Masalimo
Kwa jwakulongolela nyimbo. Nyimbo ja Daudi.
31 Wawo Yehofa, une ndilile kwa wawojo.
Akakunda kuti ndende sooni.
Angulupusye ligongo lyakuti wawojo ali ŵakulungama.
2 Atejele liwiwi lyawo* kuti ambikane.
Ayiche mwachitema kuti angulupusye.
Wawojo aŵe litumbi lyangu lyakutilila,
Malo gakulimbangana gakulupuchila.
3 Pakuŵa wawojo ali lwala lwangu soni malo gangu gakulimbangana.
Ligongo lya lina lyawo, wawojo chachilongolela une.
4 Wawojo chachingulupusya une mu lwawu lwaŵandejele jemanjajo mwakusisa,
Pakuŵa wawojo ali malo gangu gakulimbangana.
5 Ngupeleka umi wangu mmyala mwawo.
Wawo Yehofa, Mlungu jwakusaŵecheta yisyesyene,* wawojo awombwele une.
6 Ngusaŵengana ni ŵandu ŵakusalipeleka ku yiwanichisyo yakusepa, yayili yangali mate.
Nambo une ngusinamdalila Yehofa.
7 Chinjisangalala mnope ligongo lya chinonyelo chawo chakulupichika chakusandosya une,
Pakuŵa wawojo akuweni kulagasika kwangu.
Wawojo akumanyilila yipwetesi yekulungwa yangusimana nayo.
8 Wawojo nganambeleka mmyala mwa adani* ŵangu,
Nambo anjimiche pamalo gambone gangali chakogoya chilichose.*
9 Andendele chanasa, wawo Yehofa, pakuŵa ndili mu yipwetesi.
Ligongo lya yakupweteka yangusimana nayo, meso gangu galembwiche soni chilu changu chosope chifoweche.*
10 Umi wangu ukumala ligongo lya yakupweteka yangusimana nayo,
Soni yaka yangu yikunandipilanandipila ligongo lya kuwuwula.
Machili gangu gakumala ligongo lya yakulemwa yangu.
Mawupa gangu gatengwiche.
11 Adani ŵangu wosope akusanyosya,
Mnopemnope ŵakutama mwakuŵandikana ni une.
Ŵandu ŵakumanyigana nawo akunjogopa,
Soni pambweni une, akusandila.
12 Mumtima mwawo* ŵandiŵalile soni ŵangangumbuchila, mpela mundu jwam’we.
Ndili mpela chiŵiga chekasiche.
13 Mbikene mbekesela syejinji syachabe.
Yindu yakogoya yisyungulile une.
Jemanjajo pasongene pampepe kuti alimbane ni une,
Akusapangana yakuti ambulaje.
14 Nambo une ngusinadalila wawojo Yehofa.
Ngusasala kuti, “Wawojo ali Mlungu jwangu.”
15 Masiku ga umi wangu gali* mmyala mwawo.
Angulupusye mmyala mwa adani ŵangu soni kwa ŵandu ŵakundagasya.
16 Atendekasye ngope jawo kuti jimŵalile jwakutumichila jwawo.
Angulupusye ligongo lya chinonyelo chawo chakulupichika.
17 Wawo Yehofa, akandesya sooni panguŵilanga kwa wawojo.
Nambo ŵakusakala ŵatesye sooni.
Ŵajawusye ku Malembe* kuti maloŵe gawo gakapikanikasoni.
18 Atendekasye kuti ngomo syaunami sikaŵechetasoni,
Ngomo syasikusaŵecheta mwakulikwesya soni mwakwanyosya ŵandu ŵakulungama.
19 Umbone wawo uli wekulungwa.
Ŵandu ŵakusiŵajogopa wawojo ŵasunjile yindu yejinji yambone.
Alosisye yindu yamboneyi kwa ŵandu ŵatilile kwa wawojo. Wawojo atesile yeleyi ŵandu wosope ali mkulola.
20 Chachasisa jemanjajo m’malo gakusisika mwakuŵandikana ni wawojo
Kuti ŵachenjele ku mapulani gachabe galinganyisye ŵandu.
Chachasisa jemanjajo mu m’bulili wawo
Kuti ŵandu ŵakwanyosya akasimana jemanjajo.*
21 Achimbichikwe Yehofa,
Pakuŵa jwalakwe alosisye une chinonyelo chakwe chakulupichika mumsinda wesyungulilidwe ni adani.
22 Nambo une yindu yanganganiche, ni naŵechete kuti:
“Unetu chimbwe mwamti ngasambonasoni.”
Nambo wawojo ŵapikene kulila kwangu kwakuchondelela kuti angamuchisye.
23 Mumnonyeleje Yehofa, jemanja wosope ŵamli ŵakulupichika kwa jwalakwe.
Yehofa akusiŵachenjela ŵandu ŵakulupichika.
Nambo jwalijose jwakulikwesya akusampa chilango* chakupweteka mnope.
24 Atende yindu mwakulimba mtima soni mwamachili
Jemanja wosope ŵakwembecheya kwa Yehofa.