Akamulicisyeje Masengo Webusayiti ja jw.org mu Undumetume​—“Aŵe Mjakwe jwa Yehofa”

Pa mbali jakuti “Mabuku” jajili pa Webusayiti ja jw.org, panasoni nyimbo ni mafidiyo ga ŵanace. Ana pakwete pakamulicisye masengo mbaliji mu undumetume? Naga akusalijiganya Baibulo ni nangolo jwakwete ŵanace ŵacinandipile, uli ngamlosya mbaliji? Kutenda yeleyi mpaka kumtendekasye kuti alolejesoni mbali sine sya pa Webusayiti jetu.

Paŵagaŵaga kapepala ka Ngani ja Ucimwene Na. 38, m’bale jwine ŵasimene ni jwamkongwe juŵatandite kuŵalanga kapepalako ali agambile kumpa. Jwamkongwejo ŵakwete ŵanace ŵacinandipile ŵaŵakwete lung’wanu ni kapepalako. M’balejo ŵamsalile mwakata yayaliji m’kapepalako ni kaneko ŵamlanjile adilesi ja Webusayiti jetu jajaliji kunyuma kwa kapepalako. Pakuŵa kuti jwamkongwejo ŵalosisye lung’wanu, m’balejo jwapatilepo upile wakumlosya jwalakwejo pampepe ni ŵanace ŵakwe mafidiyo ga Kalebi, pakamulicisya masengo foni jakwe.

Mlongo jwine ŵamsalile mjakwe jwakumasengo juŵakwete ŵanace ŵacinandipile yakwamba Webusayiti jetu soni ya yindu yakamucisya maŵasa yayili pa Webusayitiji. Jwamkongwejo pampepe ni ŵanace ŵakwewo ŵalolite pa Webusayitiji. Kaneko, jwamkongwejo ŵamsalile mlongo jula kuti ndaŵi jilijose ŵanace ŵakwe ŵajimbaga nyimbo jakuti “Alalicile Maloŵe,” jajili pa mbali jakuti “Aŵe Mjakwe jwa Yehofa.”

Ajimanyilile cenene mbaliji jajili pa Webusayiti ja jw.org, soni ajigalejepo mafidiyo, nyimbo, kapena yakuti atende ni kuyiŵika pa foni jawo. Pacajimanyilile cenene mbaliji, caciŵa ŵakoseka kujikamulicisya masengo mu undumetume. Kusala yisyene, Webusayitiji jili cida cakamucisya mnope pakwatumicila Ambuje!​—Mase. 20:19.