Kamulicisya Masengo Mafidiyo Pakwiganya Baibulo

Yindu yakuwoneka ni meso mpaka yimkamucisye mundu kola lung’wanu nambosoni kupikanicisya soni kukumbucila yalijiganyisye. Mkwiganya Jwetu Jwamkulungwa Yehofa, jwakamulicisye masengo yindu yakuwoneka pakwiganya yiwundo yakusosekwa mnope. (Gen. 15:5; Yel. 18:1-6 1) Nombe Mkwiganya jwamkulungwa Yesu, jwakamulicisye masengo yindu yakuwoneka pakwiganya. (Mat. 18:2-6; 22:19-21) Yaka ya pacangakaŵapa, mafidiyo ni gagalosisye kuti gali gakamucisya mnope pakwiganya. Ana akusakamulicisyaga masengo mafidiyo mwalunda pakwajiganya ŵakulijiganya Baibulo ŵawo?

Mafidiyo gakwana 10 galinganyidwe kuti gatukamucisye pakwiganya kabuku kakuti Ngani Syambone Kutyocela Kwa Mlungu! Mtwe uliwose wa fidiyo ukukamulana ni cimo mwa yiwusyo yayili m’kabukuka. Kabuku ka pa intaneti kakwete maloŵe gakutulongolela kuti tuwugule fidiyo jilijose. Konjecesya pelepa, pana mafidiyo gane gagakusasala yindu yakamulana ni ngani syasili pa Yida Yakamulicisya Masengo Pakwiganya.

Ana akukambilana ngani ja m’Baibulo jajikumsawusa kujipikanicisya jwakulijiganya Baibulo jwawo? Kapena jwakulijiganya jwawo akusimana ni yakusawusya yine? Awungunye pa jw.org® soni pa JW Broadcasting® kuti apate fidiyo jampaka jimkamucisye. Komboleka kulolela fidiyojo pampepe ni jwakulijiganyajo kaneko ni kambilana yayili mu fidiyojo.

Mwesi wuliwose, gakusakopoka mafidiyo gasambano. Pakulolela mafidiyoga, aganicisyeje mwampaka agakamulicisye masengo pakwajiganya ŵane.