Lahabu Ŵakulupilile Yehofa

Kwende tuwanicisye kuti tuli mumsinda wa Yeliko. Msindawu uli m’cilambo ca Kanani cele ŵandu ŵakwe ŵangakulupilila Yehofa. Mumsinda welewu mukutamasoni jwamkongwe jwine lina lyakwe Lahabu.

Paŵaliji msikana, Lahabu ŵapikene yiŵatesile Musa pakwagopola Ayisalayeli ku Eguputo ni kwajombosya Nyasa Jecejewu. Lahabu ŵapikenesoni yaŵatesile Yehofa pakwakamucisya Ayisalayeli kupunda ngondo syakulimbana ni acim’magongo ŵawo. Kaneko ŵapikene kuti Ayisalayeli akutama ciŵandika msinda wa Yeliko!

Lisiku line cakumagulo, Ayisalayeli ŵaŵili ŵapite ku Yeliko kukusonda msindawo. Jemanjaji paŵayice pa nyumba ja Lahabu, jwalakwe ŵaŵendile kuti apumule panyumbajo. Sikati cilo, mwenye jwa ku Yeliko ŵayimanyi kuti mumsindamo mujinjile ŵakusonda, soni kuti ali kunyumba ja Lahabu. M’yoyo mwenyejo ŵatumisye acalume kuti akakamule ŵanduwo. Ni Lahabu ŵasunjile ŵakusonda ŵaŵiliwo ku malo gatyatyatya penani pa nyumba jakwe. Kaneko ŵasalile acalumewo kuti, ‘Ŵakusondawo ŵaliji panopano, nambo akopwece kala mumsindamu. Naga ciŵakuye mpaka ŵasimane ni kwakamula!’ Ana mkumanyilila ligongo lyakwe Lahabu akwacenjela ŵakusondaŵa?— Ligongo lyakuti jwalakwe ŵakulupililaga kuti Yehofa cacipeleka cilambo ca Kanani m’miyala mwa Ayisalayeli.

Ŵakusondawo mkanakopoce m’nyumba ja Lahabu ŵamsalile Lahabujo kuti jwalakwe ni ŵamwiŵasa mwakwe cacikulupuka Yeliko pacacijonanjikwa. Ana mkumanyilila yiŵamsalile kuti atende?— Jemanjajo ŵatite: ‘Mjigale lukonji lwecejewu ni mlukolece kusa kwa liwindo lya nyumba jenu. Naga mkutenda yeleyi, jwalijose jucaciŵa m’nyumba jenuji cacikulupuka.’ Lahabu ŵatesile mwakamulana ni yaŵamsalile ŵakusondawo. Ana mkumanyilila yayatendekwe panyuma pakwe?—

Pali papite masiku panandi, Ayisalayeli ŵajesile mwakusyungulila msindawo mwangatenda masegwe. Ŵajesile mwakusyungulila msindawo kwa masiku 6, kampepe palisiku lililyose. Nambo palisiku lya 7 ŵasyungulile msindawo kakwana ka 7. Kaneko wosope ŵagumisile mnope. Pelepo Yehofa ŵatendekasisye kuti mapupa ga msindawo gagwile pasi. Nambo nyumba jajaliji ni lukonji lwecejewu paliwindo lyakwe jila nganijigwa! Ana mkujiwona nyumbajo pa cipikicapa?— Lahabu ni ŵane ŵa mwiŵasa mwakwe akulupwice!

Ana mkulijiganya cici kwa Lahabu?— Lahabu ŵakulupilile Yehofa ligongo lya yindu yakusimonjesya yiŵalijigenye pakwamba ya Yehofa. M’mwejosoni mkulijiganya yejinji pakwamba ya Yehofa. Ana mkusamkulupilila jwalakwe mpela muŵatendele Lahabu?— Tukumanyilila kuti mkusakulupilila Yehofa!