Ana Jwalijose Akwete Lilayika Lyalikusamkamucisya?

Baibulo ngajikusajiganya kuti mundu jwalijose akwete lilayika lyakwe lyalikusamkamucisya. Yili yisyene kuti Yesu ndaŵi jine ŵaŵecete kuti, “Asamale kuti akanyosya kamo mwa tuŵanacetu [ŵakulijiganya ŵa Klistu], pakuŵa ngwasalicisya kuti malayika gawo kwinani gakusalola ngope ja Atati ŵangu ŵakwinani ndaŵi syosope.” (Matayo 18:10) Nambope Yesu pakuŵeceta yeleyi ngaŵa kuti ŵagopolelaga kuti mundu jwalijose akwete lilayika lyalikusamkamucisya. Mmalo mwakwe jwalakwe jwagopolelaga kuti malayika gakusakola lung’wanu ni jwakulijiganya jwakwe jwalijose. M’yoyo ŵakulambila ŵasyesyene, nganaŵa aŵisile umi wawo pangosi mwamelepe pakuganisya kuti malayika ga Mlungu mpaka gakamucisye.

Ana yeleyi yikugopolela kuti malayika ngaŵa mkwakamucisya ŵandu? Iyayi. (Salimo 91:11) Ŵandu ŵane akusasimicisya ni mtima wosope kuti Mlungu ŵalongolele soni kwateteya pakamulicisya masengo malayika gakwe. Kenneth, jwatumkolasile mungani jandanda jula, ali jumo mwa ŵandu ŵakusalipikana camti m’yoyo. Atamose kuti nganituŵa tumanyilile yosope yagakusatenda malayika pakwakamucisya ŵandu, nambo komboleka kuti yakusayikupilila ŵanduyi yili yisyene. Ŵamboni sya Yehofa ndaŵi syejinji akusalola umboni wakulosya kuti malayika, gakusakamucisya pakukamula masengo gawo gakulalicila. Nambope pakuŵa malayika ngaŵa mkugawona, nganituŵa tumanyilile yosope yagakusatenda pakutukamucisya pa yindu yakulekanganalekangana. Atamose yili m’yoyo, nganikuŵa kulemwa kum’yamicila Mlungu Jwamaciligose pa cikamucisyo cilicose catupele.—Akolose 3:15; Yakobo 1:17, 18.