქი ოკო „უჭიშუათ“ თეშ კეთება. თაშ ქიმიფქციებუთ-და, ჩქინ დუდშა გეგმოფცადუნთ იესოშ სიტყვეფს: „შხვაშა ჯგირიშ კეთებას უმოს ბედნერობა მოუღ, ვინემ თის, ნამდა აშო გიკეთენა ჯგირს“ (საქ. 20:35).

10. მუჭო შემლებუნა ვოძირუათ, ნამდა მოხანდეეფ ვორეთ, მუჟამსით საქმე ოხუ ართიანიშ მიმართ პატიცემაშ გიმორჩქინას? (ქოძირით სურათ).

¹⁰ საინტერესო რე, ნამდა თიშ უკულ, მუთ პავლე იჩიებ პატიცემა ართიანს ქუჭიშეთია, გეუჸუნუანს: „რდათჷ მოხანდეეფ დო ვართ ხოლო ზარმაცეფ“. მოხანდე პიროვნება გურგედვალირ დო მონდომებულ რე დო მუჟამსით მუდგაინს ქუდავალენა, შურ დო გურს ინოდვანს საქმეს. იგავეფიშ 3:27, 28 ელამჩანა: „ვარია ვა თქუა თიშა სიკეთეშ კეთებაშენ, მით თეს იმსახურენს, მუჟამსით შეილებ მოხვარა“. თაშ ნამდა, მუჟამსით ვორწყეთ მიდგაინს მოხვარა ოსაჭირუნ, დრო ვემემღუნან თეშ, მუთ შემლებუნან ირფელს ვორთუთ თიშ მახვარებელო დო ვა ფიფქრენთ, ნამდა მიდგაინ შხვა ქიმკაჯინე თე საქმეს (1 იოან. 3:17, 18).

11. მუქ შილებე მიმეხვარან ართიანწკუმა დაახლოებას?

¹¹ ხოლო ართ საშვალება, მუდგათ ართმაჟიაშ მიმართ პატიცემას გიმიბრჩქინანთინ თინა რე, ნამდა ხეთეშე ვაპატიენთ მუჟამსით მოწყინებაფუანა. ეფესოელეფიშ 4:26-ის პკითხულენთ: „ჩხანაქ თეშ ვენორთას, ნამდა კინ გურმულირეფ რდათჷ“. მუშენ ოკო მიფქცუათ თაშ? მუშენდა, მუჭოთ 27-ა მუხლის ჭარჷ, „ვაგვოფალაფუათ“ ეშმაკის. იეჰოვა მუშ სიტყვას ბრელშა ელამჩანა, ნამდა ქუვაპატუათ ართიანს. მაგალთო, კოლოსელეფიშ 3:13-ს პკითხულენთ: „მთელ გურით ქაპატით ართიანს“. მუჟამსით შხვეფიშ შეცდომეფშა ყურადღება ვეგნომიღუნა დო წყენას იპჭყოლიდუანთ, ხოლო უმოსო ვეახლოებუთ ართიანს. თეშნერო, ვა ვოდინუანთ „წმინდა შურშე მეღებულ ართობას“ დო ართიან შქას მშვიდობა მიღუნა (ეფეს. 4:3). თაშ ნამდა, პატიებათ ხეს უნწყუნთ, ორგანიზაციას მშვიდობა დო ართობა რდასჷ.

12. მუჭო მოხვარუნა იეჰოვა პატიებას?

¹² ალალას ქოფთქუათინ, ვა რე ადვილ, ქუვაპატუათ თის, მიდგაქ მოწყინებაფუეს, მარა თეშ კეთებას ღორონთიშ წმინდა შურ მოხვარუნა. ქიდეკვირით, ნამდა თიშ უკულ, მუთ ელამჩანა, ართიან მთელ გურით გიჸორდან დო მოხანდეეფ რდათია, ბიბლია გეუძინანს: „წმინდა შურქ ქიმერჩან მონდომა“. თენა ნიშნენს, ნამდა ღორონთიშ წმინდა შურს შეულებ მუდგარენიშ კეთებაშ ძალიერ სურვილ გომრჩქინან (რომ. 12:11). თაშ ნამდა, იეჰოვა მუშ ძალათ ქიმმეხვარებუნა, მიჸორდან დო მთელ გურით ქუვაპატუათ ართიანს. ათეშენ, შურ დო გურით ოკო ქოფთხუათ თის, ქიმმეხვარან (ლუკ. 11:13).

„ᲕᲐ ᲠᲓᲐᲗᲷ ᲒᲝᲠᲗᲘᲚᲔᲤ“

13. მუქ შილებე იჸუას ჩქინ შქას გორთუალაშ მიზეზიქ?

¹³ ქრისტიანულ კრებას არძანერ ადამიან რე აკოშაყარელ, ათეშენ მანგარ განსხვავებულეფ ვორეთ ართიანშე (1 ტიმ. 2:3, 4). შედეგო, შილებე შხვადოშხვანერო უჯინედათ თიცალ საკითხეფს, მუნერით რე გარეგნობა, მიკოქუნა, ჯანმრთელობაშე ზრუნვა დო გართობა. ფრთხილას ვეპჸით-და, თეს შილებე ართიან შქას გორთუალაქ ქუმაჸუნას (რომ. 14:4; 1 კორ. 1:10). ჩქი „ღორონთიქ დუმოგურუეს ართიანიშ ჸოროფა“, ათეშენ მუთუნით ოკო ვეგშამირთან თეშ, ნამდა თიცალ საკითხეფს, ნამუთ პირად გინაჭყვიდირალ რე, ჩქინ გადაწყვეტილებეფ შხვეფიშ უჯგუშო მიმორჩქუნა (ფილ. 2:3).

