მშვიდობა მუჭო შემლებნა თიშ მეღება?
ჩქი პრობლემეფით ეფშა მსოფლიოს ფცხოვრენთ დო ათეშენ მანგარო ოკო მიმდომათ მიღდან მშვიდობა. შილებე მშვიდობა მიღნა, მარა ოკო ვეცადათ, ნამდა ვა ვოდინუათ თინა. მუს იჩიებ ღორონთიშ სიტყვა თიშ გურშენ, მუ მიმეხვარებნა მიღდან მშვიდობა? თეს გეძინელ, მუჭო შემლებნა შხვეფს მივეხვარათ თეშ კეთებას?
მუ რე საჭირო, ნამდა მიღდან მშვიდობა?
ნამდვილ მშვიდობა ხვალე თი დროს მაღვენუნა, მუჟამსით ემოციურო მშვიდას ვორეთ დო დუც უსაფრთხოთ ბგინაფლენთ. თეს გეძინელ, შხვეფწკუმა ხოლო მეგობრულ ურთიერთობა ოკო მიღდან. ნამდვილ მშვიდობას ქობგორუნთ-და, არძაშ უმოს მნიშვნელოვან რე, ღორონთწკუმა ხოლოშიან ურთიერთობა მიღდან. მუჭო შემლებნა თეშ კეთება?
პრობლემეფ მშვიდობას მიდმამღანა
მუჟამსით იეჰოვაშ სამართლიან პრინციპეფს დო კანონეფს ვომორჩილუთინ, თეთ ვოძირანთ, ნამდა ვონდუთ თის დო მოკონა თიწკუმა მშვიდობიან ურთიერთობა მიღდან (იერ. 17:7, 8; იაკ. 2:22, 23). თეშ პასუხო, იეჰოვა უმოს ხოლოს იჸუაფ ჩქინწკუმა დო შინაგან სიმშვიდეთ მაკურთხენა. ესაიაშ 32:17-ის ინოჭარ: „მშვიდობას ჭეშმარიტ სიმართლე მიღანს, მარადიულ სიმშვიდე დო უსაფრთხოება იჸუაფ ჭეშმარიტ სიმართლეშ ნაყოფ მარადიულო“. შინაგან სიმშვიდე თიმწკუმა მაღვენუნა, მუჟამსით იეჰოვას მთელ გურით დევემორჩილებუთ (ეს. 48:18, 19).
მარადიულ მშვიდობაშ მეღებას მოხვარნა ჩქინ ზეციერ მუმაშ ძვირფას ძღვინ — წმინდა შური (საქ. 9:31).
ღორონთიშ შურ მოხვარნა მშვიდობაშ მეღებას
პავლე მოციქულ მშვიდობას „შურიშ ნაყოფიშ“ მასმა მხარეთ მიშინუანს (გალ. 5:22, 23). ნამდვილ მშვიდობას ღორონთიშ შურ მარზენა დო ათეშენ საჭირო რე დევემორჩილათ თის. მორთ, გუვარჩუათ ნამ ჟირ საშვალებათ მოხვარნა ღორონთიშ შურ მიღდან მშვიდობა.
პირველ, მშვიდობა მაღვენუნა, მუჟამსით რეგულარულო ქიპკითხენთ ღორონთიშ სიტყვას (ფსალმ. 1:2, 3). ბიბლიურ საკითხეფშე ფიქრიშ დროს ღორონთიშ შურ მიმეხვარებნა ქიგებგათ მუს ფიქრენს იეჰოვა შხვადოშხვა საკითხეფიშ გურშენ. მაგალთო, შემლებნა ბძირათ მუჭო ინარჩუნენს იეჰოვა სიმშვიდეს დო მუშენ რე თიშო თე თვისება მნიშვნელოვან. მუჟამსით ღორონთიშ სიტყვაშე გაგებულ თე გაკვეთილეფს ცხოვრებას გიმიბრინუანთინ, უმოსო მაღვენუნა მშვიდობა (იგავ. 3:1, 2).
მაჟია, ჩქი ოკო იბლოცათ, ნამდა მიღდან ღორონთიშ შური (ლუკ. 11:13). იეჰოვა პირობას ირზენს, ნამდა თის მოხვარას ქოთხინთ-და, „ღორონთიშ მშვიდობა, ნამუთ ირნერ აზრიშე უმოს რენ, დოთხილანს თქვან გურეფს“ (ფილ. 4:6, 7). მუჟამსით ირიათო ბლოცულენთ დო იეჰოვას წმინდა შურს ფთხულენთინ, თინა შინაგან სიმშვიდეს მარზენა, ნამუთ ხვალე თინეფს უღჷ, მით ხოლოს რე ღორონთწკუმა (რომ. 15:13).
