Ŵalepele Kutenda Mwakamulana ni Cilanga Cawo

Yehofa ŵamsalile Mose kuti, ‘M’yice kwa une mkwele mwitumbimu. Cinjilemba malamusi gangu pa maganga ni cinjimpa mmwejo.’ Mose ŵakwesile litumbilyo, ni ŵatemi mwelemo kwa masiku 40. Paŵaliji mwitumbimu, Yehofa ŵalembile Malamusi 10 pa maganga gaŵili ni ŵagapelece kwa Mose.

Mkupita kwandaŵi, Ayisalayeli ŵaganisyaga kuti Mose agambile kwaleka jika. Ni ŵamsalile Aloni kuti, ‘Tukusaka mundu jwakuti atulongoleleje. Ni mtupanganyicisye mlungu!’ Aloni ŵajanjile kuti, ‘Ambe golidi jwawo.’ Ni jwamsukunukwile ni kupanganya mwanace jwa ng’ombe. Ni ŵanduwo ŵasalaga kuti, ‘Mwanace jwa ng’ombeju ali Mlungu jwetu juŵatukulupwisye mwakutukoposya ku Iguputo!’ M’yoyo ŵatandite kulambila mwanace jwa ng’ombejo soni kutenda cindimba. Ana kutenda yeleyi kwaliji kulemwa? Elo, ligongo jemanjaji ŵaliji ali atesile kala cilanga ni Yehofa kuti calambileje Yehofa jika. Nambo sambano jemanjaji ŵalepele kutenda mwakamulana ni cilanga cawo.

Yehofa ŵayiwonaga yayatendekwagayo, ni ŵamsalile Mose kuti, ‘Mtuluce ni mjawule kwa ŵanduwo. Ngakumbikanila soni akulambila mlungu jwaunami.’ Mose ŵatulwice mwitumbi mula ali ajigele maganga gaŵili gala.

Paŵaliji mkuŵandicila masakasago, Mose ŵapikene ŵandu ali mkwimba nyimbo. Kaneko ŵaweni ŵanduwo ali mkuŵina soni kumtindiŵalilaga mwanace jwa ng’ombejo. Mose ŵatumbile mnope. Jwalakwe ŵaponyisye pasi maganga gala mwamti gakasice. Ni mwangacelewa ŵajonasile mwanace jwa ng’ombejo. Kaneko ŵam’wusisye Aloni kuti, ‘Ana ŵanduŵa ŵatesile cici kuti mpaka mtende cindu cakusakalaci?’ Aloni ŵajanjile kuti, ‘Mkatumbila. Mkumanyilila mwaŵelele ŵanduŵa. Jemanjaji ŵasakaga mlungu, m’yoyo naponyisye golide pamoto ni kupanganya mwanace jwa ng’ombeju.’ Aloni nganasosekwa kutenda yeleyi. Mose ŵawujilesoni mwitumbi mula kukum’ŵenda Mlungu kuti ŵakululucile ŵandu ŵala.

Yehofa ŵakululucile ŵandu ŵaŵaliji ŵakusacilila kumpikanila. Ana mliweni ligongo lyakwe Ayisalayeli ŵasosekwaga kumpikanilaga Mose paŵalongolelaga?