Pawile Mundu Jwatukusamnonyela

Vanessa, jwakusatama ku Australia jwatite, “Nasoŵile pakamula pandaŵi jele achimwene ŵangu ŵawile mwangajembecheya. Pali papite miyesi jakuŵalanjika, natandite kwakumbuchila achimweneŵa soni yambweteche mnope mwamti yaliji mpela kuti jwine asomile ni chipula mumtima mwangu. Ndaŵi sine natumbilaga soni naliwusyaga kuti ligongo chichi achimwene ŵangu awile? Nalijimbaga magambo ligongo lyakuti nganingungulukaga nawo kwandaŵi jelewu paŵaliji umi.”

NAGA WAWOJO pakwete pawililwe mundu jwakusamnonyela, komboleka kuti akusalagasika nganisyo m’matala gejinji mpela kupikana chanasa, kulipikana mpela alijikajikape soni kusoŵa pakamula. Kombolekasoni kuti akusatumbila, kulijimba magambo soni kola woga. Yeleyi mwine niyayikusatendekasya kuliwusya naga umi wuli wakusosekwa kapena iyayi.

Tukusosekwa kumanyilila kuti kupikana chanasa nganikuŵa kulemwa atamose kuli kujigele ndaŵi jelewu. Yeleyi yikusalosya mwatwamnonyelelaga mundu jwawilejo. Nambope, ana yili yakomboleka kupata yindu yakamuchisya kumalana ni chanasa patuwililwe?

YATESILE ŴANDU ŴANE PAKUMALANA NI CHANASA PAWILILWE

Patukuyiwona kuti chanasa chetu ngachikumala, yindu yakuyichisyayi mpaka yitukamuchisye:

TUKADANDAWULAGA NAGA CHANASA CHETU CHIKUJIGALA NDAŴI JELEWU

Ŵanduwe chikusatukamula chanasa mwakulekanganalekangana. Atamose yili myoyo, kulila kukusanandiya chanasa chachikusayika ligongo lya yindu yatukusasimana nayo. Vanessa, jwatumsasile kundanda kula jwatite, “Nagambaga kulila pakusaka kumalana ni chanasa chanakolaga.” Sofía, jwele mpwakwe jwawile mwangajembecheya jwatite, “Yikusaŵaga yakupweteka panguganichisya yindu yayandendechele. Yeleyi yili mpela kuchapa liŵanga yayikusakamuchisya kuti lipole atamose kuti likusapweteka mnope.”

TUSALEJE NGANISYO SYETU SONI MWATUKUPIKANILA MUMTIMA

Yili yakupikanika kuti ndaŵi sine mpaka tusacheje kutama jikajikape. Nambo kumalana ni chanasa mwajikape kuli mpela kulingalinga kunyakula katundu jwakusitopa mnope jikape. Jared, jwa yaka 17 jwele babagwe ŵawile jwatite, “Nalondechesyaga ŵane yindu yayandagasyaga nganisyo. Nakayichilaga naga yanaŵechetaga yaliji yakupikanika, nambope yaliji chenene kuti nakombolaga kwasalila ŵane mwangupikanila mumtima.” Janice, jwatumkolasile mu ngani jandanda jila jwasasilesoni umbone wine pajwatite, “Kwasalila ŵane mwangupikanila mumtima kwaliji kwakulimbikasya mnope. Nayiwonaga kuti ŵandu ŵane ŵambikanichisyaga mwanapikanilaga mumtima soni kuti ngamkaningombola kumalana nayo pajika.”

TUKUNDEJE KUTI ŴANE ATUKAMUCHISYEJE

Dokotala jwine jwatite, “Mundu jwakusakunda kuti achimjakwe kapena achalongo achimjakwe amkamuchisyeje pandaŵi jawililwe, yikusamkamuchisya kuti akombole kupilila kulagasika nganisyo atamose kumalana nasyo kwene.” Tukusosekwa kutenda yakomboleka kuti ŵane amanyilileje yayikutusawusya, ligongo mpaka asacheje kutukamuchisya nambo ningamanyililaga yampaka atende pakutukamuchisya.—Misyungu 17:17.

