Mbali ja buku ja Yesaya kutyochela mu mpukutu wa ku Nyasa Jewe soni ajigopolele mu Chalebiki cha masiku agano. Kusala yisyene, Maloŵe ga Mlungu nganigachenga
Ana Maloŵe ga Mlungu Gachenjile?
Ŵandu ŵane akusasaka kumanyilila naga Maloŵe ga Mlungu nganigachenga. Jwakutumichila Yesaya jwaŵechete kuti Maloŵe ga Mlungu “tigachiŵa chitamile mpaka kalakala.” (Yesaya 40:8) Ana mpaka tuŵe ŵakusimichisya chamtuli kuti maloŵe ga Mlungu nganigachenga?
Mlungu akwete machili gakusunga soni kugachenjela Maloŵe gakwe. Ŵaŵakopelaga Maloŵe ga Mlungu payala, ŵalolechesyaga kuti ngakuchenga chilichose. Nambope ligongo lyakuti ŵaŵakopelaga Maloŵega ŵaliji ŵandu ŵangali umlama, papali yakusawusya yine.
ANA MPAKA TUŴE ŴAKUSIMICHISYA CHAMTULI KUTI MALOŴE GA MLUNGU NGANIGACHENGA?
Maloŵe ga Mlungu gagalembedwe pa mipukutu payala, gakusimanikwa gejinji. Kuti amanyilile naga Maloŵe ga Mlungu nganigachenga, akusosekwa kuwungunya pakamulichisya masengo mipukutu jakalakala. Kuti amanyilile yejinji ajawule pa jw.org ni awungunye ngani jakuti “Ŵandu Ŵalepele Kucenga Utenga wa M’Baibulo.”
Mwachisyasyo, mu 1947 mipukutu jine jasimanikwe mumbanga, chiŵandika ni Nyasa Jewe. M’mipukutuji mwasimanikwe maloŵe ga Mlungu gagalembedwe yaka yakupunda 2,000 munyumamo.
Ŵandu ŵakuyikuya mnope yindu, ŵagalandenye Maloŵe ga Mlungu gagasimanikwe m’mipukutu jakalakalaji ni Maloŵe ga Mlungu ga masiku agano.a Ana ŵapatile yamtuli? Jemanjaji ŵapatile yakuti, Maloŵe ga Mlungu gatukwete masiku agano, gali gakulandana ni Maloŵe ga Mlungu gagalembedwe pandanda pene. Yeleyi yikulosya kuti Maloŵe ga Mlungu nganigachenga. Yikutusimichisyasoni kuti Mlungu jwalolechesye kuti Maloŵe gakwe gakachenga.
Myoyo pakuŵalanga Maloŵe ga Mlungu aŵeje ŵakusimichisya kuti nganigachenga. Sambano kwende tulole yampaka tulijiganye yakwamba Mlungu kutyochela kwa atumiki ŵakwe.
a Buku ja The Complete Dead Sea Scrolls in English jijalembedwe ni Geza Vermes peji 16.