NGANI JA PANDANDA | YAMPAKA ATENDE KUTI AKOLE YISYOŴE YAMBONE
1 Akaganisyaga Kuti Mpaka Acenje Yosope Kamo ni Kamo
Komboleka ganisya kuti mpaka akombole kucenga yisyoŵe yawo mwacitemacitema. Mpaka aganisyeje kuti, ‘Cijuma acino cindece kwemba, kutukana, soni gona mwakokoŵa. Ni cindande kutenda maseŵela gakulimbisya cilu, soni kwajimbila foni anganga kaŵilikaŵili.’ Nambo kulinga kutenda yosopeyi ndaŵi jimo, mpaka atenguce!
MALOŴE GAKAMUCISYA: “Lunda lukusaŵa ni ŵandu ŵakulinandiya.”—Miyambo 11:2.
Mundu jwakulinandiya jwangaganisya kuti mpaka acenje yosope kamo ni kamo. Akusamanyilila kuti pakusasosekwa ndaŵi, macili soni yindu yine kuti yosope yimale. M’yoyo, mmalo mwakulikanganicisya kuti acenje yisyoŵe yakwe ndaŵi jimo, akusacenga mwapanandipanandi.
Kulinga kucenga yosope ndaŵi jimo, mpaka atenguce!
YAMPAKA ATENDE
Atande ni kucenga cisyoŵe cimo kapena yiŵili. Mpaka atende ayi:
Alembe ndandanda siŵili. Jimo ja yisyoŵe yambone yakusaka kola, jinejo ja yisyoŵe yangaŵajilwa yakusaka kuleka. Akataŵika, alembe yisyoŵe yejinji mwakusacila.
Kaneko, asagule yisyoŵe yekulungwakulungwa ni kuyiŵika kundanda.
Asagule cisyoŵe cimo kapena yiŵili, ni mwapanandipanandi, alinjilile kutenda yiliyose yampaka akombole kuti acenje yisyoŵeyo. Kaneko ajigalesoni cisyoŵe cine cimo kapena yiŵili.
Kuti acenje mwangasawusya yisyoŵe yangaŵajilwa, mpaka alinje kuyicenganya ni yisyoŵe yambone.Mwambone, naga akwete cisyoŵe cakulolela TV kwa ndaŵi jelewu, mpaka alinje kutenda yindu yine pandaŵi jakusalolelajo. Mwine, paŵelwice kumasengo, mmalo mwakwicila pa TV, ayicileje kwajimbila foni acalongo acimjawo.