მიაჸუნით ართგურ ანგელოზეფიშ მაგალითის

1, 2. ა) მუთ ვორეთ განსხვავებულ ანგელოზეფშე? ბ) მუ საერთო მიღუნა ჩქი დო ანგელოზეფს?

ᲛᲣᲟᲐᲛᲡᲘᲗ იეჰოვაქ ჭეშმარიტება გუმოგებაფუეს, მუშ თაყვანიშმცემელეფიშ ჸოროფათ ეფშა ოჯახშა ქუმომიჸონეს, ნამდგაშა მსოფლიოშ შხვადოშხვა კუნთხუს მახორუ ანაყუ და დო ჯიმა დო მილიონობით ღორონთიშ ართგურ ანგელოზ მიშურს (დან. 7:9, 10). ხშირას, მუჟამსით ანგელოზეფშე ფიფქრენთ, უმოსო თინა მუმალენა გონებაშა, მუთ რენა თინეფ განსხვავებულ ჩქინდე. მაგალთო, თინეფ ჩქინ გოჭყაფაშახ ბრელ ხანით უმოს ადრე არსებენდეს (იობ. 38:4, 7). თეწკუმა ართო, ანგელოზეფ ბრელით უმოს ძალიერეფ რენა ჩქინდე. თე სულიერ ქმნილებეფ ღორონთიშ თოლს თიცალ წმინდეფ დო მართალეფ რენა, მუნერით ჩქი მუთუნით ვეშემლებუნა ქუვორდათ, მუშენდა არასრულყოფილეფ ვორეთ (ლუკ. 9:26).

² მარა, ბრელ განსხვავებაწკუმა ართო, ქიანაშ საერთო ხოლო მიღუნა ჩქი დო ანგელოზეფს. მაგალთო, ჩქი ხოლო შემლებუნა იეჰოვაშ ძვირფას თვისებეფიშ გიმორჩქინა. ანგელოზეფცალო, ჩქი ხოლო მიღუნა ნებაშ თავისუფლება, ათეშენ შემლებუნა ჩქინით მიბღათ გადაწყვეტილებეფ. ჩქი ხოლო არძას მიღუნა სახელ, შხვადოშხვანერ ხასიათ დო დავალება ღორონთიშ მსახურებას. ანგელოზეფცალო, ჩქინდა ხოლო რე ინოდვალირ გუმაჭყაფალიშ განდიდებაშ მოთხოვნილება (1 პეტ. 1:12).

3. მუშ გურაფა შემლებუნა ანგელოზეფშე?

³ რახანს ქიანაშ საერთო მიღუნა ანგელოზეფწკუმა, ბრელ მუდგარენიშ გურაფა შემლებუნა თინეფშე. თე სტატიას გუვარჩიენთ, მუჭო შემლებუნა მივაჸუნათ თინეფიშ მაგალითის თანდაბლობას, ადამიანეფიშ ჸოროფას, მოთვინებას დო კრებაშ სიწმინდეშ დაცვებას.

ᲐᲜᲒᲔᲚᲝᲖᲔᲤ ᲗᲐᲜᲓᲐᲑᲐᲚᲔᲤ ᲠᲔᲜᲐ

4. ა) მუჭო გიმირჩქინანა ანგელოზეფ თანდაბლობას? ბ) მუშენ რენა თინეფ თეცალ თანდაბალეფ? (ფსალმ. 89:7).

