LIJIGANYO 2

Kuŵeceta Mwakambilana

2 Akolinto 2:17

YACITULIJIGANYE: Aŵeceteje mwacipago, soni mwakulosya mwakupikanila mumtima mwakamulana ni ngani jawo soni ŵakupikanila ŵawo.

Apopeleje soni akoseceleje cenene. Amŵendeje Mlungu kuti ŵakamucisye kuŵika nganisyo syawo pa utengawo ngaŵa pa ndetemu syampaka syakamule. Aŵiceje nganisyo syawo pa songa syekulungwakulungwa syakusosekwa kuŵeceta mu ngani jawo. Aŵeceteje m’maloŵe gawogawope ngaŵa kwambaga kuŵalanga mwalembele.

Naga akusaka kuti akaŵalanje Baibulo kapena buku, akoseceleje cenene kuti akakolanjeje maloŵe mwakupikanika cenene. Naga akamwile maloŵe ga ŵandu ŵane munganijo, aŵalanje mwakamulana ni msimu wakwe nambo ngaŵa mwakwamba kwasecesya ŵandu.
Aŵeceteje mwakutyocela mumtima. Aganicisyeje ligongo lyakwe ŵakupikanila ŵawo akusosekwa kupikana utengawo. Aganicisyeje ya ŵanduwo mwamti kajime, makono soni ngope jawo yilosyeje kuti akwete cinonyelo pa ŵanduwo soni ŵamwetulileje.

Kuŵeceta mwacipago ngakukusagopolela kuŵeceta mwangasamala. Acimbicisyeje utenga pakamulicisya masengo maloŵe gangasawusya kupikana soni malamusi ga kaŵecete ga ciŵeceto cawo.
Ŵaloleje ŵakupikanila ŵawo. Aloleganeje meso ni meso ni ŵakupikanila ŵawo naga yili yakuŵajilwa kumangwawoko. Pakuŵeceta ngani, aloleganeje meso ni mundu jumojumo m’malo mwakwamba kulola ŵandu ŵajinji pandaŵi jimo.