მორთ, ქობძირათ მუჭო გიმირინუ ნამთინექ თე ბიბლიურ რჩევა დო მუ ცვლილებეფ აკეთეს, ნამდა მშვიდობა ქუღდესკო იეჰოვაწკუმა, შხვეფწკუმა დო მუნეფიშ დუდწკუმა ხოლო.
თინეფქ დოგორეს მარადიულ მშვიდობა
ქრისტიანულ კრებას რენა თიცალ და დო ჯიმალეფ, ნამუთ ართ დროს ხეთეშე ირისხებდეს, მარა ამდღა ყურადღებიანობას, სიჯგირას, მოთვინებას დო მშვიდობას გიმირჩქინანა შხვეფწკუმა ურთიერთობაშ დროსa (იგავ. 29:22). მორთ, ქობძირათ ჟირ პიროვნებაშ მაგალით, ნამუთიქ გიორჯგინეს გარისხებას დო ასე შხვეფწკუმა მშვიდობიანო რენა.
ღორონთიშ პრინციპეფიშ გიმორნაფა დო წმინდა შურიშ გურშენ ლოცვა მიმეხვარებნა მშვიდობაშ გორუას
დეივიდიშ გლახა ხასიათ თიშ ჩიებაშე იძირედ. სოიშახ იეჰოვას დუც მეუძღვინენდკონ, შხვეფს კრიტიკულო უჯინედ დო ოჯახიშ წევრეფწკუმა უხეშო იჩიებუდ. დრო ხანიშ მიკულაშ უკულ დეივიდიქ ქოძირ, ნამდა საჭირო რდუ დოთირედკო დო მშვიდობიან პიროვნებათ გინორთედკო. მუქ მეხვარ თის თე ცვლილებაშ კეთებას? თინა იჩიებ: „ქიდიპჭყჷ ბიბლიურ პრინციპეფიშ ცხოვრებას გიმორნაფა, თეშ შედეგო, ოჯახიშ წევრეფ ართიანწკუმა უმოს პატიცემას გიმიფრჩქინანთ“.
რეიჩელს რთულ ცხოვრება აფჷ მიკნაულა დო თექ ხასიათწკუმა ხოლო ქიმოქმედ. თინა იჩიებ: „თიცალ ოჯახის იბრდუდ, სოდეთ არძა ხეთეშე ირისხებუდ დო ათეშენ, თე თვისება ამდღა ხოლო გუმოშინანს დუც“. მუქ მეხვარ თის ჸოფედკო უმოს მშვიდობიან? თინა პასუხენს: „იეჰოვას ლოცვათ ირიათო ფთხულენდჷ მოხვარას“.
დევიდ დო რეიჩელიშ მაგალით, ხვალე ჟირ რე თი მაგალითეფ შკას, ნამდგაშე იძირე, ნამდა მუჟამსით ბიბლიურ პრინციპეფს გიმიბრინუანთ დო ღორონც წმინდა შურს ფთხულენთინ, მშვიდობა მაღვენუნა. თიშ უმკუჯინუო, ნამდა უბადობაშ ეფშა ქიანას ფცხოვრენთინ, შემლებნა მიღდან შინაგან სიმშვიდე, ნამუთ ხეს უნწყუნს მშვიდობიან ურთიერთობას, მუჭოთ ოჯახიშ წევრეფწკუმა, თეშ თანაქრისტიანეფწკუმა ხოლო. ბიბლიაშ საშვალებათ იეჰოვა თეცალ რჩევას მარზენა: „მშვიდობიანო რდათ არძაწკუმა“ (რომ. 12:18). ქორენო თენა დასურო შეიოლებერ დო მუ ჯგირობუა მოუღჷ თეს?
ვეცადათ შხვეფწკუმა მშვიდობიანო ვორდათ
ჩქინ ქადაქებათ ხალხის საშვალებას ვარზენთ, ნამდა სარგებელ მიღან მშვიდობაშ მუმაღალ ცნობაშე (ეს. 9:6, 7; მათ. 24:14). საბედნეროთ, ბრელქ ქიმირჩქილუ თე ცნობა. თიშ უმკუჯინუო, ნამდა მსოფლიოს უბადობას ორწყენან, ჭეშმარიტება მირჩქილუნ თი ხალხ ვერისხებ დო უიმენდობას ვენმოლუ. თინეფს მომავალიშ ნამდვილ იმენდ უღნა დო ოკონა „მშვიდობა გორან დო თიშა ინჭუან“ (ფსალმ. 34:14).