⁴ ანგელოზეფ თანდაბალეფ რენა. მართალ რე, თინეფ მანგარ გამოცდილეფ, ძალიერეფ დო გონიერეფ რენა, მარა იშენით ირო მეჸუნა იეჰოვაშ მითითებეფს (ფსალმ. 103:20). ღორონთშე მეღებულ დავალებეფიშ შესრულებაშ დროს თინეფ დღას ვეცქვანა დუდშა მუნეფიშ საქმეეფიშ გურშენ დო ვართ მუნეფიშ ძალას ირინუანა თიშო, ნამდა ყურადღება მიქცუან. ანგელოზეფ ხიოლით ასრულენა იეჰოვაშ დავალებეფს თიმწკუმა ხოლო, მუჟამსით კოჩ ვა გებულენს თინეფიშ სახელსa (დაბ. 32:24, 29; 2 მეფ. 19:35). თეწკუმა ართო, თე სულიერ ქმნილებეფ დღას ვესქვამუანა დო ვა ღებულენა განდიდებას, მუშენდა თინა ხვალე იეჰოვას ოკუთვნ. მუშენ რენა ანგელოზეფ თეცალ თანდაბალეფ? თინეფს მანგარო უჸორა იეჰოვა დო პატის ცენა თის (წეკითხით ფსალმუნეფიშ 89:7).

5. მუჭო გიმირჩქინ ართ ანგელოზიქ თანდაბლობა მოციქულ იოანეწკუმა? (ქოძირით სურათ).

⁵ ქიგიფშინათ ართ შემთხვევა, სოვრეშეთ ჯგირო იძირე, მუნერ თანდაბალეფ რენა ანგელოზეფ. სოდგარენ ახ. წ. 96 წანას ანგელოზიქ, ნამდგაშ სახელ ვა მიჩქუნა, მოციქულ იოანეს სასწაულ ხილუა ქაძირუ (გამოცხ. 1:1). მუ აკეთ იოანექ თე ხილუაშ ძირაფაშ უკულ? თიქ ანგელოზიშ კუჩხეფწკუმა ქაშანთხჷ, ნამდა თაყვან ქოცუკო თის. მარა ანგელოზიქ ხეთეშე გაჩერ თინა დო უწუ: „მუს ორთუქ?! ვაკეთა თენა! მა ხოლო თიცალ მონა ვორექ, მუნერით სი დო სქან ჯიმალეფ . . . ღორონთის ცი თაყვან!“ (გამოცხ. 19:10). მართალო, მუ თანდაბლურ პასუხ რე! თის ვაკოდ, მუ განადიდესკო, ათეშენ, იოანეს ხეთეშე იეჰოვა ღორონთშა გეგნაღალაფუ ყურადღება. ანგელოზიქ მოციქულს თინა ხოლო ქაძირუ, ნამდა ჟიშე ვა უჯინედ თის. თიქ იოანეს უწუ, მა ხოლო სქანცალ მონა ვორექია, თიშ უმკუჯინუო, ნამდა თიშე ბრელით უმოს ხანს ომსახურუდ იეჰოვას დო ბრელით უმოს ძალიერ რდჷ. თეს გეძინელ, მუჟამსით ანგელოზის იოანეშა შენიშვნაქ აჸუ მიოჩამალქ, ვეგუძახაფ თიშა დო ჸინჩას ვა დურაგადუაფ მოხუცებულ მოციქულშა. მუჭოთ იძირე, თიქ ქიმეხვად, ნამდა იოანეშა მანგარო იმოქმედ ძირაფილქ დო თე ემოციეფიშ გურშენ დიჭყჷ თიშ თაყვანიშცემა. ათეშენ გემუანო უწუ მოციქულს ორაგადე.

6. მუჭო შემლებუნა ანგელოზეფცალო გიმიბრჩქინათ თანდაბლობა?

⁶ მუჭო შემლებუნა ანგელოზეფცალო გიმიბრჩქინათ თანდაბლობა? ჩქინ დავალებეფ თეშ ოკო შევასრულათ, ნამდა ვეფცქუათ დო ჯგირ შედეგეფ ჩქინ დუდშა ვემიპჭარათ (1 კორ. 4:7). თეწკუმა ართო, ოკო ვეფიფქრათ, ნამდა იეჰოვას შხვეფშე უმოს ხანს ქუვომსახურუთ ვარდა მუდგარენ პასუხიშმგებლობეფ ქომღუნან-და, მუდგაინით თინეფშე უმოს ვორეთ. სინამდვილეს, მუთ უმოს პასუხიშმგებლობა მიღუნან, თით უმოს უმნიშვნელოთ ოკო მიმორჩქუდან ჩქინ დუდ (ლუკ. 9:48). ანგელოზეფცალო, ჩქი ხოლო მოკონა, შხვეფიშ მსახურეფ ვორდათ დო ვა ვოცადუთ, მიდგაინს ვოფიქრებაფუათ, ითამ თიშე უჯგუშ ვორეთ.

