Yoswa
2 Kaneko Yoswa mwanache jwa Nuni ŵatumile achalume ŵaŵili mwachimsisi kutyochela ku Sitimu kuti akasonde chilambocho. Jwalakwe ŵasalile jemanjajo kuti, “Mjawule mkasonde chilambocho, mnopemnope msinda wa Yeliko.” Myoyo achalumewo ŵapite ni kuja kuyichila kunyumba ja jwamkongwe jwine juŵaliji lihule lina lyakwe Lahabi, mwamti jemanjajo ŵatemi kweleko. 2 Pelepo ŵandu ŵamsalile mwenye jwa ku Yeliko kuti, “Apikane mwenye, achalume ŵa Chiyisalayeli ajinjile mumsinda muno chilo chino. Jemanjaji ayiche kukusonda chilambo chetu chino.” 3 Pelepo mwenye jwa ku Yeliko ŵatumile ŵandu kuti akamsalile Lahabi maloŵe gakuti, “Mwakoposye achalume ŵayiche ŵali m’nyumba mwenu, ligongo jemanjajo ayiche kukusonda chilambo chetu chosopechi.”
4 Nambo jwamkongwejo ŵajigele achalume ŵaŵiliwo ni kwasisa. Kaneko ŵasalile ŵandu ŵaŵatumile mwenye ŵala kuti, “Yisyene, akuno kwayiche achalume nambo ngangumanyilila kuti akutyochela kwapi. 5 Mwamti atyosile chilo chinochino ali agambile kusigala panandi kuwugala geti ja msindawu. Ngangumanyilila kuti ajinjilile kwapi achalumewo, nambo naga akwawutuchila mwachitemachitema mpaka ŵasimane.” 6 Pandaŵiji, jwamkongwejo ŵaliji ali ŵajigele ŵakusondawo ni kuja kwasisa pamsakasa ŵa nyumba jakwe. Jwalakwe ŵasisile jemanjajo pa mipesi ja fulakisi* jajaliji pamsakasapo. 7 Myoyo achalumewo ŵatandite kwawutuchila ŵakusonda ŵala kwinjililaga kumalo gakombochela, ku lusulo lwa Yolodani. Achalumewo paŵagambile kukopoka mumsindamo, ŵawugele geti ja msindawo.
8 Ŵakusonda ŵala mkanatande kugona, Lahabi ŵayiche kwa jemanjajo pamsakasapo. 9 Jwalakwe ŵasalile jemanjajo kuti, “Ngumanyilila nditu kuti Yehofa chiŵape jemanja chilambochi soni m’weji utukamwile mnope woga ligongo lya jemanja. Ŵandu wosope m’chilambochi lunda lwamalile pakwajogopa jemanja. 10 Pakuŵa twapikene yaŵatesile Yehofa pakumusya mesi pa Nyasa Jechejewu kuti jemanja mpite pamwatyochelaga ku Iguputo. Twapikenesoni yamwatite pakugawulaga mamwenye gaŵili ga Aamoli ku lisi line* lya lusulo lwa Yolodani. Mamwenye gakwe galiji Sihoni ni Ogi. 11 Patwapikene yeleyi woga watukamwile mnope soni pangali mundu jwalijose jwampaka alimbe mtima kuti alimbane ni jemanja. Yeleyi yili myoyo ligongo Yehofa Mlungu jwawo ali Mlungu jwakwinani soni jwachilambo chapasi. 12 Pakuŵa une nalosisye jemanja chinonyelo changamala, sambano alumbile pameso pa Yehofa kuti jemanjasoni chachalosya chinonyelo changamala wosope ŵa nyumba ja baba ŵangu. Nambosoni jemanja ambe chimanyisyo chakusimichisya kuti chachikwanilisya maloŵe gawo. 13 Ngasiŵawulaga baba ŵangu ni mama ŵangu, achalumbuŵangu, soni achapwanga ni achakuluŵangu nambosoni maŵasa gawo. Chonde chatukulupusye kuti tukawa.”
14 Pelepo ŵakusondawo ŵamsalile Lahabi kuti, “Naga ngamkwasalila ŵane yitwayichile tuchikwanilisya maloŵe getu soni tuchimlosya chinonyelo changamala Yehofa pakutupa chilambochi. Nambo naga tukulepela kukwanilisya maloŵe getu, m’weji tuchiwa mmalo mwa jemanja.” 15 Pambesi pa yeleyi, jwalakwe ŵakopochesye ŵakusondawo pewindo pakamulichisya masengo lukonji. Yeleyi yaliji myoyo ligongo nyumba jakwejo ŵajitaŵile mumbali mwa lutenje lwa msindawo, mwamti nyumbajo jalumbikene ni lipupa lya lutenje lwa msindawo. 16 Jwalakwe ŵasalile jemanjajo kuti, “Atilile kumatumbi soni akajuŵe kweleko kwa masiku gatatu kuti ŵandu ŵakwasosasosa ŵala akasiŵapata. Kaneko ŵakwasosasosawo pachachiwujila, jemanja chawujileje kuŵatyochele.”
17 Achalumewo ŵamsalile jwalakwe kuti, “Tuchiŵa ŵangali magambo pa yindu yamtutesile kuti tulumbileyi naga chimchilepela kutenda ayi, 18 Patuchiyika m’chilambo achino, chimtaŵilile lukonji lwechejewu alu pewindo lyachitukopocheleli. Pandaŵijo, chimwajigale baba ŵenu, mama ŵenu, achalumbuŵenu nambosoni wosope ŵa m’nyumba ja baba ŵenu yimpepe ni mmwejo nikuŵa m’nyumba ajino. 19 Mundu jwalijose juchachikopoka m’nyumba mwenu muno ni kwawula pasa, mundu jwelejo chachiwa ligongo lya msyenejo* soni m’weji ngasitukola magambo galigose pachiwa chakwecho. Nambo naga jwalijose juchachiŵa m’nyumba muno chachiwa, m’weji tuchikola magambo pachiwa chakwecho. 20 Naga mkwasalila ŵane yitwayichile, m’weji tuchiŵa ŵagopoka payindu yamtutesile kuti tulumbileyi soni ngasitukola magambo galigose.” 21 Pelepo Lahabi ŵajanjile kuti, “Yosope yitendekwe mwakamulana ni maloŵe gawo.”
Paŵamalisisye kuŵechetana yeleyi, ŵalekangene ni achalumewo mwamti jemanjajo ŵawutandite ulendo wawo. Panyuma pakwe, Lahabi ŵataŵilile pewindo lukonji lwechejewu lula. 22 Myoyo ŵakusondawo ŵapite kumatumbi ni kuja kujuŵa kweleko kwa masiku gatatu mpaka ŵandu ŵaŵasosagasosaga ŵala ŵawujile kumsinda wawo. Ŵanduwo ŵasosilesosile jemanjajo mumsewu uliwose nambo nganiŵapata. 23 Kaneko achalume ŵaŵili ŵakusonda ŵala ŵatulwiche kumatumbi kuŵajuŵile kula ni komboka lusulo lwa Yolodani kwawula kwa Yoswa mwanache jwa Nuni. Ali ayiche, ŵamlondechesye Yoswa yindu yosope yiŵasimene nayo. 24 Kaneko jemanjajo ŵamsalile Yoswa kuti, “Yehofa achipeleche chilambo chosopecho mmyala mwetu, sonitu ŵandu wosope m’chilambocho wakamwile mnope woga ligongo lya m’weji.”