Yatukusosekwa Kutenda Kuti Misongano Jakosecela Undumetume wa Mumgunda Jiŵe Jakamucisya

1. Ana misongano ja undumetume wa mumgunda jikwete cakulinga catuli?

¹ Pandaŵi jine, Yesu ŵasongene pampepe ni ŵakumkuya ŵakwe 70 mkanajawule kukulalicila. (Luk. 10:1-11) Ŵalimbikasisye mwakwakumbusya kuti ngasaŵa jika soni kuti akulongolelegwa ni ‘Msyene yagowola,’ jwali Yehofa. Ŵapele malamusi gagakamucisye kuti aŵe ŵakuŵajilwa kutenda masengogo, soni ŵagaŵile “ŵaŵili ŵaŵili.” Lelo jinosoni, misongano jatukusatenda mkanitujinjile mu undumetume jikusakwanilisya cakulinga mpela celeci, cacili kutulimbikasya, kutukosecelesya, soni kutukamucisya kuŵa ŵakulinganicikwa.

2. Ana msongano wa undumetume wa mumgunda uŵeje welewu catuli?

² Ndema ajino, msongano wa undumetume wa mumgunda ukusatendekwa kwa maminisi 10 mpaka 15, yayikupwatikapo gaŵana mtumakuga, kusala mkuli wakulalicila, soni lipopelo. Sambano yeleyi ciyicenje. Kutandila mu April msonganowu ciwutendekweje kwa maminisi 5 mpaka 7. Nambo naga msonganowu ukutendekwa panyuma pa msongano wa mpingo, akusosekwa kujipiya ndaŵi jakwe mnope, ligongo lyakuti ŵandu akusaŵa asangalele kala pakutagulilana Malemba. Kutenda misonganoji kwa ndaŵi jamnono cikukamucisye wosope kuti amalileje ndaŵi jejinji mu undumetume. Nambosoni yiciŵaga yakamucisya kwa apayiniya ni ŵakulalicila ŵane ŵatandite kulalicila mkaniwutande msongano wa undumetume wa mumgundawu, ligongo ngasajimicila kulalicila kwa ndaŵi jelewu.

3. Ana misongano jakosecela undumetume wa mumgunda mpaka jilinganyidweje catuli kuti jikamucisyeje ŵakulalicila?

³ Misongano jakosecela undumetume wa mumgunda jikusosekwa jilinganyidweje mwakamucisya mnope ŵakulalicila. M’mipingo jejinji yili yakamucisya kuti tumakuga twa undumetume wa mumgunda tusonganeje malo gakulekangana mmalo mwakusongana pamo. Yeleyi mpaka yikamucisye kuti ŵakulalicila akajendaga mnope pakwawula ku msongano wakosecela undumetume ni kumkuli wakulalicila. Ŵakulalicila komboleka kwagaŵanya mwacitema, soni jwakulolela likuga mpaka aloleleje cenene kakugako. Acakulungwa ŵa mumpingo mpaka aganicisye mwayiŵelele yindu kumangwawoko nikulola yakuŵajilwa mnope kutenda. Mkanamalisye msonganowu ni lipopelo lyakata, jwalijose aŵe ali mkumanyilila kwakwawula kukulalicila soni jwakwenda najo.

4. Ligongo cici ngatukusosekwa kujiwona misongano jakosecela undumetume kuŵa jangasosekwa pakujilandanya ni misongano jine ja mpingo?

⁴ Wuli Wakusosekwa Mpela Misongano Jine ja Mpingo: Pakuŵa misongano ja undumetume wa mumgunda jikusatendekwa pakusaka kwakamucisya ŵakwawula mu undumetume, yili yakomboleka kuti ŵane mumpingo ngaŵa mkusimanikwapo. Nambope, yeleyi ngayikugopolela kuti tujiwoneje misonganoji kuŵa jangasosekwa mnope pakujilandanya ni misongano jine ja mpingo. Misongano ja undumetume wa mumgunda mpela mwajiŵelele misongano jine josope jili jakutyocela kwa Yehofa jajikusatulimbikasya kunonyelana ni kutenda yambone. (Ahe. 10:24, 25) M’yoyo, jwakutendesya msonganowu akusosekwa kosecela cenene kuti yakutagulilanayo yimcimbicisye Yehofa soni yikamucisye ŵandu pamsonganowo. Naga yili yakomboleka, ŵakulalicila ŵacajawule mu undumetume akusosekwa kulingalinga kuti asimanikwe pamsonganowu.