7. მუჭო შემლებუნა გიმიბრჩქინათ თანდაბლობა, მუჟამსით რჩევა ვარდა შენიშვნა მაფუნა მიოჩამალ მიდგაინშა?

⁷ თანდაბლობა თიმწკუმა ხოლო ოკო გიმიბრჩქინათ, მუჟამსით მიდგაინშა რჩევა ვარდა შენიშვნა მაფუნა მიოჩამალ, იჸუაფუნო თენა თანაქრისტიან დოვარ სქუა. მინშა სიტუაცია ითხინს, რჩევაშ მეჩამაშ დროს პირდაპირეფ ვორდათ, მარა თი ანგელოზცალო, ნამდგაქ გემუანო მეჩჷ შენიშვნა იოანეს, თენა თეშ ოკო ვაკეთათ, ნამდა გურ ვა უწყუნუათ ადამიანს. შხვეფიშ უჯგუშეფ ვორეთინ ვეფიფქრენთ-და, თენა მიმეხვარებუნა, ბიბლიაშა გერსხილ რჩევა პატიცემათ დო ჸოროფათ ქიმეფჩათ შხვეფს (კოლ. 4:6).

ᲐᲜᲒᲔᲚᲝᲖᲔᲤᲡ ᲣᲸᲝᲠᲐ ᲐᲓᲐᲛᲘᲐᲜᲔᲤ

8. ა) მუჭო იძირე ლუკაშ 15:10-შე, ნამდა ანგელოზეფს უჸორა ადამიანეფ? ბ) მუჭო მოხვარუნა ანგელოზეფ ქადაგებაშ დროს? (ქოძირით სურათ).

⁸ ანგელოზეფს არძაართ ვა აფუნა ადამიანეფ დო თეშ ვა რე, ნამდა მუთუნო ვემვორჩქუთ თინეფს. პირიქით, მანგარო ოხიოლუნა, მუჟამსით შემცოდველ ნარღენს დაშებულს, იეჰოვაშ მსახურება მეტებულ აფუდუნ თინა ართუ თის ვარდა მიდგაინ ჭეშმარიტებას გებულენს, ნაბიჯეფს გინოდგუნს დო იეჰოვაშ მსახურებას გინოჭყვიდუნს (წეკითხით ლუკაშ 15:10). ანგელოზეფ ქადაგებაშ საქმეს ხოლო აქტიურო მონაწილენა (გამოცხ. 14:6). მართალ რე, თინეფ ვედირთუნა დო პირდაპირ ვემულა ადამიანეფშა, მარა შილებე ნამდგაინ მაუწყებელ ქიმიჸუნან თიცალ პიროვნებაშა, მიდგას იეჰოვაშ გაჩინებაფა ოკო. მუშო ოკო რაგად, ჩქი დღას ვა მარაგადენა ნამდგაინ კონკრეტულ შემთხვევაშე, ნამდა ანგელოზიშ ხე რდჷ, მიდგარენშა იეჰოვაშ მოწმეეფქ მერთესინ თენა, მუშენდა იეჰოვა შხვა საშვალებეფს ხოლო ირინუანს მუშ მსახურეფს ქუხელმძღვანელასინ, მაგალთო, წმინდა შურს (საქ. 16:6, 7). მარა თინა ანგელოზეფს ხოლო მიხვარუანა ქადაგებაშ დროს. ათეშენ, შემლებუნა დარწმუნებულ ვორდათ, ნამდა, მუჟამსით ბმსახურენთ, თინეფ ჩქინწკუმა რენა (ქოძირით ჩარჩო „თინეფიშ ლოცვეფს პასუხიქ ქიმიაჩ“).b

9. მუჭო შემლებუნა ანგელოზეფცალო მიჸორდან ადამიანეფ?

