MILILI 10

ALOLE yiwuliliyi. Ciwulili cilicose cikulosya mlili waŵayikasisye Yehofa pa Aeguputo. Pa ciwulili candanda akum’wona Aloni ali mkuputa Lusulo lwa Nayilo ni simbo jakwe. Paŵaputile, mesi gosope mu lusulolo gasyucile miyasi. Somba syawile, soni lusulolo lwatandite kununga.

Kaneko, Yehofa ŵatendekasisye kuti mola gakopoce mu Lusulo lwa Nayilo. Galiji palipose mpela, mu yakutelecela yakulya, mu yiwaya yakalanjila, m’yindanda yakugona. Mola gala pagawile Aeguputo ŵagasonganganyaga m’mawunjili gamakulungwakulungwa, ni cilamboco canungaga ligongo lya molago.

Kaneko Aloni ŵaputile litaka ni simbo jakwe, ni luwundu lwakwe lwasyucile membe syakuluma. Yeleyi yili yaguluka yamwanamwana yayikusaluma. Membe syakulumasi syaliji mlili watatu m’cilambo ca Eguputo.

Milili jakuyicisya jayikaga kwa Aeguputope, ngaŵaga kwa Ayisalayeli. Mlili wamcece waliji membe syekulungwakulungwa syasyagumbalene m’nyumba syosope sya Aeguputo. Mlili wa msano waliji pa yinyama. Ng’ombe syejinji, ngondolo, soni mbusi sya Aeguputo syawile.

Kaneko, Musa ni Aloni ŵajigele liwu nikuliponya mwinani. Liwuli lyatendekasisye yilonda yakupweteka pa ŵandu ni yinyama. Welewu waliji mlili wa 6.

Pawamasile welewu Musa ŵatambasukwile mkono wakwe mwinani, ni Yehofa ŵayikasisye wula ja matalila ni yilindimo. Jaliji wula jamatalila jakogoya mnope, jaŵaliji mkanajiwoneje Aeguputo cipagwile.

Mlili wa 8 waliji likuga lyekulungwa lya sombe. Syaliji sombe syejinji, syasyaliji mkanisiwoneceje citandilile. Syalile cilicose canganicijonasika ni wula jamatalila jila.

Mlili wa 9 waliji cipi. Kwa masiku gatatu, cipi cekulungwa mnope caliji m’cilambomo, nambo mbali jiŵatamaga Ayisalayeli kwaliji mkulanguka.

Pambesi pakwe, Mlungu ŵasalile ŵandu ŵakwe kuti apakasye miyasi ja mbusi jamwana kapena ngondolo jamwana pa mafelemu ga nyumba syawo. Kaneko lilayika lya Mlungu lyajesile mu Eguputo mosope. Lilayikalyo palyajiweni miyasijo, nganiliwulaga jwalijose m’nyumbamo. Nambo m’nyumba syosope syanganisikola miyasi pa mafelemu, lilayika lya Mlungu lyawulagaga mundu jwandanda kupagwa, soni cinyama candanda kupagwa. Welewu waliji mlili wa 10.

Pawamasile mlili wakumbesiwu, Falao ŵasalile Ayisalayeli kuti ajawuleje. Ŵandu ŵa Mlungu wosope ŵaliji ŵakoseka kwawula, soni cilo cicoco ŵawutandite ulendo wawo wakutyoka ku Eguputo.