14. მუშ კეთებას ოკო ვოცადუდათ ირიათო დო მუშენ?

¹⁴ ართიანს ირიათო გურშა ქელუკინანთ დო ქუვამანგარენთ-და, თეშნერო ხოლო შეუნწყუნთ ხეს კრებაშ ართობას (1 თეს. 5:11). ბოლო დროს ორგანიზაციაშა ბრელქ დირთჷ თიცალქ, მით არააქტიურ რდჷ ვარდა ვედიტუეს კრებას. მუშო ოკო რაგად, ჩქი ხიოლით დო ჸოროფათ შეფხვადუთ თინეფს (2 კორ. 2:8). ართ და, ნამდგაქ პირველო მერთჷ კრებაშ შეხვალამაშა თიშ უკულ, მუთ 10 წანას არააქტიურ რდჷ, იჩიებ: „ირკოჩ გოძიცებულ სახეთ შეფხვადუდ დო ხეს გიწომღანდჷ“ (საქ. 3:19). თე და დო ჯიმალეფს ართ მეჯინათ მუთუნ სასწაულ ვა უკეთებუნა, მარა მუჭო იმოქმედ თე ირფელქ თე დაშა? თინა აგრძელენს: „დუდის თეშ ბგინაფლენდჷ, ითამ იეჰოვას ხე მოუთხუდ ჩქიმდა დო მოხვარუდ, კინ დიბრთინეკო თი ხიოლ, ნამუთ ჯვეშო მიღუდ“. მუჟამსით მზათ ვორეთ შხვეფშა გურიშ ელაკინალო, იესოს საშვალებას ვარზენთ, გეგმომრინუან თინეფიშ ჭყანაშა მაჸუნაფალო, „მით გინოშულადირეფ რენა დო . . . მონკა ოღალ მეუღუნა“ (მათ. 11:28, 29).

15. ხოლო მუჭო შემლებუნა ხე შეუნწყუათ ართობას? (ქოძირით სურათ).

¹⁵ ხოლო ართ საშვალება, მუდგათ ართობას უნწყუნთ ხეს, ჩქინ ჩიება რე. ქიმიპჸუნათ თეცალ მაგალით: ჯგირ მზარეულ, ონდო ოჭკუმალს ხალხის მიკუღანს, დიო მუ ასინჯენს, გეგშურთჷ დო ვარ გემუანქ. თეშნერო, ჩქი ხოლო, ონდო ჩიებას დიპჭყანთ, ჯგირო ოკო ქუგუჩათ გურ, მუშ რაგად მილამუნა (ფსალმ. 141:3). ჩქინ მიზან ირიათო თინა ოკო რდასჷ, ნამდა, მუდგას ფთქუანთ, შხვეფშა ძალეფიშ მიმაჩამალქ, გურიშ ემაკინალქ დო ჯგირობუაშ მუმაღალარქ ქიჸუას (ეფეს. 4:29).

16. განსაკუთრებულო მიქ ოკო გოუჩას გურ, მუს მუჭო იჩიებ?

¹⁶ განსაკუთრებულო ქომონჯეფქ დო მშობლეფქ ოკო გოუჩან გურ, ქორენ დო ვარ მუნეფიშ ჩიება გურიშ ემაკინალ (კოლ. 3:19, 21; ტიტ. 2:4). უხუცესეფს ხოლო ირიათო ოკო შუდან, ნამდა თინეფიშ ჩიებაქ ოკო გამანგარას დო ჭყანაშა მიჸონას იეჰოვაშ შხურ, ნამდგაშ ჭყიშეფო რენა გერინაფილ (ეს. 32:1, 2; გალ. 6:1). ბიბლიაშ წიგნ „იგავეფს“ პკითხულენთ: „მუ ჯგირ რე მუშ დროს რაგადებულ სიტყვა!“ (იგავ. 15:23).

ᲒᲘᲸᲝᲠᲓᲐᲜ ᲐᲠᲗᲘᲐᲜ „ᲡᲐᲥᲛᲔᲗ ᲓᲝ ᲐᲚᲐᲚᲐᲡ“

17. მუჭო შემლებუნა ვოძირუათ, ნამდა და დო ჯიმალეფ ალალას მიჸორა?

¹⁷ მოციქულ იოანე ელამჩანა, ნამდა ართიან „სიტყვათ დო ნინათ ვარინ, საქმეთ დო ალალას“ მიჸორდან (1 იოან. 3:18). მოკონა, და დო ჯიმალეფიშ მიმართ ჸოროფა გურშე მიშას. მუჭო შემლებუნა თეცალ ჸოროფაშ გავითარება? მუთ უმოს დროს გეგმურთუნთ და დო ჯიმალეფწკუმა ურთიერთობას, თით უმოსო დევეახლოებუთ თინეფს დო ქოთ უმოსო ქიმეჸოროფებუნა. ათეშენ, გორით საშვალება, ნამდა ურთიერთობაქ ქუგაღვენუან თანაქრისტიანეფწკუმა, მაგალთო, კრებას ვარდა მსახურებას. დრო გეგშეჸოთით დო ქიმიაკითხეთ შხვეფს. თაშ ქიმიქციებუთ-და, ქაძირანთ, ნამდა „ღორონთიქ გოგურუეს ართიანიშ ჸოროფა“ (1 თეს. 4:9). თეშნერო, ჩქინ დუდშა გეგმოფცადუნთ „ფსალმუნეფს“ ინოჭარილ სიტყვეფს: „მუ ჯგირ რე დო მუ ჰამო, მუჟამსით ჯიმალეფ გემუანო ცხოვრენა ართო!“ (ფსალმ. 133:1).