Cakuwungunyila Ngani Casambano

Ŵakulalicila mamiliyoni pacilambo cosope aŵele mkukamulicisya masengo buku ja Watch Tower Publications Index pakuwungunya ngani. Nambope, bukuji jikusimanikwa m’yiŵeceto yakuŵalanjikape ligongo lyakuti jikwete yindu yejinji. Ligongo lya yeleyi, buku jakuti Buku la Mboni za Yehova Lofufuzira Nkhani ajilinganyisye m’yiŵeceto yine yakwana 170. Mabuku gagali m’bukuji gali gakutandila m’caka ca 2000 kwawula msogolo. Bukuji ngajikusimanikwa m’yiŵeceto yayikwete Index, nambo m’yiŵeceto yeleyi jikusimanikwa pa Watchtower Library, soni pa LAIBULALE JA PA INTANETI ja Watchtower. Buku jakuwungunyila ngani jeleji jicakamucisya pakuwungunya kwanga kwa yiwusyo ya m’Baibulo, kupata ngani sine syausyegwe, soni jicakamucisya pakosecela misongano ja mpingo soni pakulambila kwa peŵasa.