Buku Jaŵili ja Ayimwene
7 Sambano Elisa ŵaŵechete kuti, “Apikane maloŵe ga Yehofa. Yehofa aŵechete kuti, ‘Malaŵi ndaŵi mpela jinojino, ku geti ja msinda wa Samaliya, utandi wetililiche wakwana mlingo umo wa seya uchiŵa pa mtengo wa sekeli jimo, soni balele jwakwana milingo jiŵili ja seya juchiŵa pa mtengo wa sekeli* jimo.’” 2 Pelepo jwamkulungwa jwa asilikali jwele mwenyewo ŵamdalilaga mnope ŵamsalile mundu jwa Mlungu jwakuwonajo kuti, “Atamose Yehofa ali awugwile yakuwugalila mesi ya kwinani, ana yeleyi mpaka yikomboleche?” Pelepo mundu jwa Mlungu jwakuwonajo ŵamjanjile jwalakwe kuti, “Chimchiyiwona yeleyi ni meso genu, nambo mmwejo ngasimlya nawo.”
3 Sambano papali ŵamatana mcheche ŵaŵatamaga pamlango wakwinjilila mu msinda wa Samaliya. Jemanjaji ŵatandite kuwusyana kuti, “Ana chitugambe kutama apano ni kwembecheyaga kuwa? 4 Naga tukujila kuti, ‘Kwende tujinjile mumsindamu, chitamilecho mumsindamo muli mwana sala nikuti chitukawe basi. Nambosoni naga tugamba kutama apano chituwepe basi. Uli tujawule ku matenti ga asilikali ŵa Asiliyaku. Naga jemanjajo chakatuleche ni umi, basi tukaŵe ni umi. Nambo naga chakatuwulaje, basi chitukawe.” 5 Kaneko jemanjaji ŵanyakwiche ligulo chipi chili chitandite ni kwawula ku matenti ga asilikali ŵa Asiliya kula. Jemanjaji paŵagaŵandichile matentigo ŵayiweni kuti ku matentiko kwangali ŵandu.
6 Yaliji myoyo ligongo lyakuti Yehofa ŵatendekasisye asilikali ŵa Asiliya kupikana masegwe ga magaleta* gangondo soni ga mahachi, ŵatendekasisye kuti apikane masegwe gekulungwa ga gulu jangondo. Myoyo jemanjajo ŵatandite kuŵechetana kuti, “Apikane, mwenye jwa Ayisalayeli akamulene ni mamwenye ga Ahiti soni mamwenye ga ku Iguputo kuti ayiche kukumenyana ni m’weji.” 7 Ndaŵi jijojo jemanjajo ŵanyakwiche ni kutanda kutila. Ŵatisile kumagulo chipi chili chitandite, mwamti ŵagalesile matenti gawo, mahachi gawo soni abulu. Ŵalesile yosope mwayaŵelele ni kutila kuti akulupusye umi wawo.
8 Ŵamatana ŵala paŵayiche chiŵandika ni matenti ga asilikali gala ŵajinjile mutenti jimo ni kutanda kulya soni kumwa. Jemanjajo ŵajigele mwelemo silifa, golide soni yakuwala ni kuja kuyisisa. Kaneko ŵawujilesoni ni kwinjila mutenti jine, mwamti ŵajigelesoni yindu mwelemo ni kuja kuyisisa.
9 Kaneko jemanjajo ŵatandite kuŵechetana kuti, “Yatukutendayitu nganiyiŵa yambone. Lelo lili lisiku lyachisangalalo. Kwende tukasalile ŵane ngani jamboneji. Naga tugamba kutama ngajawula kuja kusala mpaka kundaŵi nikuti chatupe chilango. Kwende tujawule sambano, tukasale ngani jeleji ku nyumba ja mwenye.” 10 Myoyo jemanjajo ŵanyakwiche ni kuja kwasalila alonda ŵa pamlango wakwinjilila mumsinda kuti, “M’we twapite ku matenti ga asilikali ŵa Asiliya. Nambo twasimene kuli kwangali jwalijose soni nganikupikanikaga masegwe ga mundu jwalijose. Twagambile kugasimana mahachi soni abulu ali ayitaŵilile, nambosoni matenti ali agambile kugaleka myoyo.” 11 Ndaŵi jijojo alondaŵo ŵagombelesye ya utengawo, mwamti utengawo wajile kwika ku nyumba ja mwenye.
