Masalimo
Kwa jwakulongolela nyimbo. Nyimbo.
66 Jemanja ŵandu wosope ŵamkutama pa chilambo chapasi, mgumile mwakusangalala pakumchimbichisya Mlungu.
2 Mjimbeje nyimbo syakulichimbichisya* lina lyakwe lyekulungwa.
Mumpeje jwalakwejo uchimbichimbi soni mumkwesyeje.
3 Mumsalile Mlungu kuti, “Wawojo akusatendaga yakusimonjesya mnope.
Ligongo lyakuti wawojo akwete machili gekulungwa,
Adani* ŵawo chachiyika pameso pawo ali mkutetemela.
4 Ŵandu wosope ŵapachilambo chapasi chachitindiŵala pameso pa wawojo.” (Selah)
Jemanjaji chachijimba nyimbo syakwachimbichisya wawojo.
Chachijimba nyimbo syakulichimbichisya lina lyawo.
5 Ayiche kuti alole yatesile Mlungu.
Yakusatenda jwalakwe kwa ŵandu yili yakusimonjesya mnope.
6 Jwalakwe ŵajichenjile nyasa ni kuŵa malo gejumu.
Ŵandu ŵajombweche lusulo ali mkwenda wapasi.
Kweleko twasangalele ligongo lya yindu yaŵatutendele jwalakwejo.
7 Jwalakwejo chachilamulila mpaka kalakala ligongo lyakuti akwete machili.
Ni meso gakwe akusajilolechesya mitundu ja ŵandu.
Ŵandu ŵamakani akalikwesya achimsyene. (Selah)
8 Jemanja mitundu ja ŵandu, mumchimbichisye Mlungu jwetu,
Mumchimbichisye jwalakwe mwakwesya maloŵe.
9 Jwalakwe ni jwakusatusunga ni umi,
Jwalakwe ngakusakunda kuti sajo* syetu sikuŵale.
10 Wawo Mlungu, wawojotu atuwungunyisye m’weji.
Wawojo atuswejesye mpela mwakusatendela pakuswejesya silifa.
11 Wawojo atusakulile mu lwawu lwawo kuti tutanjile.
Wawojo atusitopesye mwakututwika* katundu jwakusitopa mnope.
12 Wawojo atendekasisye kuti ŵandu atupondeponde.*
M’weji twapitile pamoto soni pamesi.
Kaneko wawojo ŵatuyikasisye pa malo gambone.
13 Une chinjijinjila m’nyumba jawo ni mbopesi syakutinisya syamtundu.
Chinjikwanilisya yilanga yanatesile kwa wawojo
14 Yilanga yanatesile ni ngomo syangu,
Soni yanaŵechete ni pakamwa pangu pandaŵi janaliji mu yisawusyo.
15 Chinjipeleka nyama syakwimbala kuŵa mbopesi syakutinisya kwa wawojo
Pampepe ni mbopesi sya ngondolo syamkambako syakocha pamoto, syakoposya lyosi. (Selah)
Chinjipeleka mbopesi ng’ombe syamkambako pampepe ni achitonde ŵambusi.
16 Myiche kuti mpikane, jemanja wosope ŵamkusimumjogopa Mlungu.
Une chinjimsalila jemanja yindu yandendele jwalakwejo.
17 Ni pakamwa pangu napopesile kwa jwalakwejo kuti angamuchisye,
Soni ni lulumi lwangu namchimbichisye jwalakwejo.
18 Yikaŵe kuti mumtima mwangu mwaliji nganisyo syakwatendela ŵane yakusakala,
Yehofa ngamkanambikana.
19 Nambo Mlungu ŵambikene.
Jwalakwe ŵatejele liwiwi kuti apikane lipopelo lyangu.
20 Achimbichikwe Mlungu jwele nganalikana lipopelo lyangu
Kapena kunjima chinonyelo chakwe chakulupichika.