CHIPANJE CHAKUSIMANIKWA M’MALOŴE GA MLUNGU | EKISODO 10-11

Mose ni Aloni Ŵalosisye Kulimba Mtima

10:3-6, 24-26, 28; 11:4-8

Mose ni Aloni paŵaŵechetanaga ni Falawo, ŵalosisye kuti ŵaliji ŵakulimba mtima. Ana chichi chachakamuchisye kutenda yeleyi? Pakwamba ya Mose, Baibulo jikusati, “Pakuŵa ni chikulupi, Mose ŵatyosile ku Iguputo, ngajogopa kose ukali wa mwenye. Pakuŵa ŵapimililaga mpela mundu jwakumwona Mlungu jwangawonekajo.”(Aheb. 11:27) Mose ni Aloni ŵakwete chikulupi chakulimba mnope pa Yehofa soni ŵamdalilaga.

Ana ndaŵi japi jampaka tulosye kulimba mtima patukulondesya yatukusakulupilila kwa mundu jwa udindo?

Chiwulili: Ndaŵi jatukusosekwa kuŵa ŵakulimba mtima. 1. Mnyamata agambile kwima pele achimjakwe akutenda sayiluti mbendela. 2. M’bale ali mukoti. 3. Mnyamata akugaŵila kapepala kwa msyenenyumba ŵapolisi ali kulola.