SIMBO JA ALONI JIKUSIPUKA MALUŴA

ALOLE maluŵa ni yisogosi ya mtowo yayikusipuka pa simboji. Jeleji jili simbo ja Aloni. Maluŵaga ni yisogosi yejiwuyi yamesile pa simbo ja Aloni mu cilo cimope! Kwende tulole ligongo lyakwe.

Ayisalayeli sambano aŵele ali mkwendajenda mwipululu kwakandaŵi. Ŵane akuganisya kuti Musa ngakuŵajilwa kuŵa mlongola, soni kuti Aloni ngakuŵajilwa kuŵa jwambopesi jwamkulungwa. Mundu jwine jwakuganisya cati m’yiyi ali Kola, nombenajo Datani ni Abilamu, soni acimlongola ŵa ŵandu ŵakwana 250 akuganisya yeleyi. Wosopeŵa akwisa kwa Musa nikuŵeceta kuti: ‘Ana ligongo cici mkulikwesya pacilikati petu?’

Musa akumsalila Kola ni ŵakumkuya ŵakwe kuti: ‘Malaŵi kundaŵi ajigale yakunyakulila moto, nikuŵikamo ubani. Kaneko ayice nayo ku tenti ja Yehofa. Ni tucilola kuti Yehofa cacisagula nduni.’

Lisiku lyakuyicisya Kola ni ŵakumkuya ŵakwe ŵakwana 250 akwisa ku tenti ja Yehofa. Ŵanesoni ŵajinji akwisa nawo kukwalimbikasya jemanjaji. Yehofa atumbile mnope. Musa akuŵeceta kuti: ‘Atalicile matenti ga ŵandu ŵakusakalaŵa. Akakamula cilicose ca jemanjajo.’ Ŵandu akupikanila, soni akutyoka ku matenti ga Kola, Datani ni Abilamu.

Kaneko Musa akuŵeceta kuti: ‘Camanyilile jwamsagwile Yehofa ligongo lya ayi. Litaka cilijasame nikwamila ŵandu ŵakusakalaŵa.’

Musa pakwamba kumalisya kuŵeceta, litaka likuwuguka. Litakali likumila tenti ja Kola ndi yindu yakwe yosope, yimpepe ni Datani, Abilamu, ni ŵandu wosope ŵaŵaliji kumbali jawo. Ŵane pakupikana kulila kwa ŵandu ŵakugwila mwitaka, akugumila kuti, ‘Kwende tutile! Nombe m’weji cilambo komboleka kutumila.’

Kola ni ŵakumkuya 250 ŵala ali ciŵandika tenti jakulambilila. Sambano Yehofa akutumisya moto, nikwajoca wosopewo. Kaneko Yehofa akumsalila mwanace jwa Aloni, Eliyasa, kuti ajigale yakujigalila moto ya ŵandu ŵawile ŵala kuti apanganye cakuwunicila masabawu. Cakuwunicila masabawuci cili cakwakalamusya Ayisalayeli kuti akapagwa jwalijose akaŵe Aloni ni ŵanace ŵakwepe, ŵakusosekwa kuŵa ŵambopesi ŵa Yehofa.

Nambo Yehofa akusaka kuti ŵandu apikanicisye cenene kuti Aloni ni ŵanace ŵakwe ali ŵandu ŵaŵasagwile kuŵa ŵambopesi. M’yoyo akumsalila Musa kuti: ‘Mumsalile mlongola jwa lukosyo lulilose lwa Ayisalayeli kuti ayice najo simbo jakwe. Ku lukosyo lwa Lefi, mumsalile Aloni ayice najo simbo jakwe. Simbo syosopesyo msiŵice mu tenti jakulambilila pawujo pa libokosi lya cilangano. Simbo ja mundu junamsagwile kuŵa jwambopesi cijisipuce maluŵa.’

Musa pakwawula kukulola kundaŵi kwakwe, akujisimana simbo ja Aloni jili jisipwice maluŵa, soni yisogosi ya mtowo yili yimesile pa simbojo! Sambano ana aliweni ligongo lyakwe simbo ja Aloni jikusipuka maluŵa?