Ana Tupopeleje Chamtuli Kuti Mlungu Atupikanileje?
Yehofa ali Mlungu ‘jwakusapikana lipopelo.’ (Salimo 65:2) Mpaka tuŵechetane najo kulikose soni pandaŵi jilijose. Chinga tukupopela chamumtima kapena mwakoposya maloŵe, jwalakwe akusapikana. Yehofa akusasaka kuti tumwoneje kuŵa “Atati,” sonitu ali jwambone. (Mateyu 6:9) Mwachinonyelo, akusatujiganya mwampaka tupopelele ni chakulinga chakuti atupikane.
TUPOPELEJE KWA YEHOFA MLUNGU M’LINA LYA YESU
“Atati ŵangu tachimpa chilichose chitimchiŵenda mu lina lyangu.”—Yohane 16:23.
Maloŵe ga Yesuga, gakulosya chenene kuti Yehofa akusasaka kuti tupopeleje kwa jwalakwejo. Mlungu jwangasaka kuti tupopeleje kupitila mu yindu yine mpela mafano, ŵandu ŵaswela mtima, malayika kapena achinangolo ŵaŵawile kalakala. Mmalo mwakwe, akusasaka kuti tupopeleje m’lina lya Yesu, soni patukutenda yeleyi tukusalosya kuti tukumanyilila yaŵatutendele Yesu. Ni ligongo lyakwe Yesu jwatite, “Pangali mundu jwakwawula kwa Atati akaŵe kupitila mwa une basi.”—Yohane 14:6.
TUPOPELEJE KUTYOCHELA MUMTIMA
“Amkusulile jwalakwe ya mumtima mwawo.”—Salimo 62:8, NWT.
Patukupopela kwa Yehofa, tukusosekwa tuŵecheteje najo mpela mwatukusatendela pakuŵechetana ni baba ŵetu ŵakusatunonyela. Tukapelekaga mapopelo gakwamba kuŵalanga kutyochela m’buku kapena gatwajinjisye pamtima. Mmalo mwakwe, tukusosekwa kuŵechetana najo mwaulemu soni kutyochela mumtima.
MAPOPELO GETU GAŴEJE GAKAMULANA NI LISOSA LYA MLUNGU
“Akusatupikana pandaŵi jitukuŵenda kandu kalikose mwakulingana ni lisosa lyakwe.”—1 Yohane 5:14.
M’Baibulo, Yehofa Mlungu akusatusalila yachachitutendela soni yakusasaka kuti m’weji tutendeje. Kuti Mlungu ajanjeje mapopelo getu, tukusosekwa tupopeleje, “mwakulingana ni lisosa lyakwe.” Yeleyi mpaka yikomboleche naga tukusalijiganya Baibulo kuti tummanyilileje chenene jwalakwe. Kutenda yeleyi kuchikamuchisya kuti mapopelo getu gaŵeje gakumsangalasya Mlungu.
ANA MPAKA TUŴENDE YAMTULI MWIPOPELO?
Yatukusosechela. Mpaka tumŵende Mlungu kuti atukamuchisye kupata yakusosechela yetu ya lisiku ni lisiku mpela yakulya, yakuwala, soni malo gakutama. Nambosoni kuti atupe lunda lwakutukamuchisya kusagula chenene yindu, soni machili gakutukamuchisya kupilila patusimene ni yakusawusya. Mpaka tupopele kwa Mlungu kuti atupe chikulupi, atukululuchile yakulemwa, soni kuti atukamuchisye.—Luka 11:3, 4, 13; Yakobo 1:5, 17.
Twapopeleleje Ŵandu Ŵane. Achinangolo ŵakusiŵasamalila chenene ŵanache ŵawo, akusasangalala naga ŵanachewo akunonyelana. Yehofa akusasakasoni kuti ŵanache ŵakwe ŵapachilambo chapasi anonyelaneje. Mpaka tutende chenene kwapopelelaga ŵamkwetu, liŵasa lyetu, ŵanache soni achimjetu. Yeleyi yili yakamulana ni yaŵasasile Yakobo kuti, “Mpopelelaneje.”—Yakobo 5:16.
Kumyamichila. Pakwamba ya mkupanganya jwetu Baibulo jikusasala kuti, jwalakwe akusatenda yambone. ‘Kutyochela kwinani akusatupa ula ni ndaŵi ja yisogosi. Akusatupa yakulya ni yine yejinji yagumbasya mitima jetu ni chisangalalo.’ (Masengo 14:17) Kuganichisya yosope yatutendele Mlungu, kuchitulimbikasya kuti tum’yamichileje jwalakwe mwipopelo. Nambope, tukusosekwasoni kulosya kum’yamichila Mlungu mwakumpikanila.—Akolose 3:15.
