ᲒᲐᲙᲕᲔᲗᲘᲚ 5
ნოეშ კიდობან
დროშ მიკულაწკუმა ართო დედამიწას ადამიანეფიშ რიცხვიქ მიძინ. თინეფიშ უმენტაშ გლახა რდჷ. ინა ვარ, ნამთინე ანგელოზიქ ხოლო გლახა პიროვნებათ გინირთჷ. თინეფქ მუნეფიშ ოცხოვრებელ ქიდიტუეს დო ზეცაშე დედამიწაშა გიმილეს. ქოიჩქუნო, მუშენ აკეთეს თენა? თინეფს ოკოდეს ადამიანეფო გინირთესკო დო ოსურეფ ქიმიჸუნესკო.
თე ანგელოზეფს მუნეფიშ ოსურეფშე ქომოლსქუალეფქ ქაშუეს. თინეფ მანგარ ძალიერეფ ირდუდეს, უბადოეფ რდესჷ დო შხვეფს გლახათ ოქცუდეს. იეჰოვა ვა დუშვენდჷ, თე ირფელქ თაშ გეგრძელუკო. ათეშენ გეგნოჭყვიდ, უბადო ადამიანეფ დიდწყარალათ მოსპუკო.
მარა თიმ დროს ცხოვრენდჷ ართ კოჩ, ნოე, ნამუთ თინეფს ვა გუდჷ. თის უჸორდჷ იეჰოვა. ნოეს ოსურ დო სუმ ქომოლსქუა ჸუნდჷ – სემ, ქამ დო იაფეთ; სუმხოლო ქომოლსქუა ოსურამ რდჷ. იეჰოვაქ ნოეს დავალ, გეიაშენუკო დიდ კიდობან, ნამდა თიქ დო თიშ ოჯახიქ დიდწყარალას გინუსქიდესკო. კიდობან ქიანაშმადიდა ყუთცალ რე, ნამუთ წყარს ვენწყუ. იეჰოვაქ ნოეს უწუ, კიდობანშა ცხოველეფ დო ფრინველეფ ხოლო გემნიჸუნუკო, ნამდა თინეფქ ხოლო გეგნასქიდესკო.
ნოექ ხეთეშე ქიდიჭყჷ კიდობანიშ შენება. თინა კიდობანს მუშ ოჯახწკუმა ართო სოდგარენ 50 წანას აშენენდჷ. თინეფქ ზუსტას თეშ აშენეს კიდობან, მუჭოთ იეჰოვაქ უწუ. კიდობანიშ შენებაწკუმა ართო ნოე ხალხის ხოლო აფრთხილენდჷ, ნამდა დიდწყარალა იჸუაფუდ. მარა თის მითინქ ვა ურჩქილ.
ბოლოს, ქუდოდირთჷ კიდობანშა მინულაშ დროქ. მორთ ქიგებგათ, მუქ მოხვად თეშ უკულ.
„მუჭოთ ნოეშ დროს რდჷ, თეშ იჸუაფ თიმწკუმა ხოლო, მუჟამსით კოჩიშ სქუა ქუმურს“ (მათე 24:37).