5. (a) Ana jwakulolela undumetume akwete masengo gatuli pakulinganya misongano jakosecela undumetume? (b) Ana mlongo atendesyeje catuli msongano wakosecela undumetume?

⁵ Jwakutendesya Akusosekwa Kosecela: Kuti mundu akosecele cenene mbali ja pamisongano, akusosekwa kupegwa mbalijo mkanipaŵe. Akusosekwa kutendasoni m’yoyo ni msongano wakosecela undumetume wa mumgunda. Makuga ga undumetume wa mumgunda pagakucingangana kwajika, ŵakulolela makuga kapena ŵakwakamucisya akusatendesya msongano wa likugalyo. Nambo naga mpingo wucicingangana pampepe pakosecela kwawula mu undumetume, jwakulolela undumetume cacimsalila jwine kuti atendesye msonganowo. Ŵakulolela undumetume ŵane akusapeleka ndandanda kwa ŵakutendesya wosope, soni akusaleka ndandandajo pa bolodi ja yimanyisyo. Jwakulolela undumetume akusosekwa ganisya cenene pakusagula ŵakutendesya misongano jeleji, acikumbucilaga kuti, kuti misonganoji jiŵe jambone yikwegama pa kajiganye ni kalinganye ka yindu ka jwakutendesyajo. Naga pangali jwamkulungwa jwa mumpingo, jwakutumicila jwakamucisya, kapena m’bale jwam’batiswe jwakuŵajilwa jwakuti atendesyeje masiku gane, jwakulolela undumetume komboleka kusagula mlongo jwam’batiswe jwine jwakuŵajilwa kuti atendesye. Alole ngani jakuti ““Ana Mlongo Mpaka Atendesye Ndaŵi Japi?”

Misongano ja undumetume wa mumgunda tukajiwonaga kuŵa jangasosekwa mnope pakujilandanya ni misongano jine ja mpingo

6. Ligongo cici yili yakusosekwa kuti jwakutendesya msongano wa undumetume wa mumgunda akoseceleje cenene?

⁶ Patupocele ngani mu Sukulu ja Undumetume wa Mlungu kapena mu Msongano wa Undumetume, tukusayiwona kuŵa yakusosekwa soni tukusakosecela cenene. Ngatukusaganicisya yacitukaŵecete tuli mkwawula kumsonganowo. Naga atupele mbali kuti tukatendesye msongano wa undumetume wa mumgunda tuyiwoneje m’yoyosoni. Sambano pakuŵa ndaŵi ja msongano wa undumetume wa mumgunda ajijipiye, tukusosekwa kosecela cenene kuti msonganowo uŵe wakamucisya soni umale pandaŵi jakwe. Kuti tukosecelesoni cenene tukusosekwa kumanyilila mkanipaŵe mkuli wacitukalalicile.

7. Ana jwakutendesya msongano wakosecela undumetume wa mumgunda mpaka atagulilane yindu yatuli ni ŵandu?

⁷ Yatukusosekwa Kutagulilana: Pakuŵa yindu yikusalekangana m’mikuli jakulekanganalekangana, kapolo jwakulupicika nganapeleka yakutagulilana pamsongano wuliwose wa undumetume wa mumgunda. Libokosi lyakuti “Yampaka Atagulilane Pamsongano Wakosecela Undumetume wa Mumgunda” likusala yine yampaka tutagulilane. Ndaŵi syejinji, msonganowu ciwutendekweje mwakutagulilana. Ndaŵi sine komboleka kutenda cilosyo cekosecele cenene kapena kulolela fidiyo jakuŵajilwa kutyocela pa webusayiti jetu ja jw.org. Pakosecela msonganowu, jwakutendesya akusosekwa ganicisya yampaka yalimbikasye ni kwakamucisya ŵakwawula mu undumetume lisiku lyelelyo.