მარა ჩქინ ქადაქებას არძა ხეთეშე ვემირჩქილუანს (იოან. 3:19). თეშ უმკუჯინუო, ღორონთიშ შურიშ მოხვარათ სახიოლო ამბე თინეფს მშვიდობიანო დო დიდ პატიცემათ ოკო გინოფჩათ. თეგვარო მეპჸუნთ მათეშ 10:11—13-ს ინოჭარილ იესოშ რჩევას, ნამუთ თიქ ქადაქებაშ გურშენ თქუ: „ჸუდეშა მინულაშ დროს ჯგირობუა ქუზალით ოჯახის დო ოჯახ მშვიდობაშ ღირს ქორენ-და, მშვიდობაქ, ნამუთ თქვა უზალითინ, ქიმიაჩას თის, მარა ღირს ვა რენ-და, თქვან მშვიდობაქ თქვა დუგართან“. მუჟამსით იესოშ რჩევას მეპჸუნთინ, მშვიდობას ვუნწყუნთ ხეს დო იმენდ მაღვენუნა, ნამდა თე პიროვნება შხვა დროს ქიმირჩქილუანს.
მშვიდობას თიმწკუმა ხოლო ვუნწყუნთ ხეს, მუჟამსით პატიცემას გიმიფრჩქინანთ მთავრობაშ წარმომადგენელეფწკუმა დო თიცალ თანამდებობაშ ხალხწკუმა ხოლო, ნამუთ შილებე ჩქინ საქმიანობაშ წინააღმდეგ რდას. მაგალთო, ართ აფრიკულ ქიანაშ მთავრობაშ წარმომადგენელს არასწორ წარმოდგენა უღუდ ჩქინ გურშენ. ათეშენ თიქ სამეფო დარბაზეფიშ შენებაშ ნება ვემეჩ იეჰოვაშ მოწმეეფს. თე საკითხი მშვიდობიანო გეგნუჭკირდესკონ თიშენ, ართ ჯიმას, ნამუთ ჯვეშო თე ქიანას მისიონერო მსახურენდუნ, ქუდავალეს ქეშეხვადკო თე აფრიკულ ქიანაშ უმაღლეს კომისარს, ნამუთ ლონდონს (ინგლისი) რდუ. თე ჯიმა მთავრობაშ წარმომადგენელშა თიშ ორაგადშა მიშჷ, ნამდა იეჰოვაშ მოწმეეფ თიშ ქიანას მშვიდობიან საქმეს ორთუდეს. მუქ მაჸუნ თე ირფელს?
თე ჯიმა იშინანს: „მუჟამსით მიმღებშა ქიმეფრთინ, თექ მიკოხედუნ თი ოსურკოჩიშ ბარგიქ ხელათ ქიმმოხვამლუ, ნამდა თინა ართ-ართ აფრიკულ ტომშე რდუ, ნამდგაშ ნინას მა ბგურაფლენდჷ. ათეშენ თის მუშ ნინაშა მივესალმი. ოსურკოჩის მანგარო გუკვირდჷ დო პკითხ მუ საქმეშა ვორდ მოულირ. მა ზრდილობიანო ვუწი თის, ნამდა უმაღლეს კომისარიშ ძირაფა მოკოდ. თიქ ხელათ ტელეფონით დოურეკ უნჩაშის დო მუჟამსით თე კოჩიქ გეგმორთუნ, მუშ ნინაშა მიმესალმჷ. თეშ უკულ ყურადღებათ მირჩქილედ, მუჟამსით იეჰოვაშ მოწმეეფიშ მშვიდობიან საქმიანობაშ გურშენ ვეჩიებუდ“.
თე ჯიმაქ პატიცემა გეგმირჩქინ დო გეუნწყჷ უმაღლეს კომისარს ჩქინ საქმიანობაშ გურშენ. შედეგო, თე კოჩიქ ჩქინ გურშენ ბრელ არასწორ აზრი დოთირუ. დრო ხანიშ უკულ თე აფრიკულ ქიანაშ მთავრობაქ დოთირუ მუშ გადაწყვეტილება დო დარბაზეფიშ შენებაშ ნება ქიმეჩ მოწმეეფს. ჯიმალეფს მანგარო ელუკინ გურშა თეცალ ცვლილებაქ. დასურო, შხვეფწკუმა პატიცემაშ გიმორჩქინას ჯგირ შედეგეფ მაჸუნუ დო თენა მშვიდობას ხოლო შეუნწყუნს ხეს.
მარადიულო გეხარით მშვიდობათ
ამდღა იეჰოვაშ ხალხ სულიერ სამოთხეს ცხოვრენს დო ართიან შქას მშვიდობა უღნა. მუჟამსით წმინდა შურიშ თე მხარეს გუვავითარენთინ, ხეს შევუნწყუნთ მშვიდობას. მუთ არძაშ უმოს მნიშვნელოვან რენ, იეჰოვაშ მოწონებას მიბღენთ დო მარადიულო გებხარენთ მშვიდობათ ღორონთიშ ახალ ქიანას (2 პეტ. 3:13, 14).
a ხოლო ართ თვისება სიჯგირა, გარჩიებულ იჸუაფ უკულიან სტატიას, ნამუთ მიშურს თი სტატიეფიშ სერიაშა, სოდეთ ღორონთიშ შურიშ ნაყოფიშ გურშენ მეურს ჩიება.