Buku Jaŵili ja Ayimwene
6 Sambano ŵanache ŵa ŵakulochesya ŵamsalile Elisa kuti, “Ambuje, malo gatukutamagatu gali gamwana mnope kwa m’weji. 2 Chonde atukunde kuti tujawule ku Yolodani. Kweleko jwalijose akakate chitela ni chakulinga chakuti tukataŵile malo gakuti tukatameje.” Elisa ni ŵajanjile jemanjaji kuti, “Ajawule.” 3 Nambo jumo mwa ŵanache ŵa ŵakulochesyawo ŵamwusisye Elisajo kuti, “Ana yili yakomboleka kuti wawojo alongane ni m’weji ŵakutumichila ŵawo?” Pelepo jwalakwe ni ŵajanjile kuti, “Elo mpaka tulongane.” 4 Myoyo jwalakwe ŵalongene ni jemanjaji, mwamti ŵayiche ku Yolodaniko ni kutanda kukata yitela. 5 Sambano jumo mwa jemanjaji paŵakataga chitela, liŵago lyakwe lyakuliche ni kugwila m’mesi. Pelepo jwalakwe ŵagumisile kuti, “Ndende uli une ambuje ŵangu, liŵagoli lyaliji lyakwasima!” 6 Pelepo mundu jwa Mlungu jwakuwonajo ŵawusisye kuti, “Ligwilile papi liŵagolyo?” Myoyo jwalakwe ŵamlosisye palyagwililepo. Kaneko mundu jwa Mlungu jwakuwonajo ŵakatile kachitela ni kukaponya pamalo palyagwilile liŵagolyo. Pelepo liŵagolyo lyajajaŵele. 7 Mundu jwa Mlungu jwakuwonajo ni ŵatite, “Mlijigale.” Myoyo jwalakwe ŵanyanyambilile ni mkono wakwe ni kujigala liŵagolyo.
8 Sambano mwenye jwa ku Siliya jwapite kungondo jakulimbana ni mwenye jwa Ayisalayeli. Jwalakwe ŵaŵechete ni ŵakutumichila ŵakwe ni kwasalila kuti, “Chitukakunje matenti getu pamalo gamtigamti.” 9 Kaneko mundu jwa Mlungu jwakuwona jula ŵatumisye utenga kwa mwenye jwa ku Isalayeli wakuti, “Asamale pakupita pamalo aga ligongo ŵandu ŵa ku Siliya akwika pamalo gelego.” 10 Myoyo mwenye jwa Ayisalayeli jwatumichisye utenga ŵandu ŵaŵatamaga mudela jele mundu jwa Mlungu jwakuwona jula ŵasasile kuti asamaleje pakupita. Jwalakwe jwapitilisye kwakalamusya mwenyewo pakwamba ya malo gali Asiliya, mwamti mwenyewo ŵaŵele ali mkugaŵambala maloga kwa maulendo gejinji.*
11 Yeleyi yamtumbilikasisye mnope mwenye jwa ku Siliya, mwamti jwalakwe ŵasongangenye ŵakutumichila ŵakwe wosope ni kwawusya kuti, “Musalile jemanja. Ana ŵani pasikati petu jwali kumbali ja mwenye jwa Ayisalayeli?” 12 Jumo mwa ŵakutumichila ŵakwewo ni ŵajanjile kuti, “Pangali, ambuje ŵangu mwenye. Nambo ali Elisa jwakulochesya jwa ku Isalayeli jwakusamsalila mwenye jwa Ayisalayeli yindu yele wawojo akusayiŵecheta ali kuchipinda chawo.” 13 Pelepo mwenyewo ni ŵamsalile jwalakwejo kuti, “Mjawule mkasosesose kwali jwalakwejo, kuti kaneko une natumisye achalume akamkamule jwalakwejo.” Panyuma pakwe utenga wayiche kwa mwenyewo wakwasalila kuti, “Elisa jula ali ku Dotani.” 14 Ndaŵi jijojo mwenyewo ŵatumisye kweleko mahachi soni magaleta* gangondo yimpepe ni gulu jekulungwa ja asilikali. Jemanjaji ŵayiche chilo ni kuwusyungulila msindawo.
15 Jwakutumichila jwa mundu jwa Mlungu jwakuwona jula ali ajimwiche kundaŵi ni kukopoka pasa, ŵajiweni gulu ja asilikali yimpepe ni mahachi soni magaleta gawo gangondo gali gasyungulile msindawo. Ndaŵi jijojo jwakutumichilajo ŵamsalile mundu jwa Mlungujo kuti, “Ambuje ŵangu, chitutende wuli pelepa? Yitusawisye basi.” 16 Jwalakwejo ni ŵajanjile kuti, “Mkatenda woga pakuŵa kumbali jetu kwana ŵajinji kulekangana ni ŵali kumbali ja jemanjajo.” 17 Kaneko Elisa ni ŵapopesile kuti, “Wawo Yehofa, amwugule meso jwalakweju ni chakulinga chakuti alole.” Ndaŵi jijojo Yehofa ŵawugwile meso ga jwakutumichilajo, mwamti jwalakwe ŵajiweni dela josope ja matumbi jili jigumbele ni mahachi soni magaleta gangondo gakolela moto, soni galiji gali gamsyungulile jwalakwejo ni Elisa.
