2 Jikusakamucisya Kumasya Yakusawusya

KUDANDAWULA MNOPE

Rosie jwatite, “Ndaŵi syejinji nalagaga mnope nganisyo soni kudandawula ni yindu yakuti nganiyiŵe kutendekwa.” Limo mwa malemba gagamkamucisye jwalakwe lili lya Matayo 6:34, lyalikusati, “Akasadandawula ni ya lisiku lyakuyicisya, pakuŵa lisiku lyakuyicisya licikola yindu yakwe yakulagasya nganisyo. Yakusawusya ya lisiku lililyose yili yakwanila palisikulyo.” Maloŵe ga Yesuga, gamkamucisye Rosie kuti alece kudandawula ni yindu yampaka yitendekwe lisiku lyakuyicisya. Kaneko jwatite, “Yakusawusya yangwete yili yakwanila, m’yoyo ngangusosekwa kulaga nganisyo ni yindu yanganiyiŵe kutendekwa soni mwine ngasiyitendekwa kwene.”

Msikana jwine lina lyakwe Yasmine, jwalagasikagasoni nganisyo. Jwalakwe jwatite, “Cijuma cilicose natamilaga kulila, soni masiku gane cilo nganimbataga lugono.” Ana lilemba lyapi lyalyamkamucisye jwalakwe? Lyaliji lilemba lya 1 Petulo 5:7, lyalikusati, “Atule pa jwalakwe yayikwalagasya nganisyo, pakuŵa jwalakwe akusiŵaganicisyaga.” Jwalakwe jwatite, “Ndaŵi ni katema, napopelaga kwa Yehofa, pambesi pakwe jwalakwe ŵajanjile mapopelo gangu. Pandaŵiji, nalipikene mpela kuti liganga lyawusito alityosisye pamakoyo gangu. Ndaŵi syejinji ngusalagasika nganisyo, nambo ngusamanyilila mwampaka ndendele.”

MBWAJI

Jwamkongwe jwine lina lyakwe Isabella jwatite, “Naganisyaga kuti mbwaji syangu najigalile kwa baba ŵangu. Mmalo mwakuti ndende yindu yakusosekwa, namalilaga ndaŵi jangu pakutenda yindu yakusangalasya. Cisyoŵeci caliji cakusakala ligongo pambesi pakwe nakolaga yejinji yakutenda. Yeleyi yandendekasyaga kulagasika nganisyo soni kuti ngatenda mwakuŵajilwa yindu yakusosekwayo.” Lilemba lyalyamkamucisye jwalakwe lili lya 2 Timoteo 2:15, lyalikusati, “Mtendeje yiliyose yakomboleka kuti mlosye kuti mli jwakwiticika pameso pa Mlungu, jwamasengo jwangali ligongo lyakutendela sooni.” Kaneko Isabella jwasasile kuti, “Nganisakaga kumtendekasya sooni Yehofa.” M’yoyo, Jwalakwe jwalesile cisyoŵe cakweci.

Mwakulandana ni Isabella, msikana jwinesoni lina lyakwe Kelsey jwatite, “Nakwete cisyoŵe cakamula masengo ndaŵi jakwe jili jisigele panandi kumala. Nalilaga, kusoŵa lugono soni kudandawula. Yindu nganiyinjendelaga cenene.” Jwalakwe jwapatile cikamucisyo kupitila mu lilemba lya Miyambo 13:16, lyalikusati, “Mundu jwalunda akusatenda yindu mwaumanyilisi, nambo jwakuloŵela akusalosya usilu wakwe.” Kuganicisya lilembali kwamkamucisye jwalakwe. Kaneko Kelsey jwatite, “Luli lunda kamula masengo pandaŵi jakwe, soni kosecela mkanipaŵe yangusosekwa kutenda. Sambano ngusalemba yindu yosope yangwembeceya kutenda. Yeleyi yingamucisye kuti malisyeje kamula masengo pandaŵi jakwe.”

