Masalimo
Kwa jwakulongolela nyimbo. Nyimbo ja Daudi.
21 Wawo Yehofa, mwenye akusasangalala ligongo lya machili ga wawojo.
Jwalakwe akusasangalala mnope ligongo lya yindu yakusatenda wawojo pakumkulupusya.
2 Wawojo ampele jwalakwejo yakusaka ya mtima wakwe,
Soni nganamkanya yiliyose yaŵendile ni pakamwa pakwe. (Selah)
3 Wawojo akusampa jwalakwejo upile wejinji.
Soni am’wechiche jwalakwejo mumtwe chisoti chagolide jwambone mnope.*
4 Jwalakwe ŵaŵendile wawojo umi, mwamti ŵampele nditu,
Ŵampele umi wawulewu* kuti atameje mpaka kalakala.
5 Yakusatenda wawojo pakumkulupusya yikusamtendekasya jwalakwejo kuti achimbichikwe mnope.
Wawojo ampele jwalakwejo uchimbichimbi soni ulemu.
6 Wawojo amsagwile jwalakwejo kuti apochele upile mpaka kalakala.
Amtendekasisye jwalakwejo kuŵa jwakusangalala ligongo lyakuti wawojo ali chiŵandika ni jwalakwejo.*
7 Pakuŵa mwenye akusamdalila Yehofa,
Jwalakwejo ngasatenganyika ligongo lya chinonyelo chakulupichika cha Jwakwinani Mnopejo.
8 Mkono wawo uchapata adani* ŵawo wosope.
Mkono wawo wamlyo uchapata ŵandu ŵakuŵengana ni wawojo.
9 Pandaŵi jakwe jakuŵajilwa wawojo pachachiwonechela chachajonanga jemanjajo mpela ŵaponyisye pa chilangali chamoto.
Yehofa ali atumbile chachamila jemanjajo, soni moto uchatinisya.
10 Yisukulu ya jemanjajo* wawojo chachiyijonanga pachilambo chapasi.
Soni chachajonanga ŵanache ŵawo pasikati pa ŵandu.
11 Pakuŵa jemanjajo akusatenda yakomboleka pakusaka kutenda yakusakala.
Jemanjajo alinganyisye mapulani gachabe nambo gachilepechekwa.
12 Chachatendekasya kuti jemanjajo atile
Wawojo pachachiponya mpamba wawo kuti ŵasome jemanjajo.*
13 Anyakuche wawo Yehofa, alosye machili gawo.
Tuchijimba nyimbo syakuyamichila* machili gawo.