Kongolela Katende Ketu Ka Undumetume​—Tutandeje Kuŵecetana Ngani Jine Jakwe Jampaka Jitupe Upile Wakulalicila

Yesu jwaliji jwakoseka kulalicila mwaupile kwa jwamkongwe jwa Cisamaliya, ligongo ŵatandite ni kuŵecetana ngani jine jakwe. Ana mpaka tujongolele camtuli katende ketu ka undumetume mwa kutanda kuŵecetana ngani jinejakwe ni ŵandu ŵacilendo?

• Tuŵeje ŵagopoka soni tuŵecetaneje ni ŵandu. Atamose kuti Yesu jwapesile, jwalakwe jwatandite kuŵecetana ni jwamkongwe jula mwakumŵenda mesi gakumwa. M’yoyo m’wejisoni mpaka tutande ni kupeleka moni mwakusangalala, kaneko mwine mpaka tusale mwajiŵelele nyengo palisikulyo, kapena kuŵecetana ya ngani jajigambile kutendekwa kwene. Tukumbucileje kuti, cakulinga cetu ciŵeje kutanda kuŵecetana ni mundu pangani jine jakwe. M’yoyo tugambe kutanda mwakumsalila ngani jine jakwe jampaka jimsangalasye. Naga mundujo ngakwanga, tukadandawula cilicose. Tugambe kulinga kuŵecetana ni mundu jwine. Tumŵende Yehofa kuti atukamucisye kuŵa ŵakulimba mtima.​—Neh. 2:4; Mase. 4:29.

• Tuŵeje ŵakoseka kamulicisya masengo upile uliwose watukwete pakulalicila ngani syambone, nambo tukatendaga yindu mwakupupuluma. Tuŵecetaneje mwatukusaŵecetanila ni ŵandu ndaŵi syosope. Naga tukumkanganicisya mundujo kuti ajiticisye yatukumsalilayo, mpaka yiŵe yangasawusya kuti jwalakwe akatukunda kwendelecela kuŵecetana najo. Akasatenguka naga kuŵecetanako kumasile mkanaŵe kumlalicila. Naga akuyiwona kuŵa yakusawusya kamulicisya masengo litalali, alinje kutanda kuŵecetana ni mundu ali ŵangali cakulinga cakumlalicila. [Alosye soni kambilana fidiyo 1].

• Alinje kamulicisya masengo upile wakulalicila mwakusala ya cikulupi cawo mwakutyocela pasi pamtima. Yeleyi mpaka yimtendekasye jwakupikanilajo kwawusya yindu yine yakwayana ni nganijo. Yesu jwasasile yiwundo yakutesya lung’wanu yayamtendekasisye jwamkongwe jwa Cisamaliya jula kuwusya yiwusyo. Paŵatandite kumlalicila ngani syambone, yiwusyo yakwe yosope yila yajanjidwe. [Alosye soni kambilana fidiyo 2, kaneko alosye soni kambilana fidiyo 3].