M’bale Jwasambano Jwa M’likuga Lyakulongolela

LYATATU kundaŵi, pa 24 January, 2018, liŵasa lya Beteli lya United States soni lya Canada, lyasangalele palyapikene cimanyisyo capajika cakuti, M’bale Kenneth Cook, Jr., amjiticisye kuŵa M’likuga Lyakulongolela lya Mboni sya Yehofa.

M’bale Cook jwapagwile mu upande wa Pennsylvania, ku U.S.A. Jwalakwe jwalijiganyisye usyesyene ali asigele panandi kumalisya majiganyo ga ku Sekondale, kutyocela kwa m’bale jwine juŵalijiganyaga najo sukulu. M’baleju jwabatiswe pa 7 June,  1980. Jwalakwe jwatandite upayiniya wakutamilicika pa 1 September, 1982. Ali atesile upayiniyawu kwa yaka yiŵili, pa 12 October, 1984 jwalakwe jwaŵilanjidwe kuti akatumicileje ku Beteli ja ku Wallkill, New York.

Kwa yaka 25, M’bale Cook, atumicile m’madipatimenti gakulekanganalekangana ga pa Beteli kupwatikapo dipatimenti jakupulinta mabuku. Mu 1996, jwalakwe jwalombele mlongo jwine, lina lyakwe Jamie soni m’cakaci mlongoju jwatandite kutumicila pa Beteli ja ku Wallkill. Mu December 2009, M’bale ni Mlongo Cook, ŵatumisye ku Likulu Lyamajiganyo lya Watchtower ku Patterson, New York. Kweleko M’bale Cook ŵamsalile kuti akatumicileje ku Dipatimenti Jakwanga Yikalata. Mu April  2016, ali awujilesoni ku Wallkill, M’bale ni Mlongo Cook ŵamtumisyesoni ku Brooklyn, New York. Jili jimasile miyesi msano, jemanjaji ŵatyosile kweleku ni kwawula ku likulu lya pacilambo cosope capasi lya ku Warwick, New York. Mu January 2017, M’bale Cook, jwasagulidwe kuti atumicileje mpela jwakamucisya mu Komiti Jakulemba ja mu Likuga Lyakulongolela.