TUŴEJE PAUNASI NI MLUNGU

Tina jwatite, “Paŵawile ŵamkwangu mwangajembecheya ni ulwele wa kansa nasoŵile jwakumsalila yakusawusya yangu, mwamti namsalile Mlungu yakusawusya yangu yosope. Lisiku lililyose natandite kumŵenda jwalakwe kuti angamuchisye kuti ndendeje yindu mwangusatendela ndaŵi syosope. Mlungu jwangamuchisye m’matala gejinji ganganimba ngombwele kusala.” Tarsha jwa yaka 22, paŵagambile kuwa mamagwe jwatite, “Kuŵalanga Baibulo kwalimbikasyaga lisiku lililyose. Yeleyi yandendekasyaga kupata yindu yine yakulimbikasya yanasosekwaga kuyiganichisya.”

TUGANICHISYEJE YA KWIMUKA KWA ŴANDU ŴAWE

Tina jwapitilisye ni maloŵe gakuti, “Pandanda pene, chembecheyo chakuti ŵawe chachijimuka chaliji changalimbikasya kwa une ligongo nasakaga ŵamkwangu soni pandaŵi jijojo ŵanache ŵangu ŵasakaga kwawona baba ŵawo. Pamasile yaka mcheche chiwile ŵamkwangu. Nambope apanopano nguchiwona chembecheyochi kuti chili chisyesyene soni nichachikusangamuchisya kuŵika nganisyo syangu pa yindu yamsogolo. Ngusaganichisyaga ndili mkwawonasoni ŵamkwangu, yayikusandendekasya kuti mbe jwakusangalala.”

Nganiyiŵa yikomboleche kuti patuwililwe, yindu yitande kwenda chenene ndaŵi jijojo. Nambope, yaŵasimene nayo Vanessa mpaka yitulimbikasye. Jwalakwe jwatite, “Ukusaganisyaga kuti yindu nganiyiŵa yitandilesoni kwenda chenene nambo mwapanandipanandi chanasa chikusanandipa.”

Tukumbuchileje kuti atamose nganituŵa tukombwele kumliŵalila mundu jwaŵawilejo, nambope umi wuli wakusosekwa. Pakuŵa Mlungu akusatukamuchisyaga mwachinonyelo, yikusatutendekasya kuŵa paunasi ni ŵane soni kola umi usyesyene. Konjechesya pelepa, pachangaŵapa Mlungu chachajimusya ŵandu ŵawe. Jwalakwe akusaka kuti chitwapesoni hagi ŵakunonyelwa ŵetu. Pelepa ni patuchileka kukolasoni chanasa mpaka kalakala, chachikusayika ligongo lya kuwilwa.

Malemba ga M’Baibulo Gampaka Gatukamuchisye

Mlungu akusasamala ya yakusawusya yatukusasimana nayo.

Jwakulemba Baibulo jwine jwamsalile Mlungu kuti, “Asunje misosi jangu munsaku wawo wa lipende. Ana misosi jangu nganijiŵa m’buku jawo?”—Salimo 56:8, NWT.

Yili yakomboleka kumsalila Mlungu mwakupikanila mumtima.

“Ngwasalila yisawusyo yangu pameso pawo [Mlungu] . . . Ngwalilila ŵalakwe AMBUJE [Yehofa].”a—Salimo 142:2, 5.

Yili yakomboleka kola chembecheyo.

“Kuchiŵa kwimuka kwa ŵawe.”—Masengo 24:15.

Mlungu jwasasile yakuti chachajimusya ŵandu wosope ŵaŵawile soni jwalakwe ali jwakusachilila kutenda yeleyi nditu.b—Yobu 14:14, 15.

a Baibulo jikusasala kuti lina lya Mlungu lili Yehofa.

b Kuti amanyilile yejinji pakwamba ya kwimuka kwa ŵandu ŵaŵawile, alole lijiganyo 30 m’buku ja Asangalaleje Mpaka Kalakala jakuwandisya ŵa Mboni sya Yehofa soni Mpaka ajigale bukuji kwalulele pa www.pr2711.com/yao.