Yindu Yakamucisya Pakwiganya
1. Ana Aklistu akusalandana catuli ni kalipentala?
1 Kalipentala akusakamulicisya masengo yida yakulekanganalekangana. Yida yine akusayikamulicisya masengo ndaŵi ni katema. Kalipentala jwakupakombola cenene akusalolecesya kuti yida yakusayikamulicisya masengo ndaŵi ni katemayi yikamtalicilaga, soni akusamanyilila cenene kakamulicisye masengo kakwe. Baibulo jikusamlimbikasya Mklistu jwalijose kuti alipeleceje pa undumetume, soni kuti aŵe ‘jwamasengo jwangatenda sooni ni masengo gakwe.’ (2 Tim. 2:15) Ana cida cakusosekwa mnope pamasengo getu ni capi? Cili Maloŵe ga Mlungu, gatukusagakamulicisya mnope ‘pakutenda ŵakulijiganya.’ (Mat. 28:19, 20) M’yoyo, tukusosekwa mtawu kuti ‘tujiganyeje, soni kutagulila cenene maloŵe ga usyesyene.’ Nambope, panasoni yindu yine yatukusakamulicisya masengo mnope pakwiganya usyesyene, yele Mklistu jwalijose akusosekwa kuyimanyilila cenene kakamulicisye masengo kakwe.—Miy. 22:29.
2. Ana tukusakamulicisya masengo yindu yapi pakwiganya ŵandu ndaŵi ni katema?
2 Yatukusakamulicisya Masengo Pakwiganya Ndaŵi ni Katema: Konjecesya pa Baibulo, ana yindu yine yapi yatukusosekwa kamulicisya masengo pakwiganya? Buku jandanda jatukusakamulicisya masengo pakwiganya usyesyene wa m’Baibulo jili jakuti Ana Baibulo Jikusajiganya Cici Kusyesyene? Patumalisisye bukuji, tukusatanda kulijiganya songa syakumkamucisya jwakulijiganya paumi wakwe pakamulicisya masengo buku jakuti “Ajendelecele Kuŵa m’Cinonyelo ca Mlungu.” M’yoyo, tupakomboleje cenene kamulicisya masengo mabukuga. Panasoni tumabuku twampaka tukamulicisyeje masengo pakwiganya. Mwambone, kabuku ka Ngani Syambone Kutyocela kwa Mlungu! kakusatukamucisya kutandisya majiganyo ga Baibulo. Naga mumkuli mwawo ŵajinji yikusiŵalema kuŵalanga cenene kapena naga akwete mabuku gamnono m’ciŵeceto ca ŵanduwo kapenasoni naga nganakola mabukugo, mpaka akamulicisyeje masengo kabuku kakuti Apikanileje Mlungu kapena kakuti Apikanileje Mlungu Kuti Atame ni Umi Wangamala. Kabuku kakuti Ana Ŵani Ŵakutenda Lisosa lya Yehofa Lelo Jino? kakusakamucisya ŵakulijiganya kwalongolela ku likuga lya Yehofa. Panasoni tumafidiyo twakamucisya pakutenda ŵakulijiganya, mpela twakuti Ligongo Cici Tukusosekwa Kulijiganya Baibulo?, Ana ku Nyumba ja Ucimwene Kukusatendekwa Yatuli? soni kacisungu kakuti Does God Have a Name?
3. Ana msogolo muno mu Undumetume wa Ucimwene cimukopoceje ngani syatuli?
3 Msogolo muno, mu Undumetume wa Ucimwene cimukopoceje ngani syakutujiganya kuti tukomboleje kamulicisya masengo cenene yindu yeleyi. Patukulingalinga kamulicisya masengo cenene yakuwandisya yeleyi, tuciŵa tuli mkupikanila maloŵe gakuti, ‘Mliloleleje cenene mwasyene, nambosoni payamkusajiganya. Mjendelecele kutenda yeleyi, ligongo naga mkutenda yeleyi timcilikulupusya mwasyene nambosoni ŵakumpikanila.’—1 Tim. 4:16.