1 Jikusakamucisya Kuŵambala Yakusawusya

KUMWA MNOPE UKANA

Delphine, jwatumkolasile mungani jipite jila, jwamwaga mnope ukana kuti amasye kulagasika nganisyo. Baibulo ngajikusalekasya kumwa ukana mwacikatikati, nambo jikusasalasoni kuti, “Mkatama pasikati pa ŵandu ŵakumwa mnope ukana.” (Miyambo 23:20) Kumwa mnope ukana, kutendekasisye kuti ŵandu asimaneje ni yakusawusya m’cilu mwawo, kusokonasisye mkamulano wa ŵandu soni kutendekasisye kuti caka cilicose ŵandu ŵajinji aweje mkanaŵe kalambala. Yikaŵe kuti ŵandu akusakamulicisya masengo lunda lwa m’Baibulo, akakombwele kuŵambala yeleyi.

Yeleyi ni yaŵatesile Delphine. Jwalakwe jwatite, “Nayimanyi kuti ukana ngamkaniwungamucisya kumasya kulagasika nganisyo kwangu. M’yoyo, natandite kamulicisya masengo lunda lwa m’Baibulo lwa pa Afilipi 4:6, 7, lwakuti, ‘Akadandawulaga ni cilicose, nambo . . . yakuŵenda yawo yimanyice kwa Mlungu.’ Cilo cilicose pasyayicilaga nganisyo syakusakala soni panalagasikaga nganisyo, najimukaga ni kumŵenda Yehofa kuti angamucisye. Namsalilaga yosope pakwamba mwanapikanilaga mumtima soni mwayatite pakumasya lunda. Namcondelelaga Yehofa kuti angamucisye kupata matala gakungamucisya kuti nalipikaneje cenene. Yeleyi yangamucisye kuti ŵiceje nganisyo syangu pa yindu yangwete ngaŵa pa yindu yanganingola. Nasimicisye kuti ngasimwasoni ukana kuti ngajasa upile wanakwete wakola mtendele wamumtima.”

YAMSESE

Kutenda yamsese kukusatendekasya ŵandu kulijimba magambo soni kulagasika nganisyo. Nambo kamulicisya masengo yajikusajiganya Baibulo mpaka kutukamucisye kuŵambala ndamo syampaka situtendekasye kutenda yamsese, mpela kopana soni kulola yindu yakuŵagula. Nambosoni kuŵambala yakusawusya yayikusayika ligongo lyakutenda yamsese. Mnyamata jwine lina lyakwe Samuel jwatite, “Yaliji yangasawusya kutanda kopana ni mundu jwine. Ndaŵi sine nganisakaga yakopana, nambo msikana jwine patandite kungopa najigalikaga.” Samuel ŵakwete cisyoŵe cakopana atamose pandaŵi jakuti jwalakwejo nganasakaga kuti atende yeleyo. Nambope ndamoji jamlagasyaga nganisyo. Jwalakwe jwatite, “Kutenda yeleyi kwaliji kwakogoya ligongo kukusamtendekasya mundu kuti atande kulinonyela.”

Samuel jwaŵalasile ngani ja ŵacinyamata pa webusayiti ja jw.org. Kaneko jwaganicisye yajikusasala Baibulo pa Miyambo 20:11, yakuti, “Atamose mnyamata akusamanyika ni masengo gakwe, naga ndamo jakwe jili jeswela soni jambone.” Ana lilembali lyamkamucisye camtuli? Samuel jwayimanyi kuti ndamo jakopana nganijiŵa jeswela, soni nganijiŵa jambone. Jwalakwe jwatite, “Ndamo jakopana nganijiŵa jimkamucisye mundu kuti caŵe jwamlume kapena jwamkongwe jwakulupicika pali peŵasa. Natandite kuganicisya kuti, ‘Ana ndili lombele, ŵamkwangu mpaka apikane wuli ali ambweni ndili mkutenda yeleyi?’ Kuganicisya m’litala lyeleli kwangamucisye kumanyilila kuti cisyoŵeci nganiciŵa cambone. Kujiwona ndamoji mwauwanace ngamkaniyingamucisya.” Samuel jwacenjile ndamoji mwamti yamkamucisye kuŵambala kutenda yamsese.

Mundu jwine lina lyakwe Antonio, jwakwete cisyoŵe cacikamlongolele kutenda yamsese. Jwalakwe jwanonyelaga kulola yakuŵagula. Atamose kuti jwalombele jwamkongwe juŵamnonyelaga, nambope ndaŵi ni katema jwatendaga yeleyi. Jwalakwe jwasasile kuti kuganicisya yajikusasala Baibulo pa 1 Petulo 5:8 kwangamucisye. Lilembali likusasala kuti, “Aŵeje ŵaganisya cenene, aŵeje mesope! Mmagongo jwawo, Satana akwendajenda aku nakuku mpela lisimba lyakutongola, kupita mcisosasosa jwakuti amlye.” Antonio jwatite, “Yiwulili yakuŵagula yili palipose m’cilamboci, soni yikusatamilicika payijinjile munganisyo. Lilembali lyangamucisye kuti ŵambaleje yindu yampaka yindendekasye kulola yakuŵagula. Nalijiganyisye kuti yiwulili yakuŵagula yikusatyocela kwa Satana. Apano ngusamanyilila kuti Yehofape ni jwampaka angamucisye ‘kuŵa jwaganisya cenene, soni kuŵa mesope,’ kuti ngombole kulimbana ni yindu yampaka yisokonasye nganisyo syangu, mtima wangu, soni ulombela wangu.” Pambesi pakwe Antonio, jwalesile cisyoŵe cakwe cakusakala cakulolela yindu yakuŵagula. Yeleyi yamkamucisye kuŵambala yindu yakusawusya yakasimene nayo.

Kusala yisyene, Baibulo jikusajiganya yindu yampaka yitukamucisye kuŵambala yakusawusya. Nambosoni Baibulo mpaka jitukamucisye pakumasya yakusawusya yatukuyiwona kuti ngaŵa mkumala. Kwende tulole mwampaka jitendele yeleyi.