18 Ŵandu ŵa ku Siliya paŵayiche kuŵaliji Elisa, jwalakwe ŵapopesile kwa Yehofa kuti, “Chonde ŵatendekasye jemanjaji kuti aŵe ŵangalola.” Myoyo jwalakwe ŵatendekasisye jemanjajo kuti aŵe ŵangalola mwakamulana ni yaŵaŵendile Elisa. 19 Kaneko Elisa ŵasalile jemanjajo kuti, “Litala lyakwe nganiliŵa ali soni msinda wamkuwusosa nganikuŵa akuno. Anguye chinalongolele kwali mundu jwakumsosajo.” Nambo jwalakwe ŵalongolele jemanjajo ku Samaliya.
20 Jemanjaji paŵayiche ku Samaliya, Elisa jwapopesile kuti, “Wawo Yehofa ŵawugule jemanjaji meso kuti alole.” Myoyo Yehofa ŵawugwile jemanjajo meso, mwamti jemanjajo ŵayiweni kuti ali mumsinda wa Samaliya. 21 Mwenye jwa ku Isalayeli paŵaweni jemanjaji ŵamwusisye Elisa kuti, “Ana nawulaje jemanjaji? Baba ŵangu, ana nawulaje?” 22 Nambo Elisa ŵajanjile kuti, “Akawulaga jemanjajo. Ana akusiŵawulaga ni upanga* soni ukunje ŵandu ŵaŵakamwile kuti aŵe achikapolo? Ŵape mkate* ni mesi jemanjaji kuti alye ni kumwa. Kaneko ŵaleche kuti awujileje kwa ambuje ŵawo.” 23 Myoyo mwenyewo ŵalinganyichisye pwando jekulungwa jemanjajo mwamti ŵalile ni kumwa. Panyuma pakwe ŵalesile jemanjaji kuti awujile kwa ambuje ŵawo. Kutandila pelepa magulu ga ŵachiswamba ga Asiliya nganigayikasoni ku chilambo cha Ayisalayeli.
24 Panyuma pa yeleyi Beni-hadadi mwenye jwa ku Siliya ŵasongangenye asilikali ŵakwe wosope pampepe ni kwawula kuja kuwusyungulila msinda wa Samaliya. 25 Myoyo mumsindamo mwagwile sala jakogoya. Asiliyawo ŵapitilisye kuwusyungulila msindawo mwamti yindu mumsindamo yayikene pakuti mtwe umo wa bulu ŵawusumaga pa mbiya syasilifa syakwana 80, soni ndotosi sya ngunda syagumbala mlingo umo pa mbali mcheche sya mlingo wa kabu* ŵasisumaga ni mbiya syasilifa syakwana msano. 26 Mwenye jwa Ayisalayeli paŵapitaga chiŵandika lutenje jwamkongwe jwine jwagumilile kuti, “Wawo ambuje ŵangu mwenye, chonde atukamuchisye!” 27 Pelepo mwenyewo ni ŵajanjile kuti, “Naga Yehofa ngakwakamuchisya jemanja, ana une chikamuchisyocho chinachijigale kwapi? Ana chinachijigale kutyochela ku malo gakuputila mbeju? Kapena ku malo gakuminyila mipeleya, kapena chinachijigale ku malo gakwenjela mawuta?” 28 Kaneko mwenyewo ŵamwusisye jwamkongwejo kuti, “Ana chisawisye chichi?” Jwamkongwejo ni ŵajanjile kuti, “Jwamkongwe aju jwasalile une kuti, ‘Myiche najo akuno mwanache jwenu kuti tulye lelo, jwaune tuchilya malaŵi.’ 29 Myoyo twamteleche mwanache jwangu ni twamlile mwanachejo. Pagayiche malaŵi gakwe une namsalile jwalakwejo kuti, ‘Sambano myiche najo mwanache jwenujo kuti tumlye.’ Nambo jwalakweju jwamsisile mwanache jwakwejo.”
30 Mwenyewo paŵagambile kupikana yaŵaŵechete jwamkongwejo ŵapapulenye yakuwala yakwe. Kaneko mwenyewo paŵapitaga chiŵandika lutenje, ŵandu ŵaweni ali awete yiguduli mkati mwa yakuwala yawo. 31 Kaneko mwenyewo ni ŵaŵechete kuti, “Mlungu ambe chilango* chekulungwa naga lelo ngangumkata mtwe Elisa mwanache jwa Safati.”
32 Sambano Elisa ŵaliji ali atemi m’nyumba soni achakulungwakulungwa ŵatemi yimpepe ni jwalakwejo. Ni mwenye ŵala ŵamsalile mundu kuti alongolele. Nambo mundujo mkanayiche, Elisa ŵasalile achakulungwakulungwawo kuti, “Am’weni mwanache jwa mundu jwakuwulaga ŵanduju, amtumisye mundu kuti ayiche kukukata mtwe wangu. Alolechesye kuti pachayiche mundu jweleju awugale litangali ni kulikamula mwamachili kuti jwalakwejo akajinjila. Ana ngakupikana msindo wa ambuje ŵakwe wawukupikanika panyuma pa mundujo?” 33 Elisa ali mkuŵechetana ni ŵanduwo, mundu jula jwakopochele. Kaneko mwenye ŵala ŵakopochele ni ŵaŵechete kuti, “Yakusawusyayitu yityochele kwa Yehofa. Sano pana ligongo lyakwembecheya ya chikamuchisyo cha Yehofa?”