Pakosecela msongano wa undumetume wa mumgunda, jwakutendesya akusosekwa ganicisya yampaka yalimbikasye, soni kwakamucisya ŵakwawula mu undumetume lisiku lyelelyo

8. Ana yindu yapi yampaka yiŵe yakusosekwa kutagulilana pamisongano ja undumetume wa mumgunda ja Lyakuŵeluka, soni Lyamlungu?

⁸ Mwambone, Lyakuŵeluka, ŵakulalicila ŵajinji akusagaŵila magasini ga Sanja ja Mlonda ni Galamukani! Ŵajinji ŵakusajawula mu undumetume Lyakuŵeluka ŵangajawula kukulalicila mkati mwa cijuma, m’yoyo mpaka aliŵalileje yampaka aŵecete mu undumetume yaŵatagulilene pa Kulambila kwa Peŵasa. M’yoyo, mpaka yiŵe yakamucisya kuti jwakutendesya msonganowu asale cisyasyo cimo mwa yisyasyo yampaka tuŵecete yayikusasimanikwa kumbesi kwa Undumetume wa Ucimwene. Yindu yine yampaka atagulilane pakuŵeceta maloŵe gagaŵilila magasini yili ya mu nyusi, yayitendekwe, kapena yakwamba holide kapena maloŵe gakumalisya gakutukamucisya kutenda ulendo wakuwilisya naga ali akundile kupocela magasini. Naga ŵane pa likugalyo aŵele mkukamulicisya masengo magasini gatugaŵila kwa ŵandu pandemajo, jwakutendesya msonganowo mpaka ŵawusye ŵanduwo kuti asale nganisyo sine syasiweni kuŵa syakamucisya pagaŵila kapena mpaka asale yayatendecele yakulimbikasya. Lyamlungu, jwakutendesya msonganowu mpaka atendesoni yeleyi pakwamba ya buku jatukugaŵila mwesi welewo. Pakuŵa mabuku gakulijiganyila mpela Ngani Syambone, Apikanileje Mlungu, soni Baibulo Jikusajiganya Cici komboleka gaŵila lisiku lililyose, jwakutendesya msonganowu komboleka kutagulila mwakata kagaŵile ka jimo mwa mabukuga.

9. Ana mpaka tutagulilane yatuli naga kumbesi kwa cijuma mpingo ukugaŵila cindu cine cakwe capajika?

⁹ Naga kumbesi kwa cijuma mpingo ukugaŵila cindu cine cakwe capajika, jwakutendesya msonganowo komboleka kutagulila yampaka tuŵecete pagaŵila magasini yimpepe ni kapepala kakuŵilanjila ŵandu kapena kapepala kane kapajika, kapena mpaka atagulile yampaka tutende naga mundu alosisye kuti akusaka kumanyilila yejinji. Kombolekasoni kwamba kusala yakutendekwa yayigombelecesya umbone wa masengo gapajikago.

10, 11. Ligongo cici kukosecela kwa ŵakulalicila kuli kwakusosekwa kuti msongano wa undumetume wa mumgunda uŵe wakamucisya?

¹⁰ Kosecela kwa Ŵakulalicila: Ŵakulalicila akwetesoni mbali jakusosekwa kuti msongano wakosecela undumetume wa mumgunda uŵe wakamucisya. Mwakukosecela undumetume mkanipaŵe, mwine pandaŵi ja kulambila kwa peŵasa, cacikola kanekakwe kakuŵeceta kwa ŵane pamsonganowu. Kukosecela cenene kukupwatikasoni kupata cile magasini ni mabuku mkanituyice pamsonganowu kuti wosope tunyakuceje kwawula mu undumetume mwangacelewa.