⁹ მუჭო შემლებუნა ანგელოზეფცალო მიჸორდან ადამიანეფ? მუჟამსით განცხადებას იბრჩქილუაფუთ, ნამდა მიდგაინ კრებაშა დართინუეს, ჩქი ხოლო, ანგელოზეფცალო, მთელ გურით ოკო მოხიოლუდან. ირნერო ოკო ქივეცადათ, ქუვოგინაფუათ თეცალ პიროვნებას, ნამდა მანგარო მიჸორა დო მოხიოლუნა, იეჰოვაშ მსახურებას დართუნ (ლუკ. 15:4–7; 2 კორ. 2:6–8). თეწკუმა ართო, ანგელოზეფცალო, მუთ შემლებუნან ირფელ ოკო გუვაკეთათ ქადაგებაშ საქმეს (ეკლ. 11:6). თეს გეძინელ, ანგელოზეფ ჩქი მოხვარუნა მსახურებაშ დროსინ თეშ, შემლებუნა ჩქი ხოლო ქიმვეხვარათ თანაქრისტიანეფს ქადაგებას. მაგალთო, მსახურებაშა მიდეპჸუნათ ნაკლებო გამოცდილ და დო ჯიმალეფ დო ხანშამიშულირ ვარდა ჯანმრთელობაშ პრობლემა უღუნ ფერ თანაქრისტიან.

10. მუს ბგურაფლენთ სარაშ შემთხვევაშე?

¹⁰ მუ ოკო ვაკეთათ, ჩქინ მდგომარეობაშ გურშენ იეჰოვაშო მოკონან თისხი ვა მაკეთებენან-და? ოკო ქივეცადათ, დობგორათ საშვალება, ნამდა ანგელოზეფწკუმა ქიფთანამშრომლათ ქადაგებაშ საქმეს. დეფიფქრათ ართ ჩქინ ინდოელ დაშ, სარაშ,c შემთხვევაშე. 20 წანას პიონერო მსახურებაშ უკულ თიქ მანგარო დელახ დო გვალო დანჯირალქ აჸუ. ალბათ გასაკვირ ვა რე, ნამდა სარა მანგარ გურგოტახილ იჸიდ. მარა და დო ჯიმალეფიშ მოხვარაშ დო ბიბლიაშ ირიათო კითხირიშ ჭყოლოფათ თიქ დადებით განწყობა დირთინუ. სარაქ ქეცად, თე სიტუაციას ქიმიანწყუკო დო შხვა მეთოდეფით ქიდიჭყუკო ქადაგება. თის წუმოხუნა ხოლო ვეშულებუდ, წერილეფ დოჭარუკონ, ათეშენ ხვალე ტელეფონით ქადაგენდჷ. მიდგაინ დეინტერესებუდუნ, სარა კინ ურეკუნდჷ. უკულ თინეფ შხვეფწკუმა ხოლო აკავშირენდეს, მიდგაქ შილებედ დეინტერესუკო. თიშ მსახურებას ჯგირ შედეგეფქ მაჸუნ. მუსხირენ თუთაშა სარას 70 ბიბლიაშ გურაფა უღუდ. თეზმას ვეიალედუნ თიშენ, თინა შხვეფს ხოლო გინოჩანდჷ ბიბლიაშ გურაფეფს. მაგურაფალეფშე ბრელ ასე კრებაშ შეხვალამეფშა გილურს. წერმიდგინით, მუჭო ოხიოლუდან იჸი ანგელოზეფს სარაცალ და დო ჯიმალეფწკუმა თანამშრომლობა, მით ნამ შეულებუნან ირფელს ორთუნა ქადაგებაშ საქმეს.

ᲐᲜᲒᲔᲚᲝᲖᲔᲤ ᲛᲝᲗᲕᲘᲜᲔᲑᲐᲡ ᲒᲘᲛᲘᲠᲩᲥᲘᲜᲐᲜᲐ

11. მუჭო მარზენა ანგელოზეფ მოთვინებაშ მანგარ ჯგირ მაგალითის?

