NGANI 45
KOMBOKA LUSULO LWA YOLODANI
ALOLE! Ayisalayeli akomboka Lusulo lwa Yolodani! Nambo ana mesi galikwapi? Pacangakaŵa pepa mesi galiji gagumbele mnope mu lusulolu, ligongo lyakuti ula jejinji jikusanya ndaŵi ja caka jeleji. Nambo sambano mesi gosope mwangali! Soni Ayisalayeli akomboka pamkuli pejumu mpela muŵatendele pa Nyasa Jecejewu! Ana mesi gosope gala gapite kwapi? Kwende tulole.
Ndaŵi pajakwanile jakuti Ayisalayeli ajomboce Lusulo lwa Yolodani, Yehofa ŵamsalile Yoswa kuti ŵasalile ŵandu yakuyicisyayi: ‘Ŵambopesi ajigale libokosi lya cilangano, soni ajendeje pasogolo petu. Pacacitanda kuliŵata mesi ga mu Lusulo lwa Yolodani, mesi gacileka kwenda.’
M’yoyo ŵambopesi akunyakula libokosi lya cilangano, nikutanda kwenda pasogolo pa ŵandu. Pakwika pa Yolodani, ŵambopesi ŵala akuliŵata mesi. Lusulolo luli lwakusokoka, soni lukuwutuka mwamacili mnope. Nambo sajo syawo pasigambile kuliŵata mesi, mesi gala gakutanda kuleka kuwutuka! Yili yakusimonjesya! Yehofa agajimice mesi kumkuli kwa lusulolo, nigatesile kweleko litanda lyekulungwa. M’yoyo, mwacangakaŵa mu lusulo mula mukuŵa mwangalisoni mesi!
Ŵambopesi ŵanyakwile libokosi lya cilangano ŵala ndaŵi jijojo akwawula pasikati pa lusulo pejumupo. Ana akwawona pa ciwulilipo? Ayisalayeli wosope akomboka pejumu mu Lusulo lwa Yolodani, ŵambopesiwo ali cijimile pasikati pa lusulopo!
Ayisalayeli wosope paŵamasile komboka, Yehofa akumsalila Yoswa kuti ŵasalile acalume ŵamacili ŵakwana 12 kuti: ‘Ajawule mu lusulomo pajimi ŵambopesi ali anyakwile libokosi lya cilangano pala. Akalokote maganga 12, soni akagawunjice pampepe pamalo pacagone jemanja wosope cilo cikuyicisya. M’yoyo m’bujo ŵanace ŵenu pacaciwusya gopolela kwa magangaga, cimcasalila kuti mesi galesile kwenda libokosi lya cilangano lya Yehofa palyajombokaga Yolodani. Magangaga gacakumbusya jemanja yakusimonjesyayi!’ Yoswa akusonganganyasoni maganga 12 paŵajimi ŵambopesi palusulo pala.
Kumbesi kwakwe Yoswa akwasalila ŵambopesi ŵanyakwile libokosi lya cilangano ŵala kuti: ‘Akopoce mu Yolodanimo.’ Sambano pagambile kopoka, lusulolo lukutandasoni kwenda.