Yampaka Atende Kuti Kulijiganya Baibulo Kuŵeje Kwakusangalasya Soni Kwakamula Mtima

YOSWA jwapocele ukumu wekulungwa. Jwasosekwaga kwalongolela Ayisalayeli kwinjila m’Cilambo Celagucisye. Nambope jwajembeceyaga kusimana ni yakusawusya yejinji. Yehofa ŵamlimbikasisye kuti, ‘Mŵe ŵakulimba mtima soni ŵakulimbangana. Mganicisyeje Cilamusi cangu. M’ciŵalanjeje musi ni cilo, soni mlolecesyeje cenene kuti mkutenda mwakamulana ni yayilembedwe mwelemo. Naga mkutenda m’yoyo yicimjendela cenene, soni cimcitenda yindu mwalunda.’—Yos. 1:7, 8.

Mu ‘ndaŵi japajika soni jakusawusyaji,’ m’wejisoni citusimaneje ni yakusawusya yejinji yakutengusya. (2 Tim. 3:1) Nambope mpela muŵatendele Yoswa, yindu mpaka yitujendele cenene naga tukukuya yakusatusalila Yehofa. Tukusosekwa kuŵalangaga Baibulo ndaŵi syosope, soni kamulicisya masengo cenene yatukulijiganyayo patusimene ni yakulingwa.

Ŵajinjiwe, yikusatusawusya kuŵalanga Baibulo. Nambope kutenda yeleyi kuli kwakusosekwa mnope. Alole libokosi lyakuti, “Alinje Kutenda Yakuyicisyayi.” Libokosili likusala yampaka atende kuti kuŵalanga Baibulo kwawo kuŵeje kwakusangalasya soni kwakamula mtima.

Jwamalumbo jwajimbile kuti, “Anjendesye m’litala lya malamusi gawo, ligongo ngusasangalala nalyo.” (Sal. 119:35) Mpaka asangalaleje pakuŵalanga soni kuganicisya Maloŵe ga Mlungu. Pakutenda yeleyi cacipata cipanje cakusisika causimu.

Atamose kuti ngatukukamula masengo gakulongolela ŵandu mpela Yoswa, nambope tukusasimana ni yakusawusya yejinji. Mpela Yoswa, m’wejisoni tukusosekwa kulijiganya soni kuganicisya maloŵe ga Mlungu kuti yindu yitujendeleje cenene, soni kuti tutendeje yindu mwalunda.