¹¹ ართგურ ანგელოზეფ მოთვინებაშ მანგარ ჯგირ მაგალითის მარზენა. ანთასობით წანა რე, თინეფ უსამართლობას დო უბადობას უჯინენა. თინეფ ორწყედეს, მუჭო ორთინუეს ოჭიშ ღორონთის სატანა ეშმაკიქ დო უბადო სულიერ ქმნილებეფქ, მიდგაწკუმა ართო ართ დროს იეჰოვას ომსახურუდეს (დაბ. 3:1; 6:1, 2; იუდ. 6). ბიბლიაშე თის ხოლო ბგებულენთ, ნამდა ართშა ანგელოზის გვალო პირდაპირ აჸუ ობრძოლებერქ მანგარ ძალიერ დემონშა (დან. 10:13). თეწკუმა ართო, თე ანგელოზეფ ორწყენა, ნამდა ადამ დო ევაშე მოჸუნაფილ ადამიანეფიშ უმენტაშ ვამსახურ იეჰოვას. თე ირფელიშ უმკუჯინუო, ღორონთიშ ართგურ ანგელოზეფ ხიოლით დო მონდომათ აგრძელენა იეჰოვაშ მსახურებას. თინეფს უჩქუნა, ნამდა მუშ დროს იეჰოვა ირნერ უსამართლობას მოსპუნს.

12. მუ მიმეხვარებუნა მოთვინებაშ გიმორჩქინას?

¹² მუჭო შემლებუნა ანგელოზეფცალო ქიმიფთვინათ? ჩქი ხოლო ქიანაშ უსამართლობას ვორწყეთ, მარა ანგელოზეფცალო ბჯერა, ნამდა მუშ დროს, იეჰოვა მოსპუნს ირნერ უბადობას. ათეშენ, ართგურ ანგელოზეფცალო, ჩქი ხოლო ვოცადუთ, „გურქ ვემიოლან ჯგირიშ კეთებაშა“ (გალ. 6:9). იეჰოვა მოპირუნა, ნამდა ქომუჩანა მოთვინებას (1 კორ. 10:13). ათეშენ, შემლებუნა ქიბლოცათ დო იეჰოვას წმინდა შურ ქოფთხუათ, ნამდგაშ მოქმედებაშ შედეგ რე მოთვინება დო ხიოლ (გალ. 5:22; კოლ. 1:11). მუშ კეთება შეილებუნა წინააღმდეგობეფ ქოიღუნან-და? ბოლოშა მიენდით იეჰოვას დო მუთუნშა ვა გაშქურინან. თინა ირო თქვანწკუმა იჸუაფ დო ძალას ქიმერჩანა (ებრ. 13:6).

ᲐᲜᲒᲔᲚᲝᲖᲔᲤ ᲙᲠᲔᲑᲐᲨ ᲡᲘᲬᲛᲘᲜᲓᲔᲡ ᲣᲜᲬᲧᲣᲜᲐ ᲮᲔᲡ

13. მუ მნიშვნელოვან დავალება უღუნა ანგელოზეფს ბოლო დღალეფს? (მათ. 13:47–49).

¹³ ბოლო დღალეფს იეჰოვას მანგარ მნიშვნელოვან დავალება აფჷ მეჩამილ ანგელოზეფშა (წეკითხით მათეშ 13:47–49). ქადაგებაშ ჭყოლოფათ, მთელ მსოფლიოს მილიონობით ადამიან გიმირჩქინანს ინტერესის სახიოლო ამბეშ მიმართ. თინეფშე ნამთინე გინოდგუნს საჭირო ნაბიჯეფს, ნამდა ჭეშმარიტ ქრისტიანო გინირთას, მარა არძა ვართჷ თეს. ანგელოზეფ „უბადოეფს მართალეფშე გიშართუნა“, მუთ ნიშნენს, ნამდა თინეფშა ქრისტიანულ კრებაშ სიწმინდეშ დაცვება რე დავალებურ. მუშო ოკო რაგად, თენა ვა ნიშნენს, ნამდა თინეფს, მიდგაქ ნაბიჯეფ ვეგნოდგეს დო მიოტუეს იეჰოვაწკუმა ურთიერთობა, დღას ვეშიალებენა კინ ქიგიოდირთან ჭეშმარიტებაშ შარას; ვართ თის ნიშნენს, ნამდა ქრისტიანულ კრებას დღას მუთუნ პრობლემა ვეჸუაფ. მარა ართ მუდგარენ ზუსტას მიჩქუნა: ანგელოზეფ ბრელს ხანდენა, ნამდა კრებაშ სიწმინდე დეცვან.