TUKAJASAGA MTIMA SONI TUPOPELEJE NDAŴI SYOSOPE
Ndaŵi sine mpaka yitupwetecheje mumtima, ligongo lyakuti Mlungu akuchelewa kwanga mapopelo getu. Nambo tukawutuchilaga kuganisya kuti Mlungu ngakusangalala ni m’weji. Kwende tulole yisyasyo yakutulimbikasya kupitilisya kupopela atamose payitendekwe yeleyi.
Steve jwatumsasile mungani jandanda jila, pakuŵecheta ya umbone wakupitilisyape kupopela jwatite, “Yikaŵe kuti nalesile kupopela, ngamkaningola chembecheyo chakuti chinjisangalalagasoni paumi wangu.” Ana chichi chachamkamuchisye? Jwalakwe jwatwandite kulijiganya Baibulo soni jwalijiganyisye kusosekwa kwa kupopela kwa Mlungu mwangalechesya. Steve jwatite, “Ngusapopela kwa Mlungu pakum’yamichila ligongo lya chinonyelo chakwe, soni chikamuchisyo chanapochele kutyochela kwa achimjangu ŵampamtima. Sambano ndili jwakusangalala mnope kupunda pandanda.”
Uli pakwamba ya Jenny juŵaliwonaga kuti ali jwangasosekwa, soni kuti Mlungu ngaŵa mkupikanila lipopelo lyakwe? Jwalakwe jwatite, “Pandaŵi ja naliwonaga kuti ndili jwangasosekwa, napopesile kwa Mlungu kuti angamuchisye kupikanichisya ligongo lyakwe naliwonaga chamti myoyo.” Ana yeleyi yamkamuchisye chamtuli? Jenny ŵatite, “Lipopelo lyangamuchisye kuti naliwoneje mpela mwakusambonela Mlungu soni kuti ngapikanilaga mtima wangu wawukusandendekasya kuliwona chamti myoyo. Lyangamuchisyesoni kuti ngawujila munyuma.” Ana mbesi jakwe jaliji jamtuli? Jwalakwe akuti, “Natandite kum’wona Yehofa Mlungu kuti ali jusyesyene, akusanonyela, soni akusasamalila. Nambosoni kuti ali mjangu jwakusangamuchisya pandaŵi jilijose jamsimene ni yakusawusya, mnopemnope naga ngutenda yindu yakusasaka jwalakwe.”
“Isabel jwatite, “Pangumwona jwalakwe ali mkusangalala atamose kuti ali jwamlemale, ngusayiwona kuti kweleku kuli kwanga kwa mapopelo gangu.”
Kwende tulolesoni yayamtendechele Isabel. Paŵakwete msigo, madokotala gamsalile kuti chachiŵeleka mwanache jwamlemale. Jwalakwe jwasoŵile chakutenda. Ŵandu ŵane ŵamlimbikasisye kuti atyosye msigowo. Jwalakwe jwatite, “Yambwetekaga mumtima mwamti nalipikanaga kuti chimbwe.” Ana jwatesile chichi? Jwalakwe jwatite, “Napopesile mwangalechesye kuti Mlungu angamuchisye.” Pali papite ndaŵi jwaŵeleche mwanache jwamlume jwamlemale. Ana Isabele akusayiwona kuti Mlungu ŵajanjile mapopelo gakwe? Elo. Nambo m’litala lyamtuli? Jwalakwe jwatite, “ngusayiwona kuti Mlungu ajanjile mapopelo gangu, ligongo apano mwanache jwangu akwete yaka 14, soni akusangalala atamose kuti ali jwamlemale.”
Yindu yeleyi yikusatutendekasya kuganichisya maloŵe gakuti, “Ŵalakwe, Ambuje akusapikana yakwaŵenda ŵandu ŵakulitulusya, ŵalakwe tiŵalimbisye mitima jawo, ni tachatejela” liwiwi. (Salimo 10:17) Maloŵe gelega gakutulimbikasya kuti tupitilisyeje kupopela kwa Mlungu.
Baibulo jikusasala ya mapopelo gejinji ga Yesu. Lipopelo lyakumanyika mnope ni lyaŵajiganyisye ŵakulijiganya ŵakwe. Ana mpaka tulijiganye chichi kutyochela ku lipopelo lyeleli?