12 Mwenyewo ali agambile kupikana utengawo ŵajimwiche chilo chichocho ni kwasalila ŵakutumichila ŵakwe kuti, “Alinde nasalile yakusaka kututenda Asiliyaŵa. Jemanjajitu akumanyilila kuti m’we tuli ni sala. Myoyo agalesile matenti gawo ni kuja kujuŵa mwitinji. Jemanjajotu akuganisya kuti m’weji chitukopoche mumsinda muno, kaneko jemanjajo chatukamule, panyuma pakwe ni ajinjile mumsinda muno.” 13 Pelepo jumo mwa ŵakutumichila ŵa mwenyewo jwatite, “Chonde ŵakunde achalume kuti ajigale mahachi msano pa mahachi gagasigele mumsindamu kuti ajawule akalole. Ligongotu chinga jemanjajo ngajawula kapena chajawule, nambope chawepe basi. Chawe mpela mwayaŵelele ni Ayisalayeli ŵane wosope ŵaŵawile kala. Nambosoni pachangakaŵapa wosope chituwe, kwende twatume jemanjaji kuti akalole.” 14 Myoyo jemanjajo ŵajigele magaleta gaŵili ni mahachi, mwamti mwenyewo ŵatumile jemanjajo ku matenti ga ŵandu ŵa ku Siliya kula soni ŵasalile kuti, “Mjale mkalole.” 15 Jemanjajo ŵakuyisye ŵandu ŵa ku Siliyawo mpaka kuja kwika ku Yolodani. Paŵakuyaga ŵandu ŵa ku Siliyawo, jemanjajo ŵasimene kuti mwitala mosopemo mwagumbele yakuwala soni yindu yine yaŵajasaga Asiliyawo paŵatilaga ali akwete woga. Kaneko achalumewo ŵawujile ni kuja kwasalila mwenye.
16 Kaneko ŵandu ŵakopweche mu msinda mula ni kuja kujigala yindu ya ŵandu ŵa ku Siliya. Mwamti lisikuli utandi wetililiche wakwana mlingo umo wa seya waŵele pamtengo wa sekeli jimo, soni balele jwakwana milingo jiŵili ja seya jwaŵele pamtengo wa sekeli jimo, mwakamulana ni maloŵe gaŵaŵechete Yehofa. 17 Sambano mwenye ŵamsagwile jwamkulungwa jwa asilikali juŵamdalilaga jula kuti akalondeleje pa geti. Nambo ŵandu ŵampondilepondile jwalakwe pa getipo mpaka jwawile. Yeleyi yatendekwe mwakamulana ni maloŵe ga mundu jwa Mlungu jwakuwona jula gaŵasalile mwenye pandaŵi jele mwenyewo ŵayiche kwa jwalakwe. 18 Yatendekwe mpela muŵaŵechetele mundu jwa Mlungu jwakuwona jula paŵasalile mwenyewo kuti, “Balele jwakwana milingo jiŵili ja seya juchiŵa pamtengo wa sekeli jimo, soni utandi wetililiche wakwana mlingo umo wa seya uchiŵa pamtengo wa sekeli jimo. Yeleyi chiyitendekwe malaŵi ndaŵi mpela jinojino ku geti ja msinda wa Samaliya.” 19 Nambo jwamkulungwa jwa asilikali jula ŵamsalile mundu jwa Mlungu jwakuwonajo kuti, “Atamose Yehofa ali awugwile yakuwugalila mesi ya kwinani, ana yeleyi mpaka yikomboleche?” Pelepo Elisa wamjanjile jwalakwejo kuti, “Chimchiyiwona yeleyi ni meso genu, nambo mmwejo ngasimlya nawo.” 20 Yeleyi ni yayamtendechele jwalakwe ligongo ŵandu ŵampondilepondile pa geti pala mpaka jwawile.