MWENYE JWAKUSAKALA AKULAMULILA EGUPUTO

ŴANDUŴA apano akwakanganicisya acimjawo kukamula masengo. Agambe kumlola mundu jwakumkuŵita mjakwe yikotijo! Ŵamasengowo ali ŵa muliŵasa lya Yakobo, soni akusakolanjikwa kuŵa Ayisalayeli. Nambo ŵandu ŵakwakanganicisya acimjawo kukamula masengowo ali Aeguputo. Ayisalayeli ali acikapolo ŵa Aeguputo. Ana yeleyi yatendekwe catuli?

Kwa yaka yejinji liŵasa lyekulungwa lya Yakobo lyatamaga mwamtunjelele ku Eguputo. Yusufu, juŵaliji mundu jwakucimbicika mnope mu Eguputo, jwaŵili kwa Falao, ŵasamalilaga Ayisalayeli. Sambano Yusufu ŵawile. Kaneko Falao jwasambano, jwanganaŵanonyelaga Ayisalayeli ŵaŵele mwenye jwa Eguputo.

Sambano Falao jwakusakalaju ŵatesile Ayisalayeli kuŵa acikapolo. Ni ŵasagwile ŵandu ŵane ŵanganakola canasa, soni ŵangalwe kuti ŵaloleleje. Ŵakanganicisyaga Ayisalayeli kukamula masengo gakupesya mnope gakutaŵa misinda ja Falao. Nambope ciŵalanjilo ca Ayisalayeli cajendelecele kutupa. Pajapitaga ndaŵi, Aeguputo ŵajogopaga kuti Ayisalayeli cacitupa mnope ni kuŵa ŵandu ŵamacili mnope.

Ana akumanyilila yaŵatesile Falao? Ŵasalile acakongwe ŵaŵakamucisyaga acakongwe ŵa Ciyisalayeli pakuŵeleka kuti: ‘Akusosekwa awulajeje mwanace jwalijose jwamlume jucapagweje.’ Nambo jemanjaji ŵaliji acakongwe ŵambone, ni nganawulagaga makandigo.

Sambano Falao ŵalamwile ŵandu ŵakwe acitiji: ‘Ajigale makandi gacilume gosope ga Ayisalayeli nikugawulaga. Nambo agambeje kugaleka makandi gacikongwe.’ Ana yeleyi nganiyiŵa yakogoya kuyilamula? Kwende tulole yayatendekwe kutilikandi line lyacilume likulupuce.