YOSWA AKUŴA MLONGOLA

MUSA akusaka ali ajinjile nawo m’cilambo ca Kanani yimpepe ni Ayisalayeli. Ni jwalakwe akum’ŵenda Yehofa kuti: ‘Yehofa angunde kuti njomboce nawo Lusulo lwa Yolodani kuti nacilole cilambo camboneco.’ Nambo Yehofa akwanga kuti: ‘Basi mkajendelecela kuŵeceta! Mkasimsalasoni yeleyo!’ Ana akumanyilila ligongo lyakwe Yehofa ŵajanjile yeleyi?

Lyaliji ligongo lya yayatendekwe Musa ali aputile lwala lula. Akumbucile kuti jwalakwe yimpepe ni Aloni nganamcimbicisya Yehofa. Jemanjaji nganiŵasalila ŵandu kuti Yehofa ni juŵapele mesi kutyocela m’lwala. Paligongo lyeleli Yehofa ŵasasile kuti ngasiŵakunda jemanjaji kwinjila m’cilambo ca Kanani.

Ni sambano pali papite miyesi jakuŵalanjika ciwile Aloni, Yehofa akumsalila Musa kuti: ‘Mumjigale Yoswa, nimumjimice pameso pa Eliyesala jwambopesi, soni pameso pa ŵanduwo. Sambano pameso pa wosopewo mwasalile kuti Yoswa ali mlongola jwasambano.’ Musa akutenda yamsalile Yehofa, mpela mwakuyiwonela pa ciwulilipa.

Kaneko Yehofa akumsalila Yoswa kuti: ‘Mlimbe mtima, soni mkajogopa. Cimcalongolela Ayisalayeli kwinjila m’cilambo ca Kanani canasalile kuti cinjapa, soni une cinjiŵa ni mmwejo.’

Kaneko Yehofa akumsalila Musa kuti ajawule pacanya pa litumbi lya Nebo m’cilambo ca Mowabu. Pacanyapo Musa akukombola kuciwona cilambo cakusalala cacili lisi line lya Lusulo lwa Yolodani. Yehofa akuŵeceta kuti: ‘Celeci cili cilambo canasalile kuti cinjapa ŵanace ŵa Abulahamu, Isaki, soni Yakobo. Ngundile kuti mcilole, nambo ngangumkunda kuti mcijinjile.’

Ali pacanya pepo, Musa akuwa. Jwalakwe ŵakwete yaka 120. Nambo ŵakwetepe macili, soni ŵakombolaga kulola cenene. Ŵandu cikwakamula canasa, soni akulila malilo ga Musa. Nambo akusangalala kuti Yoswa ali mlongola jwawo jwasambano.