14, 15. მუჭო შემლებუნა ანგელოზეფცალო ხე შეუნწყუათ კრებაშ სიწმინდეს? (ქოძირით სურათეფ).

¹⁴ მუჭო შემლებუნა ანგელოზეფცალო ხე შეუნწყუათ კრებაშ სიწმინდეს? ირნერო ოკო ვეცადათ, კრება ზნეობრივო დო სულიერო სუფთა რდასჷ. თეშო, პირველ რიგის, ჩქინ დუდ ოკო დოფთხილუათ გლახა საზოგადოებაშე დო თი ირფელშე, მუდგაქ შილებე იეჰოვაწკუმა ურთიერთობა გილამლუან (ფსალმ. 101:3). თეწკუმა ართო, შემლებუნა და დო ჯიმალეფს ხოლო ქიმვეხვარათ, იეჰოვაშ მოსაწონეფ რდანჷ. მაგალთო, ნამდგაინ თანაქრისტიან სერიოზულო ქუდაშენს-და, ჸოროფათ ოკო ელუჩათ თის, უხუცესეფშა ქიმერთას. მუჟამსით ვორწყეთ, ნამდა თინა თაშ ვექციებ, ჩქი ოკო ქუდურაგადუათ უხუცესეფს თე საკითხიშ გურშენ, მუშენდა მოკონა, ნამდა სულიერო მოსუსტებულ თანაქრისტიანქ მუთ შილებენ მალას მიღას მოხვარა (იაკ. 5:14, 15).

¹⁵ სანარღოთ, ნამთინე, მით სერიოზულო აშენს, ოკო ვედიტუან კრებას. თეცალ დროს „მუთუნნერ ურთიერთობა“ ვა მიღუნა თინეფწკუმაd (1 კორ. 5:9–13). თენა კრებაშ სიწმინდეს უნწყუნს ხეს. თეწკუმა ართო, კრება დატებაფუესინ თინეფწკუმა ურთიერთობა ვა მიღუნან თეთ, სინამდვილეს თინეფს ხოლო ვოხვარუთ, მუშენდა შილებე თეშნერო გურშა ქინიჯინან დო ქიმეხვადან, ნამდა იეჰოვას ოკო დართან. მუჟამსით თაშ იქციებუნა, იეჰოვა დო ანგელოზეფწკუმა ართო ჩქი ხოლო მანგარ გახარებულეფ ვორეთ (ლუკ. 15:7).

16. მუჭო შემლებუნა მივაჸუნათ ანგელოზეფიშ მაგალითის?

¹⁶ მუშმაჯგირა რე, ნამდა იეჰოვა თეზმა მუდგარენს მოგებაფუანა ანგელოზეფიშ გურშენ დო თინეფწკუმა თანამშრომლობაშ პატის მარზენა. მორთ არძაქ ქივეცადათ, მივაჸუნათ ანგელოზეფიშ მაგალითის – ვორდათ თანდაბალეფ, მიჸორდან ადამიანეფ, გიმიბრჩქინათ მოთვინება დო ირნერო ვეცადათ, ხე ქეშუნწყუათ კრებაშ სიწმინდეს. თაშ ქიმიფქციებუთ-და, ჩქი ხოლო მარადიულო იპჸუაფუთ იეჰოვაშ ოჯახიშ წევრეფ.