Ana Mpaka Tutande Chamtuli Kukambilana Pakamulichisya Masengo Tumapepala?

Kutandila mu Januwale 2018, yisyasyo ya kalalichile yiŵele yili mkusimanikwa pa chikuto cha kabuku ka Yakutendekwa Pamsongano wa Undumetume ni Umi Wachiklistu. Yisyasyoyi yitulimbikasisye kuti tuŵechetaneje ni ŵandu mmalo mwakwamba kwapa yakuŵalanga. Fidiyo ja yisyasyo ya kalalichile jilosisye mwampaka tutandile kuŵechetana pakamulichisya masengo Baibulope. Ŵatesile yeleyi pakwakamuchisya ŵakulalichila kuchengachenga ulaliki wawo. Nambope, ana yeleyi yikugopolela kuti ngatukusosekwa kukamulichisya masengo mabuku patukulalichila ku nyumba ni nyumba? Iyayi. Mwachisyasyo, mapepala mpaka gaŵe gangasawusya kutandisya kuŵechetana ni ŵandu. Mpaka tukamulichisye masengo litala lyakuyichisyali patukugaŵila tumapepala:

1. Amŵende mundu kuti asagule papali kwanga kwa chiwusyo kundanda kwa kapepala.

2. Amlosye kwanga kwakutyochela Baibulo kwakukusimanikwa pa lilemba lyalili kusyeto kwa kapepalako. Naga ndaŵi jipali aŵalanje ni kukambilana utenga wawuli mkapepalako.

3. Ampe kapepalako msyenenyumba soni amlimbikasye kuti aŵalanje pachapate ndaŵipo.

4. Mkanatyoche amlosye chiwusyo chachili pa “Yakusosekwa Kuyiganichisya” soni amsalile kuti chachikambilana kwanga kwakwe kutyochela m’Baibulo pa ulendo wakuyichisya.

Pa ulendo wakuyichisyawo akambilane kwanga kwakwe soni aleche chiwusyo chakuti chakambilane pa ulendo wine. Mpaka awusye chiwusyo chachikusimanikwa pa webusati kapena chakutyochela mkabuku kalosisye kusyeto kwa kapepalako. Naga ndaŵi jikwakunda, asale ya kabuku kakuti Ngani Syambone Kutyochela kwa Mlungu kapena kabuku kane kakulijiganyila kutyochela pa Yida Yakamulichisya Masengo Pakwiganya.