ᲒᲐᲙᲕᲔᲗᲘᲚ 6
დიდწყარალას ბრუო კოჩიქ გინუსქიდ
ნოექ მუშ ოჯახწკუმა ართო კიდობანშა გემნორთჷ დო ცხოველეფ დო ფრინველეფ ხოლო გემნიჸუნ. იეჰოვაქ კიდობანიშ კარ დოკილუ დო ჭვემაქ ხოლო ქიგიაშქვჷ. თიზმა ჭვემჷ, ნამდა კიდობანქ წყარს ფაფაფ ქიდიჭყჷ. საბოლათ, დედამიწაქ წყარით დიფორ. არძა გლახა ადამიანქ, მიდგაქ კიდობანშა ვემნორთჷ, დოღურ, მარა ნოე დო მუშ ოჯახ კიდობანს თხილერო რდესჷ. წერმიდგინ, მუ ბედნერეფ იჸუაფუდეს, იეჰოვას დემორჩილესინ!
40 დღას დო სერს გიმანტირეთ ჭვენდჷ. უკულ ჭვემაქ გეგნიღ დო წყარქ ხოლო ჭიე-ჭიეთ რკება ქიდიჭყჷ. ბოლოს კიდობანქ გვალას ქიგეჩერდჷ, მარა ნოეს დო მუშ ოჯახის თევრეშე ვეგმართედ, მუშენდა წყარ ირდიხას დიო ხოლო მაღალას გერდჷ.
წყარქ ჭიე-ჭიეთ ქიგესქირ. ნოე დო მუშ ოჯახ კიდობანს ართ წანაშე მეტის ქორდეს. თეშ უკულ იეჰოვაქ უწუ თინეფს, ნამდა შეულებუდეს კიდობანშე გიმულა უბადობაშე გასუფთებულ ქიანაშა. ნოე დო მუშ ოჯახ მანგარ მარდულეფ რდესჷ, ნამდა იეჰოვაქ გინატუ თინეფ. მარდულობა თით ოძირუეს, ნამდა მსხვერპლ შეწირეს თის.
იეჰოვას მანგარო ახიოლ თე მსხვერპლიქ. თიქ პირობა დოდვჷ, ნამდა დიდწყარალათ დედამიწას დღას მუთუნს ვა მოსპუნდ. თე პირობაშ ნიშანო იეჰოვაქ ცაშორტყაფ გემკარჩქინ. ქუგაფუნო ნაძირეფ ცაშორტყაფ?
ბოლოს იეჰოვაქ ნოეს დო თიშ ოჯახის უწუ, ნამდა გეიორჩქინესკო სქუალეფ დო გეიოფშესკო დედამიწა.
„სოიშახ ნოე კიდობანშა მინიშ, . . [ადამიანეფს] მუთუნ ვანარღუდეს, ონდო დიდწყარალაქ ვა მორთჷ დო არძა ვა მოსპჷ“ (მათე 24:38, 39).