¹¹ Yili yakusosekwasoni kuti tuyiceje pamsongano wakosecela undumetume wa mumgunda kuli kusigele kandaŵi mkaniwutande. Yili cenene kuti tukusalingalinga kwika pandaŵi jakwe pamisongano ja mpingo. Nambo mpaka yiŵe yakusokonasya naga tukwika pamsonganowu mwakucelewa. Ligongo cici? M’bale jwakulongolela akusaganicisya yindu yejinji mkanagaŵe likugalyo. Naga pana ŵakulalicila ŵamnono, mpaka asagule kuti wosope ajawule kumkuli wangalalicidwa mnope. Naga ŵane ajesile wapasi pakwika kumsonganowu, nambo kwakuja kulalicila kuli kutali, mpaka ŵagaŵe yimpepe ni ŵakulalicila ŵajesile pa galimoto. Naga mkuli wakuja kukulalicila wuli wakogoya, mpaka ŵagaŵe abale kuti ajende ni alongo kapena mpaka ŵasalile abale kuti akalalicileje ciŵandika alongo. Ŵakulalicila ŵakulalicila jende ni alongo kapena mpaka ŵasalile abale kuti akalalicileje ciŵandwawukwete nyumba syangali masitepe gejinji. Ŵakulalicila ŵacasambano mpaka ŵasalile kuti ajende yimpepe ni ŵakulalicila ŵakala. Nambo naga ŵakulalicila akwika mwakucelewa, mpaka pasosekwe kucenga mwine ni mwine kapena kulinganyasoni ligongo lya kwika kwa ŵandu ŵakucelewawo. Yili yisyene kuti ndaŵi sine komboleka kola magongo gakupikanika gakuyicila mwakucelewa. Nambope, naga ndaŵi syosope tukusacelewa, komboleka kuliwusya acimsyewe naga tukusacelewa ligongo lyangayamicila misongano ja undumetume wa mumgunda kapena ligongo tukulepela kulinganya yindu yetu mkanipaŵe.

12. Ana akusosekwa ganicisya cici naga ndaŵi syosope akusasagula jika jwakwenda najo?

¹² Ŵakulalicila ŵasongene kuti akosecele undumetume komboleka kusagula jwakwenda najo msongano mkaniwutande, kapena kwagaŵila jwakwenda najo. Naga ndaŵi syosope akusagula jika jwakwenda najo, ana yili yakomboleka kuti ‘awugule mitima jawo’ mwakwenda ni ŵakulalicila ŵakulekanganalekangana mmalo mwakwamba kwenda ni acimjawo ŵapamtima ndaŵi syosope? (2 Akoli. 6:11-13) Ana ndaŵi sine mpaka ajendeje ni jwakulalicila jwacasambano kuti amkamucisye kongolela kajiganye kakwe? (1 Akoli. 10:24; 1 Tim. 4:13, 15) Apikanile malamusi gosope gaciŵape, atamose malamusi gakwamba pakutandila kulalicila. Pawumasile msongano, aŵambale kucenga pajika ŵakwenda nawo, soni ajawuleje mwacitema kumkuli wacakalalicile.

13. Naga wosope akujiwona misongano ja undumetume wa mumgunda kuŵa jakusosekwa soni akutenda mbali jawo, ana misonganoji mpaka jitukamucisye catuli?

¹³ Panyuma pakulalicila, ŵandu 70 ŵaŵatumisye Yesu kukulalicila ŵala “ŵawusile mwa lukondwa.” (Luk. 10:17) Mwangakayicila, msongano waŵatesile Yesu ni jemanjajo mkanatande kulalicila waliji wakamucisya. Moŵa aganosoni, misongano ja undumetume wa mumgunda jikusakamucisya. Naga wosope tukuyiwona kuŵa yakusosekwa, soni tukutenda mbali jetu, misongano ja undumetume wa mumgunda jicitulimbikasya, kutukosecelesya, soni kutukamucisya kuŵa ŵakulinganicikwa kuti tukwanilisye masengo getu gakutendela “umboni kwa ŵandu ŵa mitundu josope.”—Mat. 24:14, NW.

Ana Mlongo Mpaka Atendesye Ndaŵi Japi?