LIPOWO

Jwamkongwe jwine lina lyakwe Kirsten jwatite, “Ŵamkwangu ŵawundwice ulombela ni kundeka ni ŵanace mcece.” Ana lilemba lyapi lyalyamkamucisye jwalakwe? Lilemba lya Miyambo 17:17, lyalikusati, “Mjetu jusyesyene akusatunonyela ndaŵi syosope, soni jwalakwe ali mlongo mjetu juŵapagwile kuti atukamucisyeje patusimene ni yipwetesi.” Kirsten, jwapatile cikamucisyo kutyocela kwa acimjakwe ŵakusamtumicila Yehofa. Ana ŵamkamucisye camtuli? Jwalakwe jwatite, “Acimjangu ŵane ŵasumilaga yakulya soni maluŵa ni kuyileka pamlango pangu. Katatu kose, acimjangu ŵanesoni ŵangamucisye uneji ni ŵanace ŵangu pakusama nyumba jine kwawula jasambano. Mjangu jwinesoni ŵangamucisye kuti mbate masengo. Kusala yisyene, ndaŵi syosope acimjanguŵa ŵambaga cikamucisyo pandaŵi jangusosecela.”

Delphine, jwamkongwe jwacikulile jwatumkolasile mungani sipite sila, jwalagagasoni ni lipowo. Panyuma pa yakusawusya yayamtendecele, jwalakwe jwatite, “Panawonaga ŵandu ŵane ali mkusangalala ni acalongo acimjawo, nambo une ndili jika, naŵaga jwangasangalala.” Lilemba lyalyamkamucisye jwalakwe lili lya Salimo 68:6, lyalikusati, “Mlungu akusiŵapa ŵandu ŵali jika malo gakuti atameje.” Jwalakwe jwatite, “Namanyililaga kuti lilembali ngalikusagopolela kuti Mlungu mpaka ambe nyumba jisyesyene apano. Nambo mmalo mwakwe likusagopolela malo getu gakulambilila, kwele kwatukusapata citeteyo cisyesyene. Nambosoni kwele kwatukusatama mwakamulana soni mwacinonyelo ni ŵandu ŵakusamnonyela Yehofa. Nambope nayimanyisoni kuti ngusosekwa kuŵa paunasi ni Yehofa mkanindande kuŵa paunasi ni ŵandu ŵane. M’yoyo, napatile cikamucisyo kutyocela palilemba lya Salimo 37:4, lyalikusati, ‘Asangalaleje mwa Yehofa, Soni jwalakwe cacapa yakumbila ya mtima wawo.’”

Kaneko jwalakwe jwamalisisye ni maloŵe gakuti, “Nayiweni kuti ngusosekwa kuŵa paunasi wakulimba ni Yehofa. Jwalakwe ali jwambone kupunda mundu jwalijose. Natendagasoni mang’asi yalumo ni ŵandu ŵane pakusaka kuti mbate acimjangu ŵambone, ŵakusamnonyela Yehofa. Nalijiganyisyesoni kuti ngusosekwa kulolaga yambone mwa ŵandu ŵane.”

Delphine jwapatile acimjakwe Ŵamboni sya Yehofa. Nambope ngaŵa kuti jemanjaji ali ŵamlama. Mpela mwayikusaŵela ni ŵandu wosope, Ŵamboni sya Yehofa nombe nawo akusasimana ni yakusawusya. Nambope yakusalijiganya m’Baibulo yikusiyalimbikasya kuti ŵakamucisyeje ŵane naga mpaka akombole. M’yoyo luli lunda kamulana ni ŵandu ŵeleŵa. Yajikusajiganya Baibulo mpaka yitukamucisyesoni pakupilila yakusawusya yanganituŵa tukombwele kuyimasya apano, mpela ulwele wangali mtela, soni ciwa ca mundu jwatukusamnonyela.