Ana Malayika Mpaka Gatukwaye Camtuli Paumi Wetu?

Lyamlungu line musi, Kenneth ni ŵamkwakwe Filomena ŵakusatama m’cilambo ca Curaçao, ŵapite ku liŵasa line lyaŵatendaga nalyo lijiganyo lya Baibulo.

Kenneth jwatite, “Patwakopocele pamlangopo twasimonjile kuti m’nyumba mwaliji mwewugale soni pasa paliji pangali galimoto. Atamose yaliji m’yoyo, cine cakwe canganganicisye kuti najimbile foni ŵakongwe.”

Ŵakongwewo ŵajanjile kuti ŵamkwawo ŵaliji ali apite kumasengo. Nambope paŵamanyilile kuti ŵaŵaŵecetanaga nawo ŵaliji Kenneth ni Filomena, ŵakopwece ni kwasalila kuti ajinjile m’nyumbamo.

Kenneth ni Filomena cakwamba kwawona, ŵayimanyi kuti ŵakongwewo ŵaliji mkulila. Kaneko Kenneth ŵatandite kupopela kuti atande lijiganyolyo, pandaŵi jelejisoni, ŵakongwewo ŵaliji mkulila. Panyuma pa lipopelolyo, Kenneth ni Filomena, ŵam’wusisye kuti amanyilile cacamsawusyaga.

Ŵakongwewo ŵasasile kuti ŵaliji mkulila ligongo lyakuti pandaŵi jayiceje jemanjajo, ŵaliji m’mapulani gakuti aliwulaje mwakuti pajanjileje foni jaŵajimbile Kenneth, ŵaliji ali mkulemba cikalata cakwamanyisya ŵamkwawo yakuliwulagako. Ŵasasilesoni kuti ŵalagaga ni ulwele wa nganisyo. Kenneth ni Filomena paŵapikene yeleyi, ŵalimbikasisye ni maloŵe gakutyocela m’Baibulo. Yeleyi yakulupwisye umi wakwe.

Kaneko Kenneth jwatite, “Twam’yamicile Yehofa pakutulongolela kuti tujimbe foni ni cakulinga cakuti tumkamucisye jwamkongwe jwaŵalagasikaga nganisyoju. Komboleka kuti Yehofa ŵatesile yeleyi kupitila mu lilayika kapena msimu wakwe weswela.”a

Ana Kenneth ni Filomena, ŵalemwisye kulupilila kuti Mlungu ni juŵakamucisye kupitila mwa lilayika kapena msimu wakwe weswela? Kapena mpaka tujile kuti lunda lwakuti jemanjaji ajimbe foni lwagambile kwika mwangosi?

Ngatukumanyilila yosope panganiji. Nambo catukumanyilila cenene ni cakuti Mlungu akusakamulicisya masengo malayika gakwe pakusaka kwakamucisya ŵandu mwausimu. Mwambone, Baibulo jikusasala kuti Mlungu ŵakamulicisye masengo lilayika pakumlongolela jwakulalicila Filipo kuti akajikamucisye nduna ja ku Itiyopiya jijasosagasosaga cikamucisyo causimu.—Masengo 8:26-31.

Dini syejinji sikusalimbikasya ŵandu kulupilila kuti malayika mpaka gakamucisye m’litala line lyakwe. Ndaŵi syejinji akusalosya malayika gali mkutenda lisosa lya Mlungu soni kuti mundu jwalijose akwete lilayika lyakwe lyalikusamkamucisya. Ŵandu ŵajinji akusakulupilila kuti malayika gapali soni kuti gakusakamucisya m’matala gane paumi wawo. Nambope pana ŵandu ŵane ŵangakusakulupilila yakuti malayika gapali.

Ana yili yisyene kuti kwana malayika? Naga gapali, gatyocele kwapi? Ana yisyesyene yakwe yakwamba malayika yili yamtuli? Soni ana mpaka gatukwaye camtuli paumi wetu? Kwende tulole umboni wakulosya kuti malayika gapali.