Mlongo akusosekwa kuwala kandu kumtwe, soni akusosekwa kutama pasi pakutendesya msongano wakosecela undumetume wa mumgunda. Mpaka asagule kutagulilana yindu yampakasoni m’bale asagule kuyitagulilana pamsonganowu. Pakusaka kuŵambala kuwoneka mpela kuti akwalamula ŵakusimanikwawo, akusosekwa kutagulilanaga ni likugalyo. Naga akum’ŵenda mlongo jwine jwam’batiswe kuti apelece lipopelo, mlongojo akusosekwasoni kuwala kandu kumtwe. Naga m’bale jwam’batiswe akuyika msongano wuli utandite, mlongojo cacim’ŵenda m’balejo kuti ajendelecele kutendesya msonganowo mpaka kumbesi. Jwakulolela undumetume akusosekwa kumanyililaga yindu yayikutendekwa, soni asaleje yampaka yikamucisye kuti yindu yikawonekaga yakusimonjesya. Mwambone, m’bale jwamnandi mnope jwakulalicila, mpaka asimanikwe pamsongano wakutendesya mlongo juŵam’ŵendile kuti atendesyeje, nambo acakulungwa ŵa mumpingo akuyiwona kuti m’bale jwamnandijo ngakuŵajilwa kutendesya msongano. Naga ndamo jili mpela mwelemu, jwakulolela undumetume mpaka asale kuti mlongojo atendesye msonganowo, nambo m’balejo apelece lipopelo naga acakulungwa akuyiwona kuti m’balejo ali jwakuŵajilwa kupeleka lipopelo. Kapena pamsonganowo pana m’bale jwamkulungwa juŵamsalile kuti ngakuŵajilwa kutendesya msongano kapena kupeleka lipopelo lyakwimila mpingo ligongo lya magongo gakugamanya acakulungwa ŵa mumpingowo. Acakulungwawo ammanyisye mlongo jwakusatendesya msonganowo kuti atendesyejepe msonganowo soni lipopelo atamose m’balejo ali papopo. Nambo acakulungwa ŵa mumpingowo akajuwula yindu yamtemela kwa mlongojo. Acakulungwa ŵa mumpingowo kombolekasoni kummanyisya m’balejo masiku gacatendesyeje alongo msongano wakosecela undumetume.

Yampaka Atagulilane Pamsongano Wakosecela Undumetume wa Mumgunda:

Yampaka aŵecete yayikusasimanikwa mu Undumetume wa Ucimwene.
Kulolela ni kutagulilana fidiyo jakwamba ya undumetume kutyocela pa jw.org.
Kaŵecetane kambone ni ŵandu, mpela maloŵe gandanda, kuŵeceta yakamucisya kuti tuwujileko, kapena kusala ya cakupeleka cakusaka kwa mundu panyuma pakuti apocele mabuku getu.
Lilemba lyakulimbikasya kapena lyakamucisya lyakamulana ni kulalicila.
Yakutendekwa mu undumetume wa mumgunda ya kumangwawoko kapena ya m’mabuku mwetu.
Yindu yakamucisya ya mungani ja mu Undumetume wa Ucimwene.
Yindu yakamucisya ya mungani ja pa Msongano wa Undumetume wa pacangakaŵa.
Ngani syakwayana ni kulalicila syakusimanikwa mu Sanja ja Mlonda.
Ngani syakwayana ni kulalicila syakusimanikwa m’mabuku mpela Sukulu ya Utumiki soni jakuti ‘Bwera Ukhale Wotsatira Wanga.’
Mbali jine ja pa jw.org jampaka jiŵe jakamucisya mu undumetume.
Mbali jine ja Baibulo jelinganyesoni ja Baibulo la Dziko Latsopano jampaka jiŵe jakamucisya mu undumetume.
Yampaka aŵecete kwa mundu jwine kuti atande kutagulilana mumkuli mwawo, mpela mundu jwangakulupilila Mlungu, mundu jwakulupilila kuti yindu ya umi yapali mwakwamba kucenga kutyocela ku yindu yine, mundu jwa Cihindu, kapena jwa Cibuda.
Yampaka tuŵecete kwa mundu jwangakusaka kuti tutagulilane.
Yampaka tutende kuti tumkamucisye jwatujesile najo kuti apakomboleje cenene kulalicila payice pamlango wa mundu.
Yampaka atende naga asimene ni mundu jwakuŵeceta ciŵeceto cine.
Yampaka tutende pakutenda undumetume wine wakulalicila wampaka ŵane aŵe ali mkutenda, mpela pamasengo gakuwungunya ŵandu, kutendela umboni pa telefoni, kutendela umboni pelanguka, maulendo gakuwilisya, kapena majiganyo ga Baibulo.
Kwakumbusya Aklistu acimjetu pangani ja citeteyo, kucengacenga undumetume wetu, ndamo syambone, kola nganisyo syambone, kapena yine